ସୁପ୍ରିମକୋର୍ଟ ସୋମବାର UPI ଉପରେ ନୂଆ Merchant Discount Rate (MDR) ଲାଗୁ କରିବାକୁ ନେଇ ଦାଏର ହୋଇଥିବା PILର ଶୁଣାଣି କରିଛନ୍ତି। CJI ସୂର୍ଯ୍ୟକାନ୍ତଙ୍କ ନେତୃତ୍ୱରେ ଜଷ୍ଟିସ୍ ଜୟମାଲ୍ୟ ବାଗଚୀ ଓ ଜଷ୍ଟିସ୍ ଭି. ମୋହନାଙ୍କ ଖଣ୍ଡପୀଠ ଏହି ମାମଲା ଶୁଣିଛନ୍ତି। କୋର୍ଟ ନୂଆ MDR ବ୍ୟବସ୍ଥା ଉପରେ ଅନ୍ତରୀଣ ଷ୍ଟେ’ ଦେବାକୁ ମନା କରିଥିବା ବେଳେ କେନ୍ଦ୍ର ସରକାରଙ୍କୁ ଏହାର ଆଇନଗତ ଓ ବାସ୍ତବିକ ଆଧାର ବ୍ୟାଖ୍ୟା କରି ଆଫିଡେଭିଟ୍ ଦାଖଲ କରିବାକୁ କହିଛନ୍ତି।

କେନ୍ଦ୍ରର ନୂଆ ଫ୍ରେମୱାର୍କ ଅନୁସାରେ, ଅକ୍ଟୋବର ୧୫, ୨୦୨୬ରୁ ₹୨,୦୦୦ରୁ ଅଧିକ ନିର୍ଦ୍ଦିଷ୍ଟ Person-to-Merchant (P2M) UPI ଲେନଦେନରେ ୦.୪% MDR ଲାଗିବ। ₹୭୫,୦୦୦ କିମ୍ବା ତା’ଠାରୁ ଅଧିକ ଲେନଦେନରେ ଏହି ଶୁଳ୍କ ସର୍ବାଧିକ ₹୩୦୦ରେ ସୀମିତ ରହିବ। ରେଳ, ଟେଲିକମ୍, ବୀମା, ଇନ୍ଧନ ଓ କୃଷି ଇନ୍ପୁଟ୍ ଭଳି କିଛି ନିର୍ଦ୍ଦିଷ୍ଟ କ୍ଷେତ୍ରରେ ₹୫ ଫ୍ଲାଟ୍ MDR ଏବଂ କ୍ୟାପିଟାଲ୍-ମାର୍କେଟ୍ ଲେନଦେନରେ ୦.୦୨% MDR ବ୍ୟବସ୍ଥା ରହିଛି।

ଶୁଣାଣି ସମୟରେ ଖଣ୍ଡପୀଠ MDRର ଆଇନଗତ ଆଧାର ନେଇ ପ୍ରଶ୍ନ ଉଠାଇଥିଲେ। ଏହା ଟ୍ୟାକ୍ସ ନା ଫି’ ଏବଂ ଯଦି ଉଭୟ ନୁହେଁ, ତେବେ କେଉଁ ଆଇନଗତ ଆଧାରରେ ଏହା ଲାଗୁ କରାଯାଉଛି—ସେନେଇ କୋର୍ଟ ପ୍ରଶ୍ନ କରିଥିବା LiveLaw ରିପୋର୍ଟ କରିଛି।

କେନ୍ଦ୍ର ପକ୍ଷରୁ ASG ଏନ୍. ଭେଙ୍କଟରମଣ କହିଛନ୍ତି ଯେ MDR ଟ୍ୟାକ୍ସ କିମ୍ବା ସରକାରୀ ଫି’ ନୁହେଁ ଏବଂ ଏଥିରୁ ସରକାର କୌଣସି ଅର୍ଥ ନେବ ନାହିଁ। ତାଙ୍କ ଅନୁସାରେ ଏହା ପେମେଣ୍ଟ ଇକୋସିଷ୍ଟମ୍‌ରେ ଥିବା ବ୍ୟାଙ୍କ ଓ ଅନ୍ୟ ଅଂଶୀଦାରଙ୍କ ଖର୍ଚ୍ଚ ସମ୍ବନ୍ଧୀୟ ସେଟଲମେଣ୍ଟ ଫି’।

P2P UPI ଟ୍ରାନ୍ସଫର ମାଗଣା ରହିବ। ₹୨,୦୦୦ ପର୍ଯ୍ୟନ୍ତ merchant payment ଉପରେ MDR ଲାଗିବ ନାହିଁ। କେନ୍ଦ୍ର ଅନୁସାରେ ପ୍ରାୟ ୯୬% merchant transactions ଏହି ନୂଆ ଚାର୍ଜର ପ୍ରଭାବରୁ ବାହାରେ ରହିବ। NPCI ମଧ୍ୟ କହିଛି ଯେ ₹୨,୦୦୦ ପର୍ଯ୍ୟନ୍ତ ଲେନଦେନ UPI merchant transaction volumeର ୯୬%ରୁ ଅଧିକ।

ଅନ୍ୟପଟେ, ଆବେଦନକାରୀ ଆଇନଗତ ଆଧାର, ₹୨,୦୦୦ ସୀମା, UPI ଓ RuPay debit card ମଧ୍ୟରେ ଭିନ୍ନ ବ୍ୟବସ୍ଥା ଏବଂ ଏହାର ସମ୍ଭାବ୍ୟ ବ୍ୟବସାୟିକ ପ୍ରଭାବ ନେଇ ପ୍ରଶ୍ନ ଉଠାଇଛନ୍ତି। ମାମଲାରେ କେନ୍ଦ୍ର ସରକାର, RBI, NPCI ଓ ଅନ୍ୟ ସମ୍ପୃକ୍ତ ପକ୍ଷଙ୍କୁ ନୋଟିସ୍ ଦିଆଯାଇଛି।