ଭାରତ ଓ ଆଫଗାନିସ୍ତାନ ମଧ୍ୟରେ ପ୍ରଥମ T20I ମ୍ୟାଚ୍‌କୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି। ଦିଲ୍ଲୀରେ ଚାଲିଥିବା BRICS ସମ୍ମିଳନୀ ଯୋଗୁଁ ସୁରକ୍ଷା ଓ ଟ୍ରାଫିକ୍ ବ୍ୟବସ୍ଥାକୁ ନେଇ ଦିଲ୍ଲୀ ପୋଲିସ ମ୍ୟାଚ୍‌କୁ ଗୋଟିଏ ଦିନ ପଛକୁ ଘୁଞ୍ଚାଇବାକୁ DDCAକୁ ଅନୁରୋଧ କରିଛି।

ଅରୁଣ ଜେଟଲୀ ଷ୍ଟାଡିୟମ୍‌ରେ ସେପ୍ଟେମ୍ବର ୧୩ରେ ମ୍ୟାଚ୍‌ ଖେଳାଯିବାର କାର୍ଯ୍ୟସୂଚୀ ରହିଛି। ଦିଲ୍ଲୀ ପୋଲିସର ଟ୍ରାଫିକ୍ ବିଭାଗ ପକ୍ଷରୁ DDCA ସଚିବଙ୍କୁ ପଠାଯାଇଥିବା ଚିଠିରେ BRICS ସମ୍ମିଳନୀ ସମୟରେ VVIP/VIP ରୁଟ୍‌, ଟ୍ରାଫିକ୍ ଡାଇଭର୍ସନ୍‌, ରୁଟ୍ କ୍ଲିୟରାନ୍ସ ଏବଂ ବହୁ ସଂଖ୍ୟକ ସୁରକ୍ଷାକର୍ମୀ ମୁତୟନର ଆବଶ୍ୟକତା ଥିବା କୁହାଯାଇଛି।

ଚିଠିରେ ଆହୁରି କୁହାଯାଇଛି ଯେ ମ୍ୟାଚ୍‌ ଦେଖିବା ପାଇଁ ପ୍ରାୟ ୨୫,୦୦୦ରୁ ୩୫,୦୦୦ ଦର୍ଶକ ଆସିବାର ଆଶା ରହିଛି। ଅରୁଣ ଜେଟଲୀ ଷ୍ଟାଡିୟମ୍‌, DDU ମାର୍ଗ, BSZ ମାର୍ଗ, ମିଣ୍ଟୋ ରୋଡ୍‌, କମଲା ମାର୍କେଟ୍‌ ଏବଂ ଆଖପାଖ ଅଞ୍ଚଳରେ ମ୍ୟାଚ୍‌ ଯୋଗୁଁ ଅତିରିକ୍ତ ଯାତାୟାତ ଓ ପାର୍କିଂ ଚାପ ବଢ଼ିପାରେ ବୋଲି ପୋଲିସ ଆଶଙ୍କା ପ୍ରକାଶ କରିଛି।

ତେବେ ଡିଡିସିଏ ଗୁରୁବାର ସନ୍ଧ୍ୟାରେ ସ୍ପଷ୍ଟ କରିଥିଲା ଯେ ମ୍ୟାଚ୍‌ ତାରିଖରେ କୌଣସି ପରିବର୍ତ୍ତନ ହୋଇନାହିଁ। DDCA ସୋସିଆଲ ମିଡିଆରେ କହିଛି ଯେ ସେପ୍ଟେମ୍ବର ୧୩ରେ ଅରୁଣ ଜେଟଲୀ ଷ୍ଟାଡିୟମ୍‌ରେ ଭାରତ-ଆଫଗାନିସ୍ତାନ ପ୍ରଥମ T20I ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ହେବ। ଦିଲ୍ଲୀ ଟ୍ରାଫିକ୍ ପୋଲିସ ସହ ବୈଠକ ପରେ ଆବଶ୍ୟକ ସହଯୋଗ ଓ ବ୍ୟବସ୍ଥା ପାଇଁ ଆଶ୍ୱାସନ ମିଳିଥିବା DDCA କହିଛି।

ଅନ୍ୟପକ୍ଷରେ, କିଛି ସୂତ୍ରର ଦାବି ଅନୁଯାୟୀ ମ୍ୟାଚ୍‌କୁ ଗୋଟିଏ ଦିନ ଘୁଞ୍ଚାଇ ସେପ୍ଟେମ୍ବର ୧୪ରେ ଖେଳାଇବା ପାଇଁ ଚାପ ରହିଛି। ଏହି ଦିନ ଗଣେଶ ଚତୁର୍ଥୀ ପଡ଼ୁଛି। ତେବେ ମ୍ୟାଚ୍‌ ତାରିଖ ବଦଳିବ କି ନାହିଁ, ଏନେଇ ଏପର୍ଯ୍ୟନ୍ତ ଚୂଡ଼ାନ୍ତ ନିଷ୍ପତ୍ତି ସାମ୍ନାକୁ ଆସିନାହିଁ।

ତିନି ମ୍ୟାଚ୍‌ ବିଶିଷ୍ଟ ସିରିଜ୍‌ର ଦ୍ୱିତୀୟ ଓ ତୃତୀୟ T20I ସେପ୍ଟେମ୍ବର ୧୫ ଓ ୧୭ରେ ଖେଳାଯିବାକୁ ରହିଛି। ମ୍ୟାଚ୍‌ ତାରିଖ ପରିବର୍ତ୍ତନ ନେଇ ଆଫଗାନିସ୍ତାନ କ୍ରିକେଟ୍ ବୋର୍ଡ (ACB) ପକ୍ଷରୁ ଏପର୍ଯ୍ୟନ୍ତ କୌଣସି ଅଧିକାରିକ ମତ ଆସିନାହିଁ।