ବିଶ୍ୱର ଅନ୍ୟତମ ବଡ଼ ଅଶୋଧିତ ତୈଳ ଉତ୍ପାଦନକାରୀ ଦେଶ ରୁଷ ବର୍ତ୍ତମାନ ଗୁରୁତର ଇନ୍ଧନ ସଙ୍କଟର ସମ୍ମୁଖୀନ ହୋଇଛି। ଦେଶର ଅଶୋଧିତ ତୈଳ ଭଣ୍ଡାର ବିପୁଳ ଥିଲେ ମଧ୍ୟ, ତୈଳ ବିଶୋଧନ ଭିତ୍ତିଭୂମି ଉପରେ ଲଗାତାର ଆକ୍ରମଣ ଯୋଗୁଁ ପେଟ୍ରୋଲ ଓ ଡିଜେଲ ଉତ୍ପାଦନ ପ୍ରଭାବିତ ହୋଇଛି।

ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନ ଏକ ସାକ୍ଷାତକାରରେ ସ୍ୱୀକାର କରିଛନ୍ତି ଯେ, ୟୁକ୍ରେନ ସହ ଚାଲିଥିବା ଯୁଦ୍ଧ ସମୟରେ ବାରମ୍ବାର ତୈଳ ଓ ଗ୍ୟାସ୍ ଭିତ୍ତିଭୂମି ଉପରେ ହୋଇଥିବା ଆକ୍ରମଣ କାରଣରୁ ଦେଶରେ ଇନ୍ଧନ ଅଭାବ ସୃଷ୍ଟି ହୋଇଛି। ୟୁକ୍ରେନୀୟ ଡ୍ରୋନ୍ ଆକ୍ରମଣ ଯୋଗୁଁ ଅନେକ ରିଫାଇନାରୀର କାର୍ଯ୍ୟକ୍ଷମତା କମିଯାଇଛି, ଫଳରେ ଅଶୋଧିତ ତୈଳ ଥିଲେ ମଧ୍ୟ ତାହାକୁ ପରିଶୋଧନ କରିବାରେ ସମସ୍ୟା ଦେଖାଦେଇଛି।

ରିପୋର୍ଟ ଅନୁସାରେ, ରୁଷର ପେଟ୍ରୋଲ ଭଣ୍ଡାର ପ୍ରାୟ ୧.୭ ମିଲିୟନ ମେଟ୍ରିକ୍ ଟନ୍କୁ ହ୍ରାସ ପାଇଛି। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ରୁଷ ପୂର୍ବରୁ ପେଟ୍ରୋଲ ଓ ଡିଜେଲ ରପ୍ତାନି ଉପରେ କିଛି ପ୍ରତିବନ୍ଧକ ଲାଗୁ କରିଛି।

ଏହି ସଙ୍କଟ ଦୂର କରିବା ପାଇଁ ରୁଷ ପଡ଼ୋଶୀ କାଜାଖସ୍ତାନଠାରୁ ସହାୟତା ଚାହିଁଛି। ରିପୋର୍ଟ ଅନୁଯାୟୀ, ରୁଷ ପ୍ରାୟ ୫୦,୦୦୦ ଟନ୍ ପେଟ୍ରୋଲ ଆମଦାନି କରିବାକୁ ଯୋଜନା କରିଛି। ତେବେ କାଜାଖସ୍ତାନ ଏହାକୁ ନେଇ ସତର୍କ ରହିଛି, କାରଣ ଏପରି ପଦକ୍ଷେପ ତାହାର ରିଫାଇନାରୀକୁ ମଧ୍ୟ ସୁରକ୍ଷା ଝୁମ୍ପରେ ପକାଇପାରେ ବୋଲି ଆଶଙ୍କା କରାଯାଉଛି।

ଏପଟେ ଭାରତ ରୁଷୀୟ ଅଶୋଧିତ ତୈଳର ଏକ ପ୍ରମୁଖ କ୍ରେତା ଭାବେ ରହିଆସିଛି। ଭାରତ ରୁଷରୁ ଆମଦାନି କରୁଥିବା ଅଶୋଧିତ ତୈଳକୁ ନିଜ ରିଫାଇନାରୀରେ ପରିଶୋଧନ କରି ବିଭିନ୍ନ ଦେଶକୁ ପେଟ୍ରୋଲ ଓ ଅନ୍ୟ ଇନ୍ଧନ ଉତ୍ପାଦ ରପ୍ତାନି କରୁଛି। ବର୍ତ୍ତମାନ ଘରୋଇ ଚାହିଦା ପୂରଣ ପାଇଁ ରୁଷ ଭାରତରୁ ପେଟ୍ରୋଲ ଆମଦାନି ବଢ଼ାଇବା ଉପରେ ବିଚାର କରୁଥିବା ଜଣାପଡ଼ିଛି।

ରିପୋର୍ଟ ଅନୁଯାୟୀ, ୟୁକ୍ରେନୀୟ ଆକ୍ରମଣ ପରେ ରୁଷର ତୈଳ ବିଶୋଧନ କ୍ଷମତା ପ୍ରାୟ ୨୫ ପ୍ରତିଶତ ହ୍ରାସ ପାଇଛି। ବର୍ତ୍ତମାନ ଦେଶର ରିଫାଇନାରୀଗୁଡ଼ିକ ଦୈନିକ ପ୍ରାୟ ୮୫,୦୦୦ ଟନ୍ ପେଟ୍ରୋଲ ଉତ୍ପାଦନ କରୁଥିବାବେଳେ ଘରୋଇ ଚାହିଦା ପୂରଣ ପାଇଁ ପ୍ରତିଦିନ ପ୍ରାୟ ୧୧୧,୦୦୦ ଟନ୍ ପେଟ୍ରୋଲ ଆବଶ୍ୟକ ହେଉଛି। ଏହି ଅଭାବ ପୂରଣ ପାଇଁ ରୁଷ ବିକଳ୍ପ ଯୋଗାଣ ବ୍ୟବସ୍ଥା ଖୋଜୁଛି।