ତ୍ରିପୁରା ପୋଲିସ ମହାନିର୍ଦ୍ଦେଶକ (ଡିଜିପି) ଅନୁରାଗ ଧଙ୍କରଙ୍କ ରହସ୍ୟମୟ ମୃତ୍ୟୁ ସମଗ୍ର ରାଜ୍ୟ ପ୍ରଶାସନ ଓ ପୋଲିସ ମହଲରେ ଚଞ୍ଚଳତା ସୃଷ୍ଟି କରିଛି। ସୋମବାର ଅଗରତାଲାର ଆଖୌରା ରୋଡ୍‌ସ୍ଥିତ ପୋଲିସ ମୁଖ୍ୟାଳୟରେ ଥିବା ତାଙ୍କ ଅଫିସ ସଂଲଗ୍ନ ୱାଶରୁମ୍‌ରୁ ତାଙ୍କ ମୃତଦେହ ଉଦ୍ଧାର କରାଯାଇଛି।

ସୂଚନା ଅନୁଯାୟୀ, ସକାଳ ପ୍ରାୟ ୧୧ଟା ବେଳେ ଅନୁରାଗ ଧଙ୍କର ଅଫିସର ୱାଶରୁମ୍‌କୁ ଯାଇଥିଲେ। ଦୀର୍ଘ ସମୟ ଧରି ସେ ବାହାରକୁ ନ ଆସିବାରୁ କର୍ମଚାରୀମାନଙ୍କ ସନ୍ଦେହ ହୋଇଥିଲା। ପରେ କବାଟ ଭାଙ୍ଗି ଭିତରକୁ ପ୍ରବେଶ କରି ସେମାନେ ତାଙ୍କୁ ଅଚେତନ ଅବସ୍ଥାରେ ପଡ଼ିଥିବା ଦେଖିଥିଲେ।

ତୁରନ୍ତ ତାଙ୍କୁ ଅଗରତାଲା ମେଡିକାଲ କଲେଜ ଓ GBP ହସ୍ପିଟାଲକୁ ନିଆଯାଇଥିଲା। ସେଠାରେ ଆଇସିୟୁରେ ଭର୍ତ୍ତି କରାଯାଇଥିଲେ ମଧ୍ୟ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ।

ଘଟଣାର ଖବର ପାଇବା ପରେ ତ୍ରିପୁରା ମୁଖ୍ୟମନ୍ତ୍ରୀ ମାଣିକ ସାହା, ବରିଷ୍ଠ ସରକାରୀ ଅଧିକାରୀ ଏବଂ ଶୀର୍ଷ ପୋଲିସ ଅଧିକାରୀମାନେ ହସ୍ପିଟାଲରେ ପହଞ୍ଚିଥିଲେ।

ଏପର୍ଯ୍ୟନ୍ତ ତାଙ୍କ ମୃତ୍ୟୁର କାରଣ ସମ୍ପର୍କରେ କୌଣସି ସରକାରୀ ସ୍ପଷ୍ଟୀକରଣ ଜାରି କରାଯାଇନାହିଁ। ପୋଲିସ ଏକ ଅସ୍ୱାଭାବିକ ମୃତ୍ୟୁ ମାମଲା ରୁଜୁ କରି ଘଟଣାର ସମସ୍ତ ଦିଗକୁ ନେଇ ତଦନ୍ତ ଆରମ୍ଭ କରିଛି।

ଅନୁରାଗ ଧଙ୍କର ୧୯୯୪ ବ୍ୟାଚ୍‌ର ଆଇପିଏସ୍ ଅଧିକାରୀ ଥିଲେ। ସେ ଗତବର୍ଷ ମେ' ୧୮ ତାରିଖରେ ତ୍ରିପୁରା ପୋଲିସର ଡିଜିପି ଭାବେ ଦାୟିତ୍ୱ ଗ୍ରହଣ କରିଥିଲେ। ପ୍ରାୟ ୧୮ ବର୍ଷ ଧରି ତ୍ରିପୁରାରେ ବିଭିନ୍ନ ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରି ସେ ରାଜ୍ୟ ପୋଲିସ ପ୍ରଶାସନରେ ଉଲ୍ଲେଖନୀୟ ଭୂମିକା ନିଭାଇଥିଲେ।