ଭୁବନେଶ୍ୱରର ଲିଙ୍ଗରାଜ ଥାନା ଅନ୍ତର୍ଗତ ସାମନ୍ତରାୟପୁର ଅଞ୍ଚଳରେ ବୋହୂକୁ ଶ୍ୱଶୁର ଘରେ ରଖିବାକୁ ନେଇ ହୋଇଥିବା ବିବାଦ ରକ୍ତାକ୍ତ କାଣ୍ଡର ରୂପ ନେଇଛି। ସୋମବାର ଦିନ ଦ୍ୱିପ୍ରହରରେ ଘଟିଥିବା ଏହି ଘଟଣାରେ ଦୀପକ ନାମକ ଜଣେ ଯୁବକ କଟୁରୀ ଆକ୍ରମଣରେ ଗୁରୁତର ଆହତ ହୋଇଛନ୍ତି।

ସୂଚନା ଅନୁଯାୟୀ, ଜଣେ ମହିଳା ଶ୍ୱଶୁର ଘରକୁ ଫେରିବାକୁ ଅମଙ୍ଗ ହେବାରୁ ତାଙ୍କୁ ବୁଝାସୁଝା କରିବା ପାଇଁ ଶ୍ୱଶୁର ଘର ଲୋକେ ଚେଷ୍ଟା କରୁଥିଲେ। ଏହି ସମୟରେ ମହିଳା କାମ କରୁଥିବା ସଂସ୍ଥାରେ ବଚସା ସୃଷ୍ଟି ହୋଇଥିଲା।

ଖବର ପାଇ ସଂସ୍ଥାର ମାଲିକ ଦୀପକ ଘଟଣାସ୍ଥଳରେ ପହଞ୍ଚି ମହିଳା ଓ ତାଙ୍କ ପରିବାର ଲୋକଙ୍କୁ ବୁଝାଇବାକୁ ଉଦ୍ୟମ କରିଥିଲେ। ତେବେ ଏହି ସମୟରେ ମହିଳାଙ୍କ ଶ୍ୱଶୁରଙ୍କୁ ସେ ଧକ୍କା ଦେଇଥିବା ଅଭିଯୋଗ ହୋଇଛି। ଏହାକୁ କେନ୍ଦ୍ର କରି ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇପଡ଼ିଥିଲା।

ଅଭିଯୋଗ ଅନୁଯାୟୀ, ମହିଳାଙ୍କ ଶ୍ୱଶୁର କଟୁରୀରେ ଦୀପକଙ୍କୁ ଆକ୍ରମଣ କରିଥିଲେ। ଏଥିସହ ତାଙ୍କ ପୁଅ ଅର୍ଥାତ ଉକ୍ତ ମହିଳାଙ୍କ ସ୍ୱାମୀଙ୍କୁ ମଧ୍ୟ ଆକ୍ରମଣ କରାଯାଇଥିବା ଅଭିଯୋଗ ହୋଇଛି। ଆକ୍ରମଣରେ ଦୀପକ ଗୁରୁତର ଆହତ ହୋଇଥିବାବେଳେ ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି।

ଘଟଣାର ସୂଚନା ପାଇ ଲିଙ୍ଗରାଜ ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ସାଇଣ୍ଟିଫିକ ଟିମ୍ ମଧ୍ୟ କ୍ରାଇମ୍ ସିନ୍ରୁ ବିଭିନ୍ନ ପ୍ରମାଣ ସଂଗ୍ରହ କରୁଛି। ପୁଲିସ ଘଟଣାର ସମସ୍ତ ଦିଗକୁ ନେଇ ତଦନ୍ତ ଚଳାଇଥିବାବେଳେ ଆକ୍ରମଣ ପଛରେ ଥିବା ପ୍ରକୃତ କାରଣ ଏବଂ ଦୋଷୀଙ୍କ ବିରୋଧରେ ଆଇନଗତ ପଦକ୍ଷେପ ନେବା ପ୍ରକ୍ରିୟା ଜାରି ରହିଛି।