ଶିଶୁମାନଙ୍କ ଇଣ୍ଟରନେଟ୍ ଓ ସୋସିଆଲ ମିଡିଆ ବ୍ୟବହାରକୁ ନେଇ ଚାଲିଥିବା ଚର୍ଚ୍ଚା ମଧ୍ୟରେ ସୁପ୍ରିମକୋର୍ଟ ଗୁରୁତ୍ୱପୂର୍ଣ୍ଣ ମତ ରଖିଛନ୍ତି। କୋର୍ଟ କହିଛନ୍ତି ଯେ ଇଣ୍ଟରନେଟ୍‌ରେ ପ୍ରବେଶ ଓ ଏହାକୁ ବ୍ୟବହାର କରିବାର ଅଧିକାର ସମସ୍ତଙ୍କର ମୌଳିକ ଅଧିକାର ଏବଂ ଏଥିରୁ ଶିଶୁମାନଙ୍କୁ ମଧ୍ୟ ବଞ୍ଚିତ କରାଯାଇପାରିବ ନାହିଁ। ଏହି ଅଧିକାର ସମ୍ବିଧାନର ଅନୁଚ୍ଛେଦ ୨୧ ଏବଂ ଅନୁଚ୍ଛେଦ ୧୯(୧)(a) ସହ ଜଡ଼ିତ ବୋଲି ବେଞ୍ଚ କହିଛନ୍ତି।

ଜଷ୍ଟିସ୍ ଜେ.ବି. ପାର୍ଦିୱାଲା ଏବଂ ଜଷ୍ଟିସ୍ କେ. ବିନୋଦ ଚନ୍ଦ୍ରନ୍ଙ୍କ ବେଞ୍ଚ କହିଛନ୍ତି ଯେ ଶିଶୁଙ୍କ ସୁରକ୍ଷା ଏବଂ ସେମାନଙ୍କ ସ୍ୱାଧୀନତା ପରସ୍ପର ବିରୋଧୀ ନୁହେଁ। ତେଣୁ ସୁରକ୍ଷା ନାମରେ ଶିଶୁଙ୍କ ଇଣ୍ଟରନେଟ୍ ବ୍ୟବହାର ଉପରେ ସମ୍ପୂର୍ଣ୍ଣ କିମ୍ବା blanket ban ଲଗାଇବା ସମାଧାନ ନୁହେଁ।

କୋର୍ଟଙ୍କ ମତରେ, ଇଣ୍ଟରନେଟ୍ କେବଳ ମନୋରଞ୍ଜନର ମାଧ୍ୟମ ନୁହେଁ; ଏହା ଶିକ୍ଷା, ସୂଚନା, ଚିନ୍ତାଧାରା ଓ ସୃଜନଶୀଳ ଅଭିବ୍ୟକ୍ତିର ଏକ ବଡ଼ ମାଧ୍ୟମ। ବିଶେଷକରି ଦୂରଦୂରାନ୍ତ ଅଞ୍ଚଳର ଅନେକ ଶିଶୁଙ୍କ ପାଇଁ ଇଣ୍ଟରନେଟ୍ ଶିକ୍ଷା ଓ ସୂଚନାର ଏକମାତ୍ର ଉତ୍ସ ହୋଇପାରେ। 

ସୁପ୍ରିମକୋର୍ଟ ଏହା ମଧ୍ୟ କହିଛନ୍ତି ଯେ ଶିଶୁଙ୍କୁ ସମ୍ପୂର୍ଣ୍ଣ ଭାବେ ଇଣ୍ଟରନେଟ୍‌ରୁ ଦୂରେଇ ରଖିଲେ ସେମାନେ ଅନ୍ୟ ଅନିୟନ୍ତ୍ରିତ ଓ ଅଧିକ ବିପଦପୂର୍ଣ୍ଣ ପ୍ଲାଟଫର୍ମକୁ ଯାଇପାରନ୍ତି। ଅନଲାଇନ୍ ଧମକ, ଶୋଷଣ କିମ୍ବା ହେରାସମେଣ୍ଟର ଶିକାର ହେଉଥିବା ଶିଶୁମାନେ ମଧ୍ୟ ଭୟରେ ଅଭିଭାବକଙ୍କୁ ଘଟଣା ଜଣାଇବାରୁ ଦୂରେଇପାରନ୍ତି। 

ତେବେ କୋର୍ଟ ଶିଶୁଙ୍କ ପାଇଁ ବୟସ୍ ଆଧାରିତ ସୁରକ୍ଷା ବ୍ୟବସ୍ଥାକୁ ସମ୍ପୂର୍ଣ୍ଣ ଖାରଜ କରିନାହାନ୍ତି। ଶିଶୁଙ୍କ ସୋସିଆଲ ମିଡିଆ ଆକାଉଣ୍ଟ ପାଇଁ ଅଭିଭାବକଙ୍କ ସମ୍ମତି ଓ ନଜରଦାରି, ଡିଫଲ୍ଟ ଭାବେ ପ୍ରାଇଭେଟ୍ ଆକାଉଣ୍ଟ, ଅଜଣା ବୟସ୍କଙ୍କ ମେସେଜ୍ ଉପରେ ନିୟନ୍ତ୍ରଣ ଏବଂ ‘Child Mode’ ଭଳି ବ୍ୟବସ୍ଥାର ସମ୍ଭାବନା କୋର୍ଟ ଉଲ୍ଲେଖ କରିଛନ୍ତି। ଏହାର ରୂପରେଖା ନିର୍ଦ୍ଧାରଣର ଦାୟିତ୍ୱ କେନ୍ଦ୍ର ସରକାରଙ୍କ ଉପରେ ଛାଡ଼ାଯାଇଛି।

ଅନ୍ୟପକ୍ଷରେ, ଶିଶୁ ଯୌନ ଶୋଷଣ ଓ ଦୁର୍ବ୍ୟବହାର ସମ୍ବନ୍ଧୀୟ ବିଷୟବସ୍ତୁ (CSEAM) ଚିହ୍ନଟ ଓ ହଟାଇବା ପାଇଁ ସୋସିଆଲ ମିଡିଆ ପ୍ଲାଟଫର୍ମ ଏବଂ ଅନ୍ୟ ଅନଲାଇନ୍ ସେବାର ବ୍ୟବସ୍ଥାକୁ ଆହୁରି ମଜବୁତ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।