ରାତି ପାହିଲେ ପହିଲି ରଜ। ଆଜି ସଜବାଜ ଅବସରରେ ସାରା ଓଡ଼ିଶା ଉତ୍ସବର ରଙ୍ଗରେ ରଙ୍ଗାଇ ହୋଇଯାଇଛି। ସ୍ନେହ, ଶ୍ରଦ୍ଧା, ଭାଇଚାରା ଓ ଆନନ୍ଦର ପ୍ରତୀକ ଏହି ରଜ ପର୍ବକୁ ସ୍ୱାଗତ କରିବା ପାଇଁ ଗାଁଠୁ ସହର ପର୍ଯ୍ୟନ୍ତ ସମସ୍ତେ ପ୍ରସ୍ତୁତିରେ ବ୍ୟସ୍ତ ରହିଛନ୍ତି।

ରଜ ହେଉଛି ଓଡ଼ିଆ ସଂସ୍କୃତିର ଏକ ଅନନ୍ୟ ପର୍ବ, ଯାହା ପାଞ୍ଚ ଦିନ ଧରି ପାଳନ କରାଯାଏ। ସଜବାଜରୁ ଆରମ୍ଭ ହୋଇ ପହିଲି ରଜ, ରଜ ସଂକ୍ରାନ୍ତି, ଭୂମି ଦହନ ଓ ବସୁମତୀ ସ୍ନାନ ସହ ପର୍ବର ସମାପ୍ତି ଘଟେ। ଏହି ଅବସରରେ ଘରେ ଘରେ ପିଠାପଣା ପ୍ରସ୍ତୁତି, ରଜ ପାନ, ନୂଆ ବସ୍ତ୍ର କିଣାକିଣି ଓ ଅତିଥି ସତ୍କାରର ଧୁମ୍ ଦେଖିବାକୁ ମିଳୁଛି।

କଟକ ଜିଲ୍ଲାର ସାଲେପୁର ବଟେଶ୍ୱର ସହ ବିଭିନ୍ନ ସ୍ଥାନରେ କୁମାରୀମାନେ ସକାଳୁ ସକାଳୁ ମେହେନ୍ଦୀ ଲଗାଇ, ଗଭା ସଜାଇ ଓ ନୂଆ ପୋଷାକ ପିନ୍ଧି ରଜ ଉତ୍ସବକୁ ସ୍ୱାଗତ କରିଛନ୍ତି। ଛୋଟ ଛୋଟ ପିଲାମାନେ ଖେଳକୁଦରେ ମାତିଥିବା ବେଳେ ଯୁବକ ଓ ବୟସ୍କମାନେ ତାସ, ଚେସ୍ ଓ ଅନ୍ୟାନ୍ୟ ମନୋରଞ୍ଜନମୂଳକ ଖେଳରେ ବ୍ୟସ୍ତ ରହିଛନ୍ତି।

କାଲି ପହିଲି ରଜ ଅବସରରେ ବିଭିନ୍ନ ପ୍ରକାର ଦୋଳି ଖେଳ, ପିଠାପଣା ଭୋଜନ ଓ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯିବ। ବିବାହିତ ଝିଅମାନେ ଓ ବାହାରେ ରହୁଥିବା ପରିବାର ସଦସ୍ୟମାନେ ଘରକୁ ଫେରିଥିବାରୁ ପରିବାର ମଧ୍ୟରେ ଖୁସିର ମାହୋଲ ଦେଖାଦେଇଛି।

ରଜ କେବଳ ଏକ ପର୍ବ ନୁହେଁ, ବରଂ ଓଡ଼ିଆ ପରମ୍ପରା, ସଂସ୍କୃତି ଓ ପାରିବାରିକ ବନ୍ଧନର ଏକ ସୁନ୍ଦର ପ୍ରତିଛବି। ଏଥର ମଧ୍ୟ ରଙ୍ଗୀନ ଓ ଆନନ୍ଦମୟ ରଜ ପାଳନ ପାଇଁ ସମସ୍ତେ ଅପେକ୍ଷାରେ ରହିଛନ୍ତି।