ପଶ୍ଚିମ ଏସିଆରେ ଚାଲୁଥିବା ସଂଘର୍ଷ ମଧ୍ୟରେ ସଂଯୁକ୍ତ ଆରବ ଏମିରେଟ୍ସ (UAE)ର ରାଜଧାନୀ ଆବୁଧାବି ଉପରେ ଏକ ବଡ଼ ଧରଣର ମିସାଇଲ୍ ଆକ୍ରମଣ ଘଟିଛି। ଏହି ଆକ୍ରମଣ ରବିବାର ବିଳମ୍ବିତ ରାତିରୁ ସୋମବାର ସକାଳ ମଧ୍ୟରେ ଘଟିଥିବା ବେଳେ ଇରାନ ପକ୍ଷରୁ ଡ୍ରୋନ୍ ଓ ବାଲିଷ୍ଟିକ୍ ମିସାଇଲ୍ ମାଡ଼ ହୋଇଥିବା ତଥ୍ୟ ସାମ୍ନାକୁ ଆସିଛି।

ତଥାପି, ୟୁଏଇର ଶକ୍ତିଶାଳୀ ବାୟୁ ପ୍ରତିରକ୍ଷା ବ୍ୟବସ୍ଥା ସମସ୍ତ ଆକ୍ରମଣକୁ ସଫଳତାର ସହ ପ୍ରତିହତ କରିଥିଲା ଓ ମିସାଇଲ୍ଗୁଡିକୁ ଆକାଶରେ ନଷ୍ଟ କରିଦେଇଥିଲା। କିନ୍ତୁ ଏହାର କିଛି ଭଗ୍ନାବଶେଷ ଆବୁଧାବିର ଅଲ୍ ଶାୱାମେଖ୍ ଅଞ୍ଚଳରେ ଖସି ପଡ଼ିଥିଲା।

ଏହି ଘଟଣାରେ ଜଣେ ଭାରତୀୟ ନାଗରିକ ସାମାନ୍ୟ ଆହତ ହୋଇଥିବା ଜଣାପଡ଼ିଛି। ତାଙ୍କୁ ତୁରନ୍ତ ଚିକିତ୍ସା ସୁବିଧା ଯୋଗାଇ ଦିଆଯାଇଛି ଓ ସ୍ଥିତି ନିୟନ୍ତ୍ରଣରେ ରହିଛି।

ଆବୁଧାବି ମିଡିଆ ଅଫିସ ପକ୍ଷରୁ ଜଣାଯାଇଛି ଯେ, ସ୍ଥାନୀୟ ପ୍ରଶାସନ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା ଓ ଅଞ୍ଚଳକୁ ସୁରକ୍ଷିତ କରାଯାଇଛି। ସେହିପରି ସୋସିଆଲ ମିଡିଆରେ ଚାଲୁଥିବା ଗୁଜବକୁ ଅନଦେଖା କରି କେବଳ ସରକାରୀ ସୂଚନାକୁ ମାନିବାକୁ ଲୋକମାନଙ୍କୁ ଅନୁରୋଧ କରାଯାଇଛି।

ୟୁଏଇ ପ୍ରତିରକ୍ଷା ମନ୍ତ୍ରଣାଳୟ ଅନୁଯାୟୀ, ଏହି ଆକ୍ରମଣ ସମୟରେ ୨୫ଟି ଡ୍ରୋନ୍, ୪ଟି ବାଲିଷ୍ଟିକ୍ ମିସାଇଲ୍କୁ ଧ୍ୱଂସ କରାଯାଇଥିଲା। ସମଗ୍ର ସଂଘର୍ଷ ଆରମ୍ଭ ହେବା ପରଠାରୁ ଏପର୍ଯ୍ୟନ୍ତ ୧,୭୭୩ଟି ଡ୍ରୋନ୍, ୩୪୫ଟି ବାଲିଷ୍ଟିକ୍ ମିସାଇଲ୍ ଓ ୧୫ଟି କ୍ରୁଜ୍ ମିସାଇଲ୍କୁ ୟୁଏଇ ସଫଳତାର ସହ ପ୍ରତିହତ କରିଛି।

ସରକାର ସ୍ପଷ୍ଟ କରିଛି ଯେ, ଦେଶର ସୁରକ୍ଷା ପାଇଁ ସେନା ସଦା ସତର୍କ ଅଛି ଓ ଯେକୌଣସି ବିପଦକୁ ମୁହାଁ ଦେବାକୁ ପ୍ରସ୍ତୁତ ଅଛି।