କୋର୍ଟଙ୍କ ପୂର୍ବ ନିର୍ଦ୍ଦେଶ ପାଳନରେ ବିଫଳ ହେବା ଅଭିଯୋଗରେ ସୁପ୍ରିମକୋର୍ଟ କମେଡିଆନ୍ ସମୟ ରାଇନାଙ୍କ ଉପରେ କଡ଼ା ମନୋଭାବ ପ୍ରକାଶ କରିଛନ୍ତି। ମଙ୍ଗଳବାର ଶୁଣାଣି ସମୟରେ ସର୍ବୋଚ୍ଚ ଅଦାଲତ କହିଛନ୍ତି ଯେ, ସମୟ ରାଇନା କୋର୍ଟଙ୍କ ନିର୍ଦ୍ଦେଶକୁ ଉଲ୍ଲଂଘନ କରିଛନ୍ତି ଏବଂ ଅଦାଲତଙ୍କୁ ଭ୍ରମିତ କରିଛନ୍ତି।

ପ୍ରାରମ୍ଭରେ କୋର୍ଟ ତାଙ୍କ ଉପରେ ୧୦ ଲକ୍ଷ ଟଙ୍କା ଜରିମାନା ଲାଗୁ କରିଥିଲେ। ପରେ ତାଙ୍କ ଓକିଲଙ୍କ ଅନୁରୋଧ ଓ ଶେଷ ସୁଯୋଗ ଦେବା ପାଇଁ ଆବେଦନକୁ ବିଚାର କରି ଏହି ଜରିମାନାକୁ ୩ ଲକ୍ଷ ଟଙ୍କାକୁ କମାଇ ଦିଆଯାଇଛି।

ତେବେ ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ, ପରବର୍ତ୍ତୀ ଶୁଣାଣି ପୂର୍ବରୁ କୋର୍ଟଙ୍କ ନିର୍ଦ୍ଦେଶ ସଠିକ୍ ଭାବେ ପାଳନ ନ କରାଗଲେ ଜରିମାନାକୁ ୩୦ ଲକ୍ଷ ଟଙ୍କାକୁ ବୃଦ୍ଧି କରାଯିବ।

ଏହି ମାମଲାର ଆରମ୍ଭ ହୋଇଥିଲା ଦିବ୍ୟାଙ୍ଗ ବ୍ୟକ୍ତିଙ୍କ ପ୍ରତି ଆପତ୍ତିଜନକ ଓ ଅପମାନଜନକ ମନ୍ତବ୍ୟକୁ ନେଇ। 'ଇଣ୍ଡିଆଜ୍ ଗଟ୍ ଲାଟେଣ୍ଟ' କାର୍ଯ୍ୟକ୍ରମରେ ହୋଇଥିବା ଏଭଳି ମନ୍ତବ୍ୟ ପରେ ସୁପ୍ରିମକୋର୍ଟ ସମୟ ରାଇନାଙ୍କ ସହ ଅନ୍ୟ କିଛି କଣ୍ଟେଣ୍ଟ କ୍ରିଏଟରଙ୍କୁ ନୋଟିସ ଜାରି କରିଥିଲେ।

ପୂର୍ବ ନିର୍ଦ୍ଦେଶ ଅନୁଯାୟୀ, ସମୟ ରାଇନାଙ୍କୁ ପ୍ରତିମାସ ତାଙ୍କ ମଞ୍ଚରେ ଦିବ୍ୟାଙ୍ଗ ବ୍ୟକ୍ତିଙ୍କ ପ୍ରେରଣାଦାୟକ କାହାଣୀକୁ ନେଇ ଫଣ୍ଡ ରେଜିଂ କାର୍ଯ୍ୟକ୍ରମ ଆୟୋଜନ କରିବାକୁ କୁହାଯାଇଥିଲା। ଏହାକୁ ଦଣ୍ଡ ନୁହେଁ, ବରଂ ସାମାଜିକ ଦାୟିତ୍ୱ ବୋଲି ସୁପ୍ରିମକୋର୍ଟ ପୂର୍ବରୁ ସ୍ପଷ୍ଟ କରିଥିଲେ।

ମଙ୍ଗଳବାର ଶୁଣାଣିରେ କ୍ୟୁର୍ ଏସଏମଏ ଫାଉଣ୍ଡେସନ୍ ପକ୍ଷରୁ କୁହାଯାଇଥିଲା ଯେ କିଛି କାର୍ଯ୍ୟକ୍ରମ ହୋଇଥିଲେ ମଧ୍ୟ କୋର୍ଟଙ୍କ ନିର୍ଦ୍ଦେଶ ଅନୁଯାୟୀ ସଂସ୍ଥା ସହ ଯୋଗାଯୋଗ କରାଯାଇନଥିଲା। ଏହାକୁ ନେଇ ସୁପ୍ରିମକୋର୍ଟ ଅସନ୍ତୋଷ ପ୍ରକାଶ କରିଥିଲେ।