ଫିଲ୍ମୀ ଶୈଳୀରେ ଏକ ହୀରା ଚୋରି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି। ସୁରଟରେ ଅସଲି ହୀରା ପରି ଏକ ନକଲି ହୀରା ତିଆରି କରି ସିଙ୍ଗାପୁରର ଏକ ଜୁଏଲେରୀ ଦୋକାନରୁ ପ୍ରାୟ ୧.୫ କୋଟି ଟଙ୍କା ମୂଲ୍ୟର ୪.୯୫ କ୍ୟାରେଟ୍ର ଅସଲି ହୀରା ଚୋରି କରିବାକୁ ଉଦ୍ୟମ କରିଥିବା ଦୁଇ ଭାରତୀୟ ନାଗରିକଙ୍କୁ ଗିରଫ କରାଯାଇଛି। ଏହି ମାମଲାରେ ଜଣେ ଅଭିଯୁକ୍ତଙ୍କୁ ଜେଲଦଣ୍ଡ ହୋଇଥିବା ବେଳେ ଅନ୍ୟ ଜଣଙ୍କ ମାମଲାର ଶୁଣାଣି ଜାରି ରହିଛି।

ଗିରଫ ଦୁଇ ଅଭିଯୁକ୍ତ ହେଲେ ୪୧ ବର୍ଷୀୟ ମାଙ୍ଗରୋଲିଆ ମନୋଜକୁମାର କୁର୍ଜିଭାଇ ଏବଂ ୩୦ ବର୍ଷୀୟ ସେରାସିଆ ମିଲନ ରମଣୀକଭାଇ। ମନୋଜକୁମାରଙ୍କୁ ଦୁଇ ବର୍ଷ, ଦୁଇ ମାସ ଏବଂ ଦୁଇ ସପ୍ତାହ ଜେଲଦଣ୍ଡ ଦିଆଯାଇଥିବା ବେଳେ ମିଲନଙ୍କ ମାମଲାର ଶୁଣାଣି ଆସନ୍ତା ଜୁଲାଇ ୨୪ ତାରିଖରେ ହେବ।

ରିପୋର୍ଟ ଅନୁସାରେ, ଦୁଇ ଅଭିଯୁକ୍ତ ସିଙ୍ଗାପୁର ଯିବା ପୂର୍ବରୁ ସୁରଟରେ ଅସଲି ହୀରା ସଦୃଶ ଏକ ନକଲି ହୀରା ପ୍ରସ୍ତୁତ କରିଥିଲେ। ସିଙ୍ଗାପୁରର ଚାଇନାଟାଉନ ସ୍ଥିତ ଏକ ଜୁଏଲେରୀ ଦୋକାନରୁ ୧୫୪ ହଜାର ଆମେରିକୀୟ ଡଲାର ମୂଲ୍ୟର ୪.୯୫ କ୍ୟାରେଟ୍ର ହୀରା ଚୋରି କରିବା ସେମାନଙ୍କ ଯୋଜନା ଥିଲା।

ଯୋଜନା ଅନୁଯାୟୀ, ମନୋଜକୁମାର ଦୋକାନର ବିକ୍ରୟ ପରିଚାଳକଙ୍କୁ ବିଭିନ୍ନ ଅଳଙ୍କାର ଦେଖାଇବାକୁ କହି ତାଙ୍କ ଧ୍ୟାନ ହଟାଇଥିଲେ। ଏହି ସମୟରେ ମିଲନ ତାଙ୍କ ପାଟିରେ ଲୁଚାଇ ରଖିଥିବା ନକଲି ହୀରାକୁ କାଢ଼ି ଅସଲି ହୀରା ସହ ବଦଳାଇ ଦେଇଥିଲେ ଏବଂ ଅସଲି ହୀରାକୁ ନିଜ ପାଟିରେ ଲୁଚାଇ ରଖିଥିଲେ।

ଅଭିଯୁକ୍ତମାନଙ୍କର ଏହି ସମସ୍ତ କାର୍ଯ୍ୟ ସିସିଟିଭି କ୍ୟାମେରାରେ କଏଦ ହୋଇଥିଲା। ସେମାନେ ଦୋକାନ ଛାଡ଼ିବା ପରେ ବିକ୍ରୟ ପରିଚାଳକ ଏକ ଅପ୍ଟିକାଲ୍ ଜେମ୍ଷ୍ଟୋନ୍ ଆଇଡେଣ୍ଟିଫିକେସନ୍ ମେସିନ୍ରେ ହୀରାଟିର ଯାଞ୍ଚ କରି ଏହା ନକଲି ବୋଲି ଜାଣିଥିଲେ ଏବଂ ତୁରନ୍ତ ପୁଲିସକୁ ସୂଚନା ଦେଇଥିଲେ।

ଚୋରି ପରେ ଦୁଇ ଅଭିଯୁକ୍ତ ନିଜ ହୋଟେଲକୁ ଫେରି ସେହିଦିନ ସନ୍ଧ୍ୟାରେ ଭାରତ ଫେରିବା ପାଇଁ ବିମାନ ଟିକେଟ୍ ବୁକ୍ କରିଥିଲେ। କିନ୍ତୁ ଚାଙ୍ଗି ବିମାନବନ୍ଦରର ଟର୍ମିନାଲ-୩ରେ ଇମିଗ୍ରେସନ୍ କ୍ଲିୟର କରୁଥିବା ବେଳେ ରାତି ପ୍ରାୟ ୮ଟା ୫୦ ମିନିଟ୍ରେ ସେମାନଙ୍କୁ ଗିରଫ କରାଯାଇଥିଲା। ମିଲନଙ୍କ ବ୍ୟାଗରୁ ଚୋରି ହୋଇଥିବା ଅସଲି ହୀରାକୁ ଜବତ କରିଥିଲା ପୁଲିସ।