ଭାରତରେ ଉଦ୍ଧାର ହୋଇଥିବା ସୁମାତ୍ରାନ୍ ଓରାଙ୍ଗଉଟା ‘ରକି’ ଶେଷରେ ନିଜ ଦେଶ ଇଣ୍ଡୋନେସିଆ ଫେରିଛି। ମହାରାଷ୍ଟ୍ରର ଡୋମ୍ବିଭଲି ଅଞ୍ଚଳରୁ ୨୦୨୪ରେ ଉଦ୍ଧାର ହୋଇଥିବା ଏହି ଓରାଙ୍ଗଉଟାନକୁ ଦୀର୍ଘ ସମୟ ଧରି ଭାରତରେ ଚିକିତ୍ସା ଓ ଯତ୍ନରେ ରଖାଯାଇଥିଲା।

୨୦୨୪ରେ ଥାନେ ଜିଲ୍ଲାର ଡୋମ୍ବିଭଲିର ଏକ ଆବାସିକ ପରିସରରୁ ଏହି ଓରାଙ୍ଗଉଟାନକୁ ବନ ବିଭାଗ ଉଦ୍ଧାର କରିଥିଲା। ପରେ ଏହାକୁ ଭାରତରେ ଥିବା ବନ୍ୟଜନ୍ତୁ ସୁରକ୍ଷା ଓ ପୁନର୍ବାସ ବ୍ୟବସ୍ଥା ଅଧୀନରେ ରଖାଯାଇଥିଲା। ୨୦୨୫ରୁ ଏହା ଗୁଜରାଟର ବନ୍ତାରାରେ ଯତ୍ନରେ ଥିଲା।

ଭାରତ ଓ ଇଣ୍ଡୋନେସିଆର ବନ୍ୟଜନ୍ତୁ ସୁରକ୍ଷା ସଂସ୍ଥା ଏବଂ CITES ପରିଚାଳନା କର୍ତ୍ତୃପକ୍ଷଙ୍କ ସମନ୍ୱୟରେ ରକିର ପ୍ରତ୍ୟାବର୍ତ୍ତନ ସମ୍ଭବ ହୋଇଛି। ଗୁଜରାଟରୁ ତାକୁ ଇଣ୍ଡୋନେସିଆ ପଠାଯାଇଥିଲା ଏବଂ ସୋମବାର ମେଡାନର କୁଆଲାନାମୁ ଆନ୍ତର୍ଜାତୀୟ ବିମାନବନ୍ଦରରେ ସେ ପହଞ୍ଚିଥିଲା। ସେଠାରେ ଇଣ୍ଡୋନେସିଆର ଜଙ୍ଗଲ ମନ୍ତ୍ରାଳୟ ପକ୍ଷରୁ ତାକୁ ସ୍ୱାଗତ କରାଯାଇଥିଲା।

ବିଶେଷ କଥା ହେଉଛି, ରକିର ଯତ୍ନ ଓ ରକ୍ଷଣାବେକ୍ଷଣରେ ଭାରତରେ ହୋଇଥିବା ପୂର୍ବ ଖର୍ଚ୍ଚକୁ ଭାରତ ସରକାର ଛାଡ଼ କରିଛନ୍ତି। ଏହା ଭାରତ-ଇଣ୍ଡୋନେସିଆ ମଧ୍ୟରେ ବନ୍ୟଜନ୍ତୁ ସୁରକ୍ଷା ସହଯୋଗର ଏକ ଉଲ୍ଲେଖନୀୟ ଉଦାହରଣ ବୋଲି ଦେଖାଯାଉଛି।

ଏବେ ଓଡ଼ିଶାର ୫ ଓରାଙ୍ଗଉଟାଙ୍କ ପାଳି?

ରକିର ଇଣ୍ଡୋନେସିଆ ପ୍ରତ୍ୟାବର୍ତ୍ତନ ପରେ ଏବେ ଓଡ଼ିଶାରେ ଉଦ୍ଧାର ହୋଇଥିବା ୫ଟି ଓରାଙ୍ଗଉଟାନଙ୍କ ଭବିଷ୍ୟତକୁ ନେଇ ଆଗ୍ରହ ବଢ଼ିଛି। ଏହି ୫ଟି ଓରାଙ୍ଗଉଟାନ ବର୍ତ୍ତମାନ ଭୁବନେଶ୍ୱରସ୍ଥିତନନ୍ଦନକାନନ ଜୁଲୋଜିକାଲ ପାର୍କରେ ଯତ୍ନରେ ରହିଛନ୍ତି।

ସେମାନଙ୍କ ପ୍ରଜାତି ଏବଂ ମୂଳ ସ୍ଥାନ ସମ୍ପର୍କରେ ନିଶ୍ଚିତତା ପାଇବା ପରେ ପ୍ରତ୍ୟାବର୍ତ୍ତନ ପ୍ରକ୍ରିୟା ଆଗକୁ ବଢ଼ିବ। ଏଥିପାଇଁ ଇଣ୍ଡୋନେସିଆର ଜଙ୍ଗଲ ମନ୍ତ୍ରାଳୟର ବନ୍ୟଜନ୍ତୁ ବିଶେଷଜ୍ଞମାନେନଭେମ୍ବର ୨୦୨୬ରେ ଭାରତ ଗସ୍ତ କରିବାର ଯୋଜନାରହିଛି। ସେମାନଙ୍କ ଯାଞ୍ଚ, ପ୍ରଜାତି ଓ ମୂଳସ୍ଥାନ ନିର୍ଣ୍ଣୟ ଏବଂ ଆବଶ୍ୟକ ଆଇନଗତ ପ୍ରକ୍ରିୟା ପରେ ଓଡ଼ିଶାର ୫ ଓରାଙ୍ଗଉଟାନଙ୍କ ପ୍ରତ୍ୟାବର୍ତ୍ତନ ନେଇ ପରବର୍ତ୍ତୀ ପଦକ୍ଷେପ ନିଆଯିବ।