ଶୈଶବର ଏକ ଦୁର୍ଘଟଣା ଶିବ ମୁଣ୍ଡାଙ୍କ ଜୀବନକୁ ସବୁଦିନ ପାଇଁ ବଦଳାଇ ଦେଇଛି। ସାଙ୍ଗମାନଙ୍କ ସହ ଖେଳୁଥିବା ବେଳେ ଖୋଲା ପଡ଼ିଆରେ ପକାଯାଇଥିବା ଗରମ ପାଉଁଶ ଗଦାରେ ପଡ଼ିଯିବାରୁ ସେ ଗୁରୁତର ଭାବେ ପୋଡ଼ିଯାଇଥିଲେ। ଡାକ୍ତରମାନେ ତାଙ୍କ ଜୀବନ ବଞ୍ଚାଇବା ପାଇଁ ଉଭୟ ଗୋଡ଼ ଏବଂ ଗୋଟିଏ ହାତ କାଟିବାକୁ ବାଧ୍ୟ ହୋଇଥିଲେ।
ଘଟଣାକୁ ୧୨ ବର୍ଷ ବିତିଯାଇଥିଲେ ମଧ୍ୟ ଶିବ ଏବେ ବି ନ୍ୟାୟ, ପୁନର୍ବାସ ଏବଂ ସହାୟତାର ଅପେକ୍ଷାରେ ରହିଛନ୍ତି। ବର୍ତ୍ତମାନ ସେ ବିବାହିତ ଏବଂ ଜଣେ ସନ୍ତାନର ପିତା। ଦିବ୍ୟାଙ୍ଗତା କାରଣରୁ କୌଣସି ରୋଜଗାର କରିପାରୁ ନଥିବାରୁ ତାଙ୍କ ପତ୍ନୀ ପରିବାରର ଭରଣପୋଷଣ କରୁଛନ୍ତି, ଯେତେବେଳେ ଶିବ ଘରେ ରହି ସନ୍ତାନର ଯତ୍ନ ନେଉଛନ୍ତି।
ଶିବ ଏବଂ ତାଙ୍କ ପରିବାରର ଅଭିଯୋଗ ଅନୁଯାୟୀ, ଘଟଣା ପରେ ସମ୍ପୃକ୍ତ କମ୍ପାନି ପ୍ରାରମ୍ଭିକ ଚିକିତ୍ସା ଖର୍ଚ୍ଚ ବହନ କରିବା ସହ କିଛି ମାସ ପର୍ଯ୍ୟନ୍ତ ପ୍ରତିମାସ ୧,୫୦୦ ଟଙ୍କା ଆର୍ଥିକ ସହାୟତା ଦେଇଥିଲା। କିନ୍ତୁ ଛଅ ମାସ ପରେ ସେହି ସହାୟତା ବନ୍ଦ ହୋଇଯାଇଥିଲା। ବାରମ୍ବାର ଅନୁରୋଧ କରିଥିଲେ ମଧ୍ୟ କୌଣସି ସହଯୋଗ ମିଳିନଥିବା ସେମାନେ ଅଭିଯୋଗ କରିଛନ୍ତି।
ପରିବାର ପକ୍ଷରୁ ଆହୁରି ଦାବି କରାଯାଇଛି ଯେ, ଖୋଲାରେ ପକାଯାଉଥିବା ଗରମ ପାଉଁଶ ଯୋଗୁଁ ପୂର୍ବରୁ ମଧ୍ୟ ଅନେକ ଦୁର୍ଘଟଣା ଘଟିଛି, ଯେଉଁଥିରେ ମଣିଷ ଓ ପଶୁପକ୍ଷୀ କ୍ଷତିଗ୍ରସ୍ତ ହୋଇଛନ୍ତି।
ଏହି ଘଟଣା ଗଣମାଧ୍ୟମରେ ପ୍ରକାଶ ପାଇବା ପରେ ବଣାଇ ଉପଜିଲ୍ଲାପାଳ ଅଶୋକ କୁମାର ଦାସ କହିଛନ୍ତି ଯେ, ପ୍ରଶାସନ ଘଟଣାର ସମୀକ୍ଷା କରିବ। କମ୍ପାନିର ମାଲିକାନା ବଦଳିଥିବାରୁ ବର୍ତ୍ତମାନର ମାଲିକଙ୍କ ସହ ଆଲୋଚନା କରାଯିବ ଏବଂ ଶିବଙ୍କୁ କିପରି ସହାୟତା ଯୋଗାଇ ହେବ ସେନେଇ ପଦକ୍ଷେପ ନିଆଯିବ।
ସେ ଆହୁରି କହିଛନ୍ତି ଯେ, ସରକାରୀ ସ୍ତରରେ ମିଳୁଥିବା ସମସ୍ତ ସୁବିଧା ଶିବଙ୍କୁ ଦିଆଯାଉଛି। ଏହା ବ୍ୟତୀତ କୃତ୍ରିମ ହାତ ଓ ଗୋଡ଼ ଯୋଗାଇବା ପାଇଁ ଜିଲ୍ଲା ସମାଜ ସୁରକ୍ଷା ଅଧିକାରୀ (DSSO)ଙ୍କ ସହ ସମନ୍ୱୟ କରାଯାଉଛି।
ଉପଜିଲ୍ଲାପାଳ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ୪୦ ପ୍ରତିଶତରୁ ଅଧିକ ଦିବ୍ୟାଙ୍ଗତା ଥିବା ବ୍ୟକ୍ତି ବିବାହ କରିଥିଲେ ସରକାରଙ୍କ ପକ୍ଷରୁ ଆର୍ଥିକ ସହାୟତାର ବ୍ୟବସ୍ଥା ରହିଛି। ବିବାହର ଏକ ବର୍ଷ ମଧ୍ୟରେ ଆବେଦନ କଲେ ଯାଞ୍ଚ ପରେ ସେହି ସହାୟତା ପ୍ରଦାନ କରାଯିବ।
ଦୀର୍ଘ ୧୨ ବର୍ଷର ଅପେକ୍ଷା ପରେ ମଧ୍ୟ ଶିବ ମୁଣ୍ଡା ଆଶା ଛାଡ଼ିନାହାନ୍ତି। ନ୍ୟାୟ ଏବଂ ସମ୍ମାନଜନକ ଜୀବନ ପାଇଁ ତାଙ୍କର ସଂଘର୍ଷ ଆଜି ବି ଜାରି ରହିଛି।
ଟାଟା ମାଲିକାନାଧୀନJaguar Land Rover (JLR)ବ୍ରିଟେନ୍ରେ...
ମେଷ ଏହି ସପ୍ତାହରେ ଆତ୍ମବିଶ୍ୱାସ ବଢ଼ିବ। କାର୍ଯ୍ୟକ୍ଷେ...
ବୀମା ପଲିସି କିଣିବା ପରେ ଅନେକ ଲୋକଙ୍କ ପାଇଁ ସବୁଠୁ ବଡ଼ ସ...
ମାରୁତି ସୁଜୁକି କାର୍ କିଣିବାକୁ ଯୋଜନା କରୁଥିବା ଗ୍ରାହକଙ୍...
ଗୁରୁଗ୍ରାମରDLF Primus ପ୍ରକଳ୍ପକୁ ନେଇ ସୁପ୍ରିମକୋର୍ଟ କଡ...
ଉତ୍ତରପ୍ରଦେଶରେ ଶ୍ରମିକ ଓ ଅନ୍ୟାନ୍ୟ ଦୁର୍ବଳ ପରିବାରର ପିଲ...
