ବଲିଉଡ ଅଭିନେତା ସିଦ୍ଧାର୍ଥ ମଲ୍ହୋତ୍ରା ଓ ତମନ୍ନା ଭାଟିଆଙ୍କ ଅପେକ୍ଷିତ ଫ୍ୟାଣ୍ଟାସି ଫିଲ୍ମ **‘ଦ ଭ୍ୱାନ୍: ଫୋର୍ସ ଅଫ୍ ଦ ଫରେଷ୍ଟ’**ର ମୋଶନ ପୋଷ୍ଟର ମୁକ୍ତିଲାଭ କରିଛି। ଏହା ସହ ନିର୍ମାତାମାନେ ଫିଲ୍ମର ଥିଏଟର ରିଲିଜ୍ ତାରିଖ ମଧ୍ୟ ଘୋଷଣା କରିଛନ୍ତି।

୨୦୨୪ ନଭେମ୍ବରରେ ଘୋଷଣା ହେବା ପରଠାରୁ ଏହି ଫିଲ୍ମକୁ ନେଇ ଦର୍ଶକଙ୍କ ମଧ୍ୟରେ ବେଶ୍ ଉତ୍ସାହ ରହିଛି। ଭାରତୀୟ ଲୋକକଥା, ପୌରାଣିକ କାହାଣୀ ଓ ରହସ୍ୟମୟ ଜଗତକୁ ଆଧାର କରି ନିର୍ମିତ ଏହି ସିନେମା ଦର୍ଶକଙ୍କୁ ଏକ ନୂଆ ଅନୁଭୂତି ଦେବ ବୋଲି ନିର୍ମାତାଙ୍କ ଦାବି।

ମୋଶନ ପୋଷ୍ଟରରେ ଜଣେ ଯୋଦ୍ଧାଙ୍କୁ ଏକ ବାଘ ଓ ନନ୍ଦୀଙ୍କ ମଧ୍ୟରେ ଦେଖାଯାଇଛି। ଏହି ଭିଜୁଆଲ୍ ଫିଲ୍ମର ପ୍ରତୀକାତ୍ମକ ସଂଘର୍ଷ ଓ ରହସ୍ୟମୟ କାହାଣୀକୁ ଇଙ୍ଗିତ କରୁଛି। ପୋଷ୍ଟର ସହ ନିର୍ମାତାମାନେ ଲେଖିଛନ୍ତି, "ବାଘ ତା’ର ଗର୍ଜନ... ନନ୍ଦୀ ତା’ର ଶକ୍ତି... ଆଉ ଭ୍ୱାନ୍... ତା’ର କାହାଣୀ। ୨୫ ସେପ୍ଟେମ୍ବର ୨୦୨୬ରେ ସିନେମା ହଲରେ ଦେଖାହେବ।"

ଫିଲ୍ମ ମୁକ୍ତି ପୂର୍ବରୁ ଏହାର କାହାଣୀ ସହ ଦର୍ଶକଙ୍କୁ ପରିଚିତ କରିବା ପାଇଁ ‘ଦ ଲେଜେଣ୍ଡ ଅଫ୍ ଭ୍ୱାନ୍’ ନାମକ ଏକ କମିକ୍ ବୁକ୍ ମଧ୍ୟ ପ୍ରକାଶ କରାଯାଇଛି।

ଏହି ଫିଲ୍ମରେ ସିଦ୍ଧାର୍ଥ ମଲ୍ହୋତ୍ରାଙ୍କ ସହ ତମନ୍ନା ଭାଟିଆ ମୁଖ୍ୟ ଭୂମିକାରେ ନଜର ଆସିବେ। ଏହାଛଡ଼ା ଅନୁପ ସୋନି, ଶ୍ୱେତା ତିୱାରୀ, ଦୁର୍ଗେଶ କୁମାର, ସୁନୀଲ ଗ୍ରୋଭର, ମନୀଷ ପଲ୍ ସମେତ ଅନେକ କଳାକାର ଗୁରୁତ୍ୱପୂର୍ଣ୍ଣ ଚରିତ୍ରରେ ଅଭିନୟ କରିଛନ୍ତି।

ବାଲାଜି ମୋସନ ପିକ୍ଚର୍ସ ଓ TVF Motion Picturesର ମିଳିତ ପ୍ରଯୋଜନାରେ ନିର୍ମିତ ଏହି ଫିଲ୍ମକୁ ଦୀପକ କୁମାର ମିଶ୍ର ନିର୍ଦ୍ଦେଶନା ଦେଇଛନ୍ତି। କାହାଣୀ ଲେଖିଛନ୍ତି ଅରୁଣାଭ କୁମାର। ଫିଲ୍ମର ପ୍ରଯୋଜକ ହେଲେ ଶୋଭା କପୁର, ଏକତା ଆର୍ କପୁର, ଅରୁଣାଭ କୁମାର ଓ ନୀରଜ କୋଠାରୀ।

ନିକଟରେ ସିଦ୍ଧାର୍ଥ ମଲ୍ହୋତ୍ରା ‘ପରମ ସୁନ୍ଦରୀ’ ଫିଲ୍ମରେ ନଜର ଆସିଥିଲେ। ବର୍ତ୍ତମାନ ସେ ‘ଦ ଭ୍ୱାନ୍’ ଜରିଆରେ ସମ୍ପୂର୍ଣ୍ଣ ନୂଆ ଅବତାରରେ ଦର୍ଶକଙ୍କ ସମ୍ମୁଖକୁ ଆସିବାକୁ ପ୍ରସ୍ତୁତ।