ପରିବେଶବିତ୍ ଓ ଶିକ୍ଷାବିଦ୍ ସୋନମ ୱାଙ୍ଗଚୁକଙ୍କ ଆମରଣ ଅନଶନ ଗୁରୁତର ପରିସ୍ଥିତିରେ ପହଞ୍ଚିଛି। ମଙ୍ଗଳବାର ତାଙ୍କ ଅନଶନ ୧୭ ଦିନରେ ପହଞ୍ଚିଥିବା ବେଳେ ସ୍ୱାସ୍ଥ୍ୟାବସ୍ଥା ଅବନତି ହେବାରେ ଲାଗିଛି।

କକ୍ରୋଚ୍ ଜନତା ପାର୍ଟି (ସିଜେପି) ପ୍ରତିଷ୍ଠାତା ଅଭିଜିତ ଦିପକେଙ୍କ ସୂଚନା ଅନୁଯାୟୀ, ଦୀର୍ଘ ସମୟ ଧରି ଅନଶନ କରିବା ଯୋଗୁଁ ୱାଙ୍ଗଚୁକଙ୍କ ମାଂସପେଶୀ ଦୁର୍ବଳ ହେବା ସହ ତାଙ୍କୁ ଅସହ୍ୟ ଯନ୍ତ୍ରଣା ହେଉଛି। ଏହା ସହିତ ତାଙ୍କ ଓଜନ ପ୍ରାୟ ୮.୨ କିଲୋଗ୍ରାମ କମିଥିବା ଜଣାପଡ଼ିଛି।

ଅନଶନ ଶେଷ କରିବାକୁ ଅନୁରୋଧ କରାଯାଇଥିଲେ ମଧ୍ୟ ସରକାର ଆଲୋଚନା ପାଇଁ ଆଗେଇ ଆସୁନଥିବା ନେଇ ୱାଙ୍ଗଚୁକ୍ ପ୍ରଶ୍ନ ଉଠାଇଛନ୍ତି।

ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଏବଂ ପରୀକ୍ଷା ଅନିୟମିତତା କାରଣରୁ ଆତ୍ମହତ୍ୟା କରିଥିବା ଛାତ୍ରଛାତ୍ରୀଙ୍କ ପରିବାରକୁ କ୍ଷତିପୂରଣ ଦାବିରେ ସିଜେପି ପକ୍ଷରୁ ଜୁନ୍ ୨୦ରୁ ଆନ୍ଦୋଳନ ଚାଲିଛି। ଜୁନ୍ ୨୮ରୁ ସୋନମ ୱାଙ୍ଗଚୁକ୍ ଏହି ଆନ୍ଦୋଳନରେ ସାମିଲ ହୋଇଥିଲେ।

ୱାଙ୍ଗଚୁକଙ୍କ ଆନ୍ଦୋଳନକୁ ବିଭିନ୍ନ ରାଜନୈତିକ ଦଳର ନେତାମାନେ ସମର୍ଥନ ଜଣାଇଛନ୍ତି। ଟିଏମସି ନେତ୍ରୀ ମହୁଆ ମୈତ୍ରା, ଆପ୍ ପ୍ରତିନିଧି ଦଳ, ପୂର୍ବତନ ଦିଲ୍ଲୀ ମୁଖ୍ୟମନ୍ତ୍ରୀ ଅତିଶୀ, ଶିବସେନା ନେତା ଉଦ୍ଧବ ଠାକରେ ଓ ସିପିଆଇ ସାଂସଦ ଅମରା ରାମ ପ୍ରମୁଖ ତାଙ୍କ ସ୍ୱାସ୍ଥ୍ୟ ଦୃଷ୍ଟିରୁ ଅନଶନ ପ୍ରତ୍ୟାହାର କରିବାକୁ ଅନୁରୋଧ କରିଛନ୍ତି।

ଆସନ୍ତା ଜୁଲାଇ ୨୦ରେ ସଂସଦର ମୌସୁମୀ ଅଧିବେଶନ ଆରମ୍ଭ ଦିନ ଜନ୍ତରମନ୍ତରରୁ ସଂସଦ ପର୍ଯ୍ୟନ୍ତ ଶାନ୍ତିପୂର୍ଣ୍ଣ ଶୋଭାଯାତ୍ରା କରିବାକୁ ସଂଗଠନ ପକ୍ଷରୁ ଘୋଷଣା କରାଯାଇଛି।