ଓଡ଼ିଶାର ପର୍ଯ୍ୟଟନ ଓ ସାମୁଦ୍ରିକ ଅର୍ଥନୀତିକୁ ଆହୁରି ସୁଦୃଢ଼ କରିବା ଲକ୍ଷ୍ୟରେ ପୁରୀରେ ଏକ ଆନ୍ତର୍ଜାତୀୟ କ୍ରୁଜ୍ ଟର୍ମିନାଲ ନିର୍ମାଣ ପାଇଁ ଯୋଜନା ହୋଇଛି। ଏହି ପ୍ରକଳ୍ପକୁ ୩୧ ମାର୍ଚ୍ଚ ୨୦୨୮ ସୁଦ୍ଧା ଶେଷ କରି କାର୍ଯ୍ୟକ୍ଷମ କରିବାକୁ ରାଜ୍ୟ ସରକାର ଲକ୍ଷ୍ୟ ଧାର୍ଯ୍ୟ କରିଥିବା ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ବିଧାନସଭାରେ ଲିଖିତ ଉତ୍ତରରେ ସୂଚନା ଦେଇଛନ୍ତି।

ପ୍ରସ୍ତାବିତ ଟର୍ମିନାଲ ପାଇଁ ପୁରୀ ଜିଲ୍ଲାର ସିପାସରୁବାଲି ଅଞ୍ଚଳରେ ପ୍ରାୟ ୯୦ ଏକର ଜମି ଚିହ୍ନଟ କରାଯାଇଛି। ଏହି ସ୍ଥାନ ଭାର୍ଗବୀ ନଦୀ ମୁହାଣ ନିକଟରେ ରହିଛି।

ପ୍ରକଳ୍ପର ପ୍ରାରମ୍ଭିକ ପ୍ରସ୍ତୁତି ଭାବେ ପାରାଦୀପ ପୋର୍ଟ ଅଥରିଟି (PPA) ଏବଂ ଓଡ଼ିଶା ମାରିଟାଇମ୍ ବୋର୍ଡ (OMB) ମଧ୍ୟରେ ୨୨ ଅକ୍ଟୋବର ୨୦୨୪ରେ ଏକ ବୁଝାମଣାପତ୍ର (MoU) ସ୍ୱାକ୍ଷର ହୋଇଥିଲା। ଏହି MoUର ଉଦ୍ଦେଶ୍ୟ ହେଉଛି ପ୍ରସ୍ତାବିତ କ୍ରୁଜ୍ ଟର୍ମିନାଲର ବିକାଶ ପାଇଁ ସମନ୍ୱିତ ପଦକ୍ଷେପ ନେବା।

ବର୍ତ୍ତମାନ ପ୍ରକଳ୍ପଟି ସମ୍ଭାବ୍ୟତା ମୂଲ୍ୟାଙ୍କନ (feasibility assessment) ପର୍ଯ୍ୟାୟରେ ରହିଛି। ପ୍ରକଳ୍ପର ବୈଷୟିକ ଓ ଆର୍ଥିକ ସମ୍ଭାବନା ଯାଞ୍ଚ ପାଇଁ WAPCOS Limitedକୁ Techno-Economic Feasibility Report (TEFR) ପ୍ରସ୍ତୁତ କରିବାର ଦାୟିତ୍ୱ ଦିଆଯାଇଛି। ରିପୋର୍ଟ ଆସିବା ପରେ ପ୍ରକଳ୍ପର ଆର୍ଥିକ ଓ ପରିଚାଳନା ମଡେଲ୍ ନିର୍ଦ୍ଧାରଣ କରାଯିବ।

ପ୍ରକଳ୍ପର ଯୋଜନା ଓ କାର୍ଯ୍ୟାନ୍ୱୟନ ପାଇଁ ଏକ Special Purpose Vehicle (SPV) ଗଠନ କରିବାକୁ ମଧ୍ୟ ସରକାର ଯୋଜନା କରିଛନ୍ତି। ଓଡ଼ିଶା ମାରିଟାଇମ୍ ବୋର୍ଡର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO)ଙ୍କ ଅଧ୍ୟକ୍ଷତାରେ ଏହି SPV କାର୍ଯ୍ୟ କରିବ।

ଟର୍ମିନାଲ କାର୍ଯ୍ୟକ୍ଷମ ହେଲେ ଆନ୍ତର୍ଜାତୀୟ କ୍ରୁଜ୍ ଜାହାଜଗୁଡ଼ିକ ପୁରୀରେ ଆସିବାର ସୁଯୋଗ ପାଇବେ। ଏହା ଦ୍ୱାରା ପୁରୀକୁ ବିଶ୍ୱ କ୍ରୁଜ୍ ଟୁରିଜିମ୍ ନେଟୱର୍କ ସହିତ ସିଧାସଳଖ ଯୋଡ଼ିବାର ସୁଯୋଗ ସୃଷ୍ଟି ହେବ। ଏହା ସହିତ ହୋଟେଲ୍, ପରିବହନ, ଗାଇଡ୍, ଖାଦ୍ୟ ଓ ଅନ୍ୟାନ୍ୟ ପର୍ଯ୍ୟଟନ ସେବା କ୍ଷେତ୍ରରେ ମଧ୍ୟ ନୂଆ ବ୍ୟବସାୟିକ ସୁଯୋଗ ସୃଷ୍ଟି ହେବା ଆଶା ରହିଛି।