ତାମିଲନାଡୁର ରାଜନୀତିରେ ଏବେ ସରକାର ଗଠନକୁ ନେଇ ଭାରି ସସ୍ପେନ୍ସ ଦେଖିବାକୁ ମିଳୁଛି। ଅଭିନେତାରୁ ରାଜନେତା ପାଲଟିଥିବା ବିଜୟଙ୍କ ଦଳ ତାମିଲାଗା ଭେଟ୍ରି କାଝାଗମ୍ (ଟିଭିକେ) ନିର୍ବାଚନରେ ୧୦୮ଟି ଆସନ ଜିତି ସବୁଠୁ ବଡ଼ ଦଳ ଭାବେ ଉଭା ହୋଇଥିଲେ ମଧ୍ୟ ଏପର୍ଯ୍ୟନ୍ତ ସରକାର ଗଠନ କରିପାରିନାହିଁ।

ବିଜୟ ଦୁଇଥର ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କୁ ଭେଟି ସରକାର ଗଠନ ପାଇଁ ଦାବି ଜଣାଇଥିଲେ। କିନ୍ତୁ ରାଜ୍ୟପାଳ ତାଙ୍କୁ ୧୧୮ ବିଧାୟକଙ୍କ ସମର୍ଥନ ଜୁଟାଇବା ପରେ ଆସିବାକୁ ପରାମର୍ଶ ଦେଇଥିବା ସୂଚନା ମିଳିଛି।

ଏପଟେ ଡିଏମ୍କେ ଓ ଏଆଇଏଡିଏମ୍କେ ମଧ୍ୟରେ ସରକାର ଗଠନକୁ ନେଇ ଭିତରିଆ ଆଲୋଚନା ଚାଲିଥିବା ନେଇ ରାଜନୈତିକ ମହଳରେ ଚର୍ଚ୍ଚା ଜୋର ଧରିଛି। ଯଦି ଏମ୍କେ ଷ୍ଟାଲିନଙ୍କ ଡିଏମ୍କେ ଓ ଇଡାପାଡ୍ଡି କେ ପଲାନିସ୍ୱାମୀଙ୍କ ଏଆଇଏଡିଏମ୍କେ ମିଶି ସରକାର ଗଠନ କରନ୍ତି, ତେବେ ଡିଏମ୍କେର କେତେକ ବିଧାୟକ ସାମୂହିକ ଇସ୍ତଫା ଦେଇପାରନ୍ତି ବୋଲି ମଧ୍ୟ ଚର୍ଚ୍ଚା ହେଉଛି।

ଟିଭିକେ ଦଳ ଭିତରେ ମଧ୍ୟ ହତାଶା ବଢ଼ୁଥିବା କୁହାଯାଉଛି। ଦଳର କର୍ମୀମାନେ ଅଭିଯୋଗ କରୁଛନ୍ତି ଯେ ଟିଭିକେକୁ ସରକାର ଗଠନରୁ ଦୂରେଇ ରଖିବା ପାଇଁ ଡିଏମ୍କେ ଓ ଏଆଇଏଡିଏମ୍କେ ଗୋପନୀୟ ବୁଝାମଣା କରୁଛନ୍ତି।

ଏପ୍ରିଲ ୨୩ରେ ହୋଇଥିବା ନିର୍ବାଚନରେ ଡିଏମ୍କେ ୫୯ଟି ଆସନ ଓ ଏଆଇଏଡିଏମ୍କେ ୪୭ଟି ଆସନ ଜିତିଥିଲା। ଏହି ପରିସ୍ଥିତିରେ ସରକାର ଗଠନ ପାଇଁ ଆବଶ୍ୟକ ସଂଖ୍ୟାଗରିଷ୍ଠତା ନେଇ ରାଜନୈତିକ ଗଣିତ ଜଟିଳ ହୋଇପଡ଼ିଛି।

ରାଜ୍ୟପାଳ ବିଜୟଙ୍କୁ ସରକାର ଗଠନ ପାଇଁ ସୁଯୋଗ ନ ଦେଇଥିବା ଅଭିଯୋଗ କରି କଂଗ୍ରେସ ଶୁକ୍ରବାର ରାଜ୍ୟବ୍ୟାପୀ ବିରୋଧ ପ୍ରଦର୍ଶନ କରିବାକୁ ଘୋଷଣା କରିଛି। ଅନ୍ୟପଟେ ବିଜେପିକୁ କ୍ଷମତାରୁ ଦୂରେଇ ରଖିବା ପାଇଁ ସିପିଆଇଏମ୍, ସିପିଆଇ ଓ ଭିସିକେ ମଧ୍ୟ ଆଲୋଚନା ଜାରି ରଖିଛନ୍ତି।

ତାମିଲନାଡୁରେ ଏବେ ସରକାର ଗଠନକୁ ନେଇ ରାଜନୈତିକ ଚଞ୍ଚଳତା ଚରମ ସୀମାକୁ ପହଞ୍ଚିଛି।