ମଧ୍ୟପ୍ରାଚ୍ୟରେ ଆମେରିକା-ଇରାନ ମଧ୍ୟରେ ସାମରିକ ସଂଘର୍ଷ ଆହୁରି ତୀବ୍ର ହୋଇଛି। ବୁଧବାର ଆମେରିକା ପକ୍ଷରୁ ଇରାନର ବିଭିନ୍ନ ସାମରିକ ଓ କୌଶଳଗତ ସ୍ଥାନକୁ ଟାର୍ଗେଟ କରି ବ୍ୟାପକ ଆକ୍ରମଣ କରାଯାଇଥିଲା। ଇରାନର ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁସାରେ, ଏହି ଆକ୍ରମଣରେ ପାଞ୍ଚଟି ପ୍ରଦେଶରେ ୧୪ ଜଣଙ୍କ ମୃତ୍ୟୁ ଘଟିଥିବାବେଳେ ୭୮ ଜଣ ଆହତ ହୋଇଛନ୍ତି।

ଏହାର ପ୍ରତିକ୍ରିୟା ସ୍ୱରୂପ ଇରାନର ଇସ୍ଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ୍ (IRGC) ବାହାରିନ୍ ଓ କୁଏତରେ ଥିବା ସାମରିକ ପ୍ରତିଷ୍ଠାନଗୁଡ଼ିକୁ ଲକ୍ଷ୍ୟ କରି ପ୍ରତିଆକ୍ରମଣ କରିଥିବା ଦାବି କରିଛି। ଏହା ଫଳରେ ସମଗ୍ର ଅଞ୍ଚଳରେ ସୁରକ୍ଷା ପରିସ୍ଥିତି ଅଧିକ ସଙ୍କଟଜନକ ହୋଇପଡ଼ିଛି।

ଇରାନର ସରକାରୀ ଗଣମାଧ୍ୟମ ଅନୁସାରେ ବୁଶେହର, ଚାବାହାର, କୋନାରାକ, ବନ୍ଦର ଆବାସ ଏବଂ ସିରିକ ସମେତ ବିଭିନ୍ନ ସହରରେ ବିସ୍ଫୋରଣ ଘଟିଛି। ବୁଶେହରରେ ଥିବା ପରମାଣୁ ଶକ୍ତି କେନ୍ଦ୍ର ଅଞ୍ଚଳ ନିକଟରେ ମଧ୍ୟ ଆକ୍ରମଣ ହୋଇଥିବା ସୂଚନା ମିଳିଛି। ଏହି ଆକ୍ରମଣରେ ବିମାନବନ୍ଦରର ଜଣେ ଅଗ୍ନିଶମ କର୍ମଚାରୀଙ୍କ ମୃତ୍ୟୁ ଘଟିଥିବା ଇରାନୀ ଅଧିକାରୀମାନେ କହିଛନ୍ତି।

ଏପ୍ରିଲ୍ ପରେ ପ୍ରଥମ ଥର ପାଇଁ ଆମେରିକା ଇରାନର ସେତୁଗୁଡ଼ିକୁ ମଧ୍ୟ ଟାର୍ଗେଟ କରିଛି। ଉତ୍ତର-ପୂର୍ବ ଗୋଲେସ୍ତାନ ପ୍ରଦେଶର ଏକ ରେଳ ସେତୁ ଉପରେ ଆକ୍ରମଣ ହୋଇଥିବାବେଳେ ମସହଦକୁ ଯାଉଥିବା ଦୁଇଟି ସେତୁକୁ ମଧ୍ୟ ଲକ୍ଷ୍ୟ କରାଯାଇଥିବା ଆଇଆରଜିସି ଦାବି କରିଛି।

ଏପଟେ ଗୁରୁବାର ପୂର୍ବତନ ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖେମେନିଙ୍କୁ ମସହଦରେ ସମାଧି ଦିଆଯିବାର କାର୍ଯ୍ୟକ୍ରମ ରହିଥିବାବେଳେ ଅଞ୍ଚଳର ସୁରକ୍ଷାକୁ ନେଇ ଚିନ୍ତା ବଢ଼ିଛି।

ଆମେରିକୀୟ ସାମରିକ ଅଧିକାରୀଙ୍କ ଅନୁସାରେ, ସଦ୍ୟ ଅଭିଯାନରେ ପ୍ରାୟ ୯୦ଟି ଇରାନୀ ସାମରିକ ଲକ୍ଷ୍ୟସ୍ଥଳ ଉପରେ ଆକ୍ରମଣ କରାଯାଇଛି। ବାୟୁ ପ୍ରତିରକ୍ଷା ବ୍ୟବସ୍ଥା, କ୍ଷେପଣାସ୍ତ୍ର ଘାଟି, ଡ୍ରୋନ୍ ସଂରକ୍ଷଣ କେନ୍ଦ୍ର ଓ ଅନ୍ୟାନ୍ୟ ସାମରିକ ଭିତ୍ତିଭୂମିକୁ ଏହି ଅଭିଯାନରେ ଟାର୍ଗେଟ କରାଯାଇଥିବା ଦାବି କରାଯାଇଛି।