ଭବିଷ୍ୟତର ଯୁଦ୍ଧରେ କୃତ୍ରିମ ବୁଦ୍ଧିମତା (AI)ର ବ୍ୟବହାର ବଢ଼ିପାରେ, କିନ୍ତୁ ଶେଷରେ ବିଜୟ ହାସଲ କରିବା ପାଇଁ ସୁଶିକ୍ଷିତ ସୈନିକ, ଦୃଢ଼ ଜାତୀୟ ସଂକଳ୍ପ ଓ ଶକ୍ତିଶାଳୀ ପାରମ୍ପରିକ ସାମରିକ କ୍ଷମତା ହିଁ ସବୁଠାରୁ ବଡ଼ ଭୂମିକା ନିଭାଇବ ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି।

ଶନିବାର ବିଶାଖାପାଟଣାରେ ମାଜଗାଓଁ ଡକ୍ ସିପ୍‌ବିଲ୍ଡର୍ସ ଲିମିଟେଡ୍ (MDL) ନିର୍ମିତ ପ୍ରୋଜେକ୍ଟ 17Aର ଷଷ୍ଠ ଷ୍ଟେଲ୍ଥ ଫ୍ରିଗେଟ୍ INS ମହେନ୍ଦ୍ରଗିରିର କମିଶନିଂ ଅବସରରେ ସେ ଏହି ମତ ପ୍ରକାଶ କରିଥିଲେ।

ରାଜନାଥ ସିଂହ କହିଥିଲେ ଯେ, AI ଏବଂ ଅତ୍ୟାଧୁନିକ ପ୍ରଯୁକ୍ତି ଯୁଦ୍ଧର ସ୍ୱରୂପକୁ ପରିବର୍ତ୍ତନ କରିପାରେ, କିନ୍ତୁ ଏହା କେବେବି ପାରମ୍ପରିକ ସାମରିକ ଶକ୍ତିର ବିକଳ୍ପ ହୋଇପାରିବ ନାହିଁ। ବରଂ ଆଧୁନିକ ପ୍ରଯୁକ୍ତି ପାରମ୍ପରିକ ସାମରିକ କ୍ଷମତାକୁ ଆହୁରି ସୁଦୃଢ଼ କରିଥାଏ।

ସେ ଆହୁରି କହିଥିଲେ ଯେ, ଦେଶର ସୁରକ୍ଷା ପାଇଁ ପ୍ରଯୁକ୍ତି ଓ ମାନବ ସାମର୍ଥ୍ୟ ମଧ୍ୟରେ ସନ୍ତୁଳନ ରକ୍ଷା କରିବା ଅତ୍ୟନ୍ତ ଆବଶ୍ୟକ।

ଏହି ଅବସରରେ ପ୍ରତିରକ୍ଷା ମନ୍ତ୍ରୀ ଆନ୍ଧ୍ରପ୍ରଦେଶର ପ୍ରତିରକ୍ଷା ଓ ଏରୋସ୍ପେସ୍ ଉତ୍ପାଦନ କ୍ଷେତ୍ରରେ ବଢ଼ୁଥିବା ଅବଦାନକୁ ପ୍ରଶଂସା କରିଥିଲେ।

୬,୬୭୦ ଟନ୍ ଓଜନ ବିଶିଷ୍ଟ INS ମହେନ୍ଦ୍ରଗିରି ଘଣ୍ଟାପ୍ରତି ୨୮ ନଟ୍ ବେଗରେ ଗତି କରିପାରିବ। ଏହି ଅତ୍ୟାଧୁନିକ ଯୁଦ୍ଧଜାହାଜ ଆକାଶ, ଜଳପଥ ଓ ସମୁଦ୍ର ଗର୍ଭରୁ ଆସୁଥିବା ବିପଦକୁ ଏକାସାଥିରେ ମୁକାବିଲା କରିବାର କ୍ଷମତା ରଖିଛି। ଏହା ଭାରତୀୟ ନୌସେନାର ଯୁଦ୍ଧ କ୍ଷମତାକୁ ଆହୁରି ସୁଦୃଢ଼ କରିବ ବୋଲି କୁହାଯାଉଛି।