ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ବିଦେଶ ଯାତ୍ରା ସମୟରେ IAF ବିମାନ ବ୍ୟବହାର ସମ୍ପର୍କିତ ବିସ୍ତୃତ ରେକର୍ଡ ପ୍ରକାଶ ନକରିବାକୁ ଭାରତୀୟ ବାୟୁସେନାର ନିଷ୍ପତ୍ତିକୁ ଦିଲ୍ଲୀ ହାଇକୋର୍ଟ ସମର୍ଥନ କରିଛନ୍ତି। ଏହା ସହିତ Central Information Commission (CIC) ପୂର୍ବରୁ ଦେଇଥିବା ତଥ୍ୟ ପ୍ରକାଶ ନିର୍ଦ୍ଦେଶକୁ କୋର୍ଟ ରଦ୍ଦ କରିଛନ୍ତି।

ଜଷ୍ଟିସ୍ ଅମିତ ମହାଜନଙ୍କ ଖଣ୍ଡପୀଠ କହିଛନ୍ତି ଯେ କେବଳ ସୁରକ୍ଷାକର୍ମୀଙ୍କ ନାମ ଓ ପରିଚୟ ସମ୍ପର୍କିତ ତଥ୍ୟ ହଟାଇଦେଲେ ମଧ୍ୟ ରେକର୍ଡରେ ଥିବା ଅନ୍ୟ ସୂଚନା ପ୍ରକାଶ ଦ୍ୱାରା ସୁରକ୍ଷା ଝୁମ୍ପ ସମ୍ପୂର୍ଣ୍ଣ ଦୂର ହେବ ନାହିଁ।

ଏହି ମାମଲାର ମୂଳରେ ରହିଛି ଜଣେ ଅବସରପ୍ରାପ୍ତ ନୌସେନା ଅଧିକାରୀକମୋଡୋର ଲୋକେଶ କେ. ବାତ୍ରାଙ୍କ RTI ଆବେଦନ। ୫ ଜୁନ୍ ୨୦୧୮ରେ ସେ ୧ ଏପ୍ରିଲ୍ ୨୦୧୩ଠାରୁ ପ୍ରଧାନମନ୍ତ୍ରୀଙ୍କ IAF ବିମାନରେ କରିଥିବା ବିଦେଶ ଯାତ୍ରା ସମ୍ପର୍କିତ ତଥ୍ୟ ମାଗିଥିଲେ।

ବାତ୍ରା ବିଶେଷ ଭାବେSpecial Flight Returns (SFR) Part-I ଓ Part-IIର ରେକର୍ଡ ମାଗିଥିଲେ। ଏଥିରେ ବିମାନ, କ୍ରୁ, ଯାତ୍ରୀ ଏବଂ ପ୍ରଧାନମନ୍ତ୍ରୀଙ୍କ ସହ ଯାଉଥିବା ସୁରକ୍ଷା ବ୍ୟବସ୍ଥା ସମ୍ପର୍କିତ ବିଭିନ୍ନ ତଥ୍ୟ ଥାଇପାରେ।

IAF ପକ୍ଷରୁ କିଛି ସାଧାରଣ ତଥ୍ୟ ଦିଆଯାଇଥିଲେ ମଧ୍ୟ Special Flight Returnsର ସମ୍ପୂର୍ଣ୍ଣ କପି ଦେବାକୁ ମନା କରାଯାଇଥିଲା। ବାୟୁସେନାର ଯୁକ୍ତି ଥିଲା ଯେ ଏହି ରେକର୍ଡରେ ବିମାନ, ଏୟାରକ୍ରୁ, ଯାତ୍ରୀ ଓSpecial Protection Group (SPG)ସଦସ୍ୟଙ୍କ ସମ୍ପର୍କିତ ସମ୍ବେଦନଶୀଳ ତଥ୍ୟ ରହିଛି। ଏହା ପ୍ରକାଶ ପାଇଲେ ପ୍ରଧାନମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥା ସମ୍ପର୍କରେ ଅନୁମାନ କରିହେବ ବୋଲି IAF କହିଥିଲା।

CIC ଦେଇଥିଲା ତଥ୍ୟ ପ୍ରକାଶ ନିର୍ଦ୍ଦେଶ

ପ୍ରଥମ ଅପିଲ୍ କର୍ତ୍ତୃପକ୍ଷଙ୍କ ନିଷ୍ପତ୍ତି ପରେ ବାତ୍ରା CICର ଦ୍ୱାରସ୍ଥ ହୋଇଥିଲେ। ଜୁଲାଇ ୨୦୨୦ରେ CIC, ସୁରକ୍ଷାକର୍ମୀଙ୍କ ନାମ ଓ ପରିଚୟ ସମ୍ପର୍କିତ ତଥ୍ୟ ହଟାଇ, ଉପଲବ୍ଧ SFR-II ରେକର୍ଡର ପ୍ରମାଣିତ କପି ଦେବାକୁ IAFକୁ ନିର୍ଦ୍ଦେଶ ଦେଇଥିଲା। ପରେ IAF ଏହି ଆଦେଶକୁ ଦିଲ୍ଲୀ ହାଇକୋର୍ଟରେ ଚ୍ୟାଲେଞ୍ଜ କରିଥିଲା।

ହାଇକୋର୍ଟ କହିଛନ୍ତି ଯେRTI ଅଧିକାର ସମ୍ପୂର୍ଣ୍ଣ ନିରପେକ୍ଷ ନୁହେଁ। ଜାତୀୟ ସୁରକ୍ଷା ଓ ବ୍ୟକ୍ତିଙ୍କ ଜୀବନ କିମ୍ବା ଶାରୀରିକ ସୁରକ୍ଷା ସହ ଜଡ଼ିତ ସୂଚନାକୁ RTI Actର Section 8(1)(a) ଓ 8(1)(g) ଅନୁସାରେ ପ୍ରକାଶରୁ ବାଦ ଦିଆଯାଇପାରେ।

କୋର୍ଟଙ୍କ ମତରେ, ସୁରକ୍ଷା ଦାୟିତ୍ୱରେ ଥିବା ସକ୍ଷମ କର୍ତ୍ତୃପକ୍ଷ ଯଦି ରେକର୍ଡ ପ୍ରକାଶ କରିବା ଦ୍ୱାରା ଜାତୀୟ ସୁରକ୍ଷା କିମ୍ବା ପ୍ରଧାନମନ୍ତ୍ରୀଙ୍କ ସୁରକ୍ଷା ବିପଦରେ ପଡ଼ିପାରେ ବୋଲି ନିଷ୍କର୍ଷରେ ପହଞ୍ଚିଛନ୍ତି, ତେବେ ସେହି ସୁରକ୍ଷା ମୂଲ୍ୟାଙ୍କନକୁ ସହଜରେ ଅଣଦେଖା କରାଯାଇପାରିବ ନାହିଁ।

କାହିଁକି ରେକର୍ଡ ପ୍ରକାଶ ହେବ ନାହିଁ?

IAFର ଯୁକ୍ତି ଅନୁସାରେ, ରେକର୍ଡରେ ଥିବା ବିଭିନ୍ନ ତଥ୍ୟକୁ ଏକାଠି କଲେ ପ୍ରଧାନମନ୍ତ୍ରୀଙ୍କ ସହ ଯାତ୍ରା କରୁଥିବା ଲୋକଙ୍କ ପରିଚୟ, ସୁରକ୍ଷାକର୍ମୀଙ୍କ ଉପସ୍ଥିତି ଏବଂ ସୁରକ୍ଷା ବ୍ୟବସ୍ଥାର କିଛି ଢାଞ୍ଚା ସମ୍ପର୍କରେ ଅନୁମାନ କରିହେବ। ବିଶେଷକରି ସାର୍ବଜନୀନ ଭାବେ ଉପଲବ୍ଧ ଅନ୍ୟ ତଥ୍ୟ ସହ ଏଗୁଡ଼ିକୁ ମିଶାଇଲେ ଝୁମ୍ପ ବଢ଼ିପାରେ ବୋଲି IAF ଯୁକ୍ତି ଦେଇଥିଲା।

ଏହି କାରଣରୁ ଦିଲ୍ଲୀ ହାଇକୋର୍ଟ CICର ୨୦୨୦ ଆଦେଶକୁ ରଦ୍ଦ କରି IAFର ତଥ୍ୟ ନଦେବା ନିଷ୍ପତ୍ତିକୁ ବଜାୟ ରଖିଛନ୍ତି।