ଭାରତୀୟ ଷ୍ଟେଟ୍ ବ୍ୟାଙ୍କ (ଏସ୍‌ବିଆଇ), ପଞ୍ଜାବ ନ୍ୟାସନାଲ ବ୍ୟାଙ୍କ (ପିଏନ୍‌ବି) ଏବଂ କାନାରା ବ୍ୟାଙ୍କର ମିଶ୍ରଣ ହେବାକୁ ଯାଉଛି ବୋଲି ସୋସିଆଲ ମିଡିଆରେ ପ୍ରଚାରିତ ହେଉଥିବା ଖବରକୁ କେନ୍ଦ୍ର ସରକାର ଖଣ୍ଡନ କରିଛନ୍ତି। ସରକାର ଏହାକୁ ସମ୍ପୂର୍ଣ୍ଣ ଭ୍ରମାତ୍ମକ ଏବଂ ଗୁଜବ ବୋଲି ସ୍ପଷ୍ଟ କରିଛନ୍ତି।

ପିଆଇବି ଫ୍ୟାକ୍ଟ ଚେକ୍ (PIB Fact Check) ପକ୍ଷରୁ ଜାରି ସୂଚନାରେ କୁହାଯାଇଛି ଯେ, ଏସ୍‌ବିଆଇ, ପିଏନ୍‌ବି ଏବଂ କାନାରା ବ୍ୟାଙ୍କର ମିଶ୍ରଣ ସମ୍ପର୍କିତ କୌଣସି ପ୍ରସ୍ତାବକୁ କେନ୍ଦ୍ର ସରକାର ଅନୁମୋଦନ କରିନାହାନ୍ତି।

ପିଆଇବି କହିଛି, ସୋସିଆଲ ମିଡିଆରେ ଏକ ଖବରକାଗଜର କଟିଂ ଭାବେ ଯାହା ପ୍ରଚାର କରାଯାଉଛି, ତାହା ଭ୍ରମ ସୃଷ୍ଟି କରିବା ଉଦ୍ଦେଶ୍ୟରେ ପ୍ରସ୍ତୁତ କରାଯାଇଛି। ଏହା କୌଣସି ପ୍ରତିଷ୍ଠିତ କିମ୍ବା ଚର୍ଚ୍ଚିତ ସମ୍ବାଦପତ୍ରର ପ୍ରକାଶିତ ଖବର ନୁହେଁ।

ସରକାରଙ୍କ ପକ୍ଷରୁ ମଧ୍ୟ ଏଭଳି କୌଣସି ଘୋଷଣା କିମ୍ବା ସୂଚନା ଜାରି କରାଯାଇନାହିଁ। ତେଣୁ ଲୋକମାନଙ୍କୁ ସୋସିଆଲ ମିଡିଆରେ ପ୍ରଚାରିତ ଏଭଳି ଅପ୍ରମାଣିତ ଖବରକୁ ବିଶ୍ୱାସ ନ କରିବାକୁ ପରାମର୍ଶ ଦିଆଯାଇଛି।

ପିଆଇବି ଫ୍ୟାକ୍ଟ ଚେକ୍ ଆହୁରି କହିଛି ଯେ, ଯଦି କେହି ଏଭଳି ସନ୍ଦେହଜନକ କିମ୍ବା ଭ୍ରମାତ୍ମକ ସୂଚନା ଦେଖନ୍ତି, ତେବେ ତୁରନ୍ତ PIB Fact Check ମାଧ୍ୟମରେ ଏହାର ସତ୍ୟତା ଯାଞ୍ଚ କରନ୍ତୁ ଏବଂ ଭୁଲ ଖବର ପ୍ରଚାରରୁ ଦୂରେଇ ରୁହନ୍ତୁ।