ଇରାନରେ ସରକାର ପରିବର୍ତ୍ତନ ଚାହୁଁନାହାନ୍ତି ଟ୍ରମ୍ପ! ପରମାଣୁ ଅସ୍ତ୍ର ରୋକିବାକୁ ଚାହୁଁଛି ଆମେରିକା, କରିବେ ସ୍ଥାୟୀ ଚୁକ୍ତି

ଇରାନରେ ଶାସନ ପରିବର୍ତ୍ତନ ଆମେରିକାର ଲକ୍ଷ୍ୟ ନୁହେଁ ବୋଲି କହିଛନ୍ତି ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଇରାନ ସହ ଏକ ସ୍ଥାୟୀ ଚୁକ୍ତି କରି ଯୁଦ୍ଧର ଅନ୍ତ ଘଟାଇବା ସହ ତେହେରାନକୁ ପରମାଣୁ ଅସ୍ତ୍ର ହାସଲ କରିବାରୁ ରୋକିବା ତାଙ୍କର ମୁଖ୍ୟ ଉଦ୍ଦେଶ୍ୟ ବୋଲି ସେ କହିଛନ୍ତି। ତେବେ ଇରାନ ସହ ଆଗାମୀ ଦିନରେ ପୁଣି ସାମରିକ ଆକ୍ରମଣ ହେବାର ସମ୍ଭାବନାକୁ ନେଇ ମଧ୍ୟ ଚର୍ଚ୍ଚା ଜାରି ରହିଛି।
	Donald Trump discusses a permanent nuclear deal with Iran and rules out regime change
Donald Trump discusses a permanent nuclear deal with Iran and rules out regime change

ୱାଶିଂଟନ୍‌: ଇରାନ ଓ ଆମେରିକା ମଧ୍ୟରେ ଚାଲିଥିବା ଯୁଦ୍ଧ ଉତ୍ତେଜନା ମଧ୍ୟରେ ଏକ ବଡ଼ ବୟାନ ଦେଇଛନ୍ତି ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଇରାନରେ ଶାସନ ପରିବର୍ତ୍ତନ କରିବା ଆମେରିକାର ଲକ୍ଷ୍ୟ ନୁହେଁ ବୋଲି ସେ ସ୍ପଷ୍ଟ କରିଛନ୍ତି। ବରଂ ଇରାନ ସହ ଏକ ସ୍ଥାୟୀ ଚୁକ୍ତି କରି ଯୁଦ୍ଧର ଅନ୍ତ ଘଟାଇବା ଏବଂ ଇରାନକୁ ପରମାଣୁ ଅସ୍ତ୍ର ହାସଲ କରିବାରୁ ରୋକିବା ଉପରେ ଆମେରିକା ଗୁରୁତ୍ୱ ଦେଉଛି ବୋଲି ସେ କହିଛନ୍ତି।

ଶନିବାର ଫକ୍ସ ନ୍ୟୁଜ୍‌କୁ ଦେଇଥିବା ଏକ ସାକ୍ଷାତକାରରେ ଟ୍ରମ୍ପ କହିଛନ୍ତି ଯେ, ଇରାନରେ ଶାସନ ପରିବର୍ତ୍ତନ ପ୍ରସଙ୍ଗକୁ ସେ କେବେ ବିଶେଷ ଗୁରୁତ୍ୱ ଦେଇନାହାନ୍ତି। ତେବେ ଇରାନର ପୂର୍ବତନ ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନିଙ୍କ ମୃତ୍ୟୁ ଏବଂ ପରବର୍ତ୍ତୀ ନେତୃତ୍ୱ ପରିବର୍ତ୍ତନକୁ ନେଇ ସେ ନିଜର ମତ ରଖିଛନ୍ତି।

ଟ୍ରମ୍ପଙ୍କ କହିବା ଅନୁସାରେ, ଇରାନର ପୂର୍ବତନ ନେତୃତ୍ୱର ପ୍ରଥମ ଓ ଦ୍ୱିତୀୟ ପର୍ଯ୍ୟାୟ ଶେଷ ହୋଇଛି ଏବଂ ବର୍ତ୍ତମାନ ତୃତୀୟ ଗୋଷ୍ଠୀ ସହ ଆଲୋଚନା ଚାଲିଛି। ଏହାକୁ କେହି ଚାହିଁଲେ ଶାସନ ପରିବର୍ତ୍ତନର ଶେଷ ପର୍ଯ୍ୟାୟ ବୋଲି କହିପାରିବେ ବୋଲି ସେ ମତ ଦେଇଛନ୍ତି।

ଫେବୃଆରୀ ୨୮ ତାରିଖରେ ଆମେରିକା ଓ ଇସ୍ରାଏଲ ମିଳିତ ଭାବେ ଇରାନ ଉପରେ ସାମରିକ ଅଭିଯାନ ଆରମ୍ଭ କରିଥିଲେ। ଏହି ଅଭିଯାନରେ ଇରାନର ସାମରିକ ପ୍ରତିଷ୍ଠାନ, ନେତାଙ୍କ ବାସଭବନ ଓ କାର୍ଯ୍ୟାଳୟକୁ ଟାର୍ଗେଟ୍‌ କରାଯାଇଥିଲା। ଏହି ଆକ୍ରମଣରେ ଇରାନର ସର୍ବୋଚ୍ଚ ନେତା ଅଲି ଖାମେନିଙ୍କ ସମେତ ଅନେକ ଅଧିକାରୀଙ୍କ ମୃତ୍ୟୁ ହୋଇଥିବା ରିପୋର୍ଟରେ କୁହାଯାଇଛି।

ଇରାନର ବର୍ତ୍ତମାନର ନେତୃତ୍ୱକୁ ନେଇ ଟ୍ରମ୍ପ ମିଶ୍ରିତ ମତ ଦେଇଛନ୍ତି। ତାଙ୍କ ଅନୁସାରେ, ବର୍ତ୍ତମାନର ନେତୃତ୍ୱ ପୂର୍ବ ତୁଳନାରେ ଅଧିକ ଯୁକ୍ତିଯୁକ୍ତ ମନେ ହେଉଥିଲେ ମଧ୍ୟ ସେମାନଙ୍କ ସହ ଚୁକ୍ତି କରିବା ସହଜ ନୁହେଁ। କାରଣ ଆଲୋଚନାରେ ଚୁକ୍ତି ହେବା ପରେ ମଧ୍ୟ ସେମାନେ ପରଦିନ ତାହା ଭାଙ୍ଗିଦେଉଛନ୍ତି ବୋଲି ଟ୍ରମ୍ପ ଅଭିଯୋଗ କରିଛନ୍ତି।

ଟ୍ରମ୍ପ କହିଛନ୍ତି ଯେ, ସେ ଏପରି ଏକ ଚୁକ୍ତି ଚାହୁଁଛନ୍ତି, ଯାହା ଦୀର୍ଘସ୍ଥାୟୀ ହେବ ଏବଂ ଭବିଷ୍ୟତରେ ଆମେରିକାରେ ଦୁର୍ବଳ କିମ୍ବା ଅକ୍ଷମ ରାଷ୍ଟ୍ରପତି ଆସିଲେ ମଧ୍ୟ ତାହା ବଳବତ୍ତର ରହିବ। ଇରାନକୁ କୌଣସି ପରିସ୍ଥିତିରେ ପରମାଣୁ ଅସ୍ତ୍ର ହାସଲ କରିବାକୁ ଦିଆଯିବ ନାହିଁ ବୋଲି ସେ ଜୋର୍‌ ଦେଇଛନ୍ତି।

ଏହା ପୂର୍ବରୁ ଗୁରୁବାର ଏକ ଇସ୍ରାଏଲୀ ଟେଲିଭିଜନ୍‌ ଚ୍ୟାନେଲ୍‌କୁ ଟ୍ରମ୍ପ କହିଥିଲେ ଯେ, ଇରାନ ବିରୋଧରେ ପରବର୍ତ୍ତୀ ପଦକ୍ଷେପ ନେବାକୁ ସେ ତରବର ହେଉନାହାନ୍ତି। ଆବଶ୍ୟକ ହେଲେ ୨୦୨୭ ପର୍ଯ୍ୟନ୍ତ ଅପେକ୍ଷା କରିପାରିବେ।

ତେବେ ଅନ୍ୟପଟେ CBS ନ୍ୟୁଜ୍‌କୁ କିଛି ସୂତ୍ର କହିଛନ୍ତି ଯେ, ଆମେରିକା ଓ ଇସ୍ରାଏଲ ଖୁବ୍‌ଶୀଘ୍ର ଇରାନ ଉପରେ ପୁଣିଥରେ ଆକ୍ରମଣ କରିବା ନେଇ ବିଚାର କରୁଛନ୍ତି। ଇରାନ ନିଜର ଅସ୍ତ୍ରଶସ୍ତ୍ର ଉତ୍ପାଦନ କ୍ଷମତାକୁ ଦ୍ରୁତଗତିରେ ପୁନର୍ଗଠନ କରୁଥିବାରୁ ଇସ୍ରାଏଲ ସରକାର ଚିନ୍ତିତ ଥିବା ରିପୋର୍ଟରେ ଉଲ୍ଲେଖ ରହିଛି।

ଏହି ମଧ୍ୟରେ ଇରାନ ରାସାୟନିକ କିମ୍ବା ଜୈବିକ ଅସ୍ତ୍ର ତିଆରି କରିବାକୁ ଉଦ୍ୟମ କରୁଥିବା ଟ୍ରମ୍ପଙ୍କ ଅଭିଯୋଗକୁ ଖାରଜ କରିଛି। ଇରାନର ବୈଦେଶିକ ମନ୍ତ୍ରଣାଳୟ କହିଛି ଯେ, ଆମେରିକା ତେହେରାନ ବିରୋଧରେ ବାରମ୍ବାର ଅଭିଯୋଗ ବଦଳାଉଛି। ୨୦୦୩ ମସିହାରେ ଇରାକ ଉପରେ ଆମେରିକାର ଆକ୍ରମଣକୁ ଯଥାର୍ଥ ଦର୍ଶାଇବା ପାଇଁ ଯେଉଁ ଭଳି ଅଭିଯୋଗ କରାଯାଇଥିଲା, ବର୍ତ୍ତମାନ ମଧ୍ୟ ସେହି ସମାନ ରଣନୀତି ଆପଣାଯାଉଛି ବୋଲି ଇରାନ ଅଭିଯୋଗ କରିଛି।

Breaking News
ଗୋପାଳପୁର ନିକଟରେ ସ୍ଥଳଭାଗ ଛୁଇଁଲା ବାତ୍ୟା ‘ଅକଭାନ୍’! ଆହୁରି ୨ ଘଣ୍ଟା ଜାରି ରହିବ ଲ୍ୟାଣ୍ଡଫଲ୍... ବାତ୍ୟା ‘ଅକଭାନ୍’ ପାଇଁ ୩୯ ଟ୍ରେନ୍ ବାତିଲ୍! ଚଳିବନି ବନ୍ଦେ ଭାରତ, ଏକ୍ସପ୍ରେସ୍ ଓ MEMU ରାମାୟଣ ପରେ ଚର୍ଚ୍ଚାରେ ଜଟାୟୁ! କେରଳର ଜଟାୟୁ ଆର୍ଥ ସେଣ୍ଟର ଯିବେ କି ପ୍ରଧାନମନ୍ତ୍ରୀ ମୋଦି? ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି! ନଭେମ୍ବର ୨୪ରେ ତିରୁପରଙ୍କୁନ୍ଦ୍ରମ ପାହାଡ଼ ଉପରେ ଜଳିବ କାର୍ତ୍ତିଗାଇ ଦୀପମ୍ ରାଜସ୍ଥାନ ପଞ୍ଚାୟତ ନିର୍ବାଚନରେ କଂଗ୍ରେସର ବଡ଼ ବିଜୟ, ବିଜେପିକୁ ଶକ୍ତ ଝଟକା! ୮ ଜିଲ୍ଲାରେ କିଙ୍ଗମେକର... ଗଙ୍ଗା ଉପରେ ନିର୍ମାଣ ହେଲା ‘ନୀତୀଶ ସେତୁ’, ଉଦ୍‌ଘାଟନ କଲେ ପ୍ରଧାନମନ୍ତ୍ରୀ ମୋଦୀ! ଗୋପାଳପୁର ନିକଟରେ ସ୍ଥଳଭାଗ ଛୁଇଁଲା ବାତ୍ୟା ‘ଅକଭାନ୍’! ଆହୁରି ୨ ଘଣ୍ଟା ଜାରି ରହିବ ଲ୍ୟାଣ୍ଡଫଲ୍... ବାତ୍ୟା ‘ଅକଭାନ୍’ ପାଇଁ ୩୯ ଟ୍ରେନ୍ ବାତିଲ୍! ଚଳିବନି ବନ୍ଦେ ଭାରତ, ଏକ୍ସପ୍ରେସ୍ ଓ MEMU ରାମାୟଣ ପରେ ଚର୍ଚ୍ଚାରେ ଜଟାୟୁ! କେରଳର ଜଟାୟୁ ଆର୍ଥ ସେଣ୍ଟର ଯିବେ କି ପ୍ରଧାନମନ୍ତ୍ରୀ ମୋଦି? ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି! ନଭେମ୍ବର ୨୪ରେ ତିରୁପରଙ୍କୁନ୍ଦ୍ରମ ପାହାଡ଼ ଉପରେ ଜଳିବ କାର୍ତ୍ତିଗାଇ ଦୀପମ୍ ରାଜସ୍ଥାନ ପଞ୍ଚାୟତ ନିର୍ବାଚନରେ କଂଗ୍ରେସର ବଡ଼ ବିଜୟ, ବିଜେପିକୁ ଶକ୍ତ ଝଟକା! ୮ ଜିଲ୍ଲାରେ କିଙ୍ଗମେକର... ଗଙ୍ଗା ଉପରେ ନିର୍ମାଣ ହେଲା ‘ନୀତୀଶ ସେତୁ’, ଉଦ୍‌ଘାଟନ କଲେ ପ୍ରଧାନମନ୍ତ୍ରୀ ମୋଦୀ!
+