ମହାରାଷ୍ଟ୍ରର ପୁଣେ ଜିଲ୍ଲା ଅନ୍ତର୍ଗତ ପିମ୍ପ୍ରି-ଚିଞ୍ଚୱାଡ଼ର ମୋଶୀ ଅଞ୍ଚଳରେ ଗୁରୁବାର ଏକ ଭୟାବହ ଦୁର୍ଘଟଣା ଘଟିଛି। ଲଗାତାର ପ୍ରବଳ ବର୍ଷା ପରେ ଏକ ବିଶାଳ ଆବର୍ଜନା ପାହାଡ଼ (ଡମ୍ପିଂ ୟାର୍ଡ) ହଠାତ୍ ଭୁଶୁଡ଼ି ପଡ଼ି ପାର୍ଶ୍ୱବର୍ତ୍ତୀ ତିନି ମହଲା କୋଠା ଉପରେ ଚାପି ହୋଇଯାଇଛି। ଫଳରେ ସମ୍ପୂର୍ଣ୍ଣ କୋଠାଟି ଭୁଶୁଡ଼ି ପଡ଼ିଥିବା ବେଳେ ଅତିକମରେ ୧୬ ଜଣ କର୍ମଚାରୀ ଭିତରେ ଫସି ରହିଥିବା ଆଶଙ୍କା କରାଯାଉଛି।

ଘଟଣା ସମ୍ପର୍କରେ ସୂଚନା ପାଇବା ପରେ ଏନଡିଆରଏଫ, ଅଗ୍ନିଶମ ବାହିନୀ, ପୁଲିସ ଓ ଆମ୍ବୁଲାନ୍ସ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି। ଭଙ୍ଗା କୋଠା ଓ ଆବର୍ଜନା ତଳେ ଫସିଥିବା କର୍ମଚାରୀମାନଙ୍କୁ ସୁରକ୍ଷିତ ଭାବେ ବାହାର କରିବା ପାଇଁ ଭାରୀ ଯନ୍ତ୍ରପାତି ଓ ଉଦ୍ଧାରକାରୀ ଦଳ ନିୟୋଜିତ ହୋଇଛନ୍ତି।

ପିମ୍ପ୍ରି-ଚିଞ୍ଚୱାଡ଼ ମ୍ୟୁନିସିପାଲ୍ କର୍ପୋରେସନର କମିଶନର ବିଜୟ ସୂର୍ଯ୍ୟବଂଶୀ କହିଛନ୍ତି ଯେ, ଦୁର୍ଘଟଣାଗ୍ରସ୍ତ କୋଠାଟି ବର୍ଜ୍ୟବସ୍ତୁ ପ୍ରକ୍ରିୟାକରଣ କାମ କରୁଥିବା ଏକ ଘରୋଇ ସଂସ୍ଥାର ପ୍ରଶାସନିକ କାର୍ଯ୍ୟାଳୟ ଭାବେ ବ୍ୟବହୃତ ହେଉଥିଲା।

ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଗତ କିଛି ଦିନ ଧରି ଲଗାତାର ବର୍ଷା ହେବାରୁ ଡମ୍ପିଂ ୟାର୍ଡର ଆବର୍ଜନା ଓ ମାଟି ଢିଲା ହୋଇଯାଇଥିଲା। ଏହା ପରେ ହଠାତ୍ ବିରାଟ ଆବର୍ଜନା ପାହାଡ଼ ଖସିପଡ଼ି ପାର୍ଶ୍ୱବର୍ତ୍ତୀ କୋଠା ଉପରେ ଚାପି ହୋଇଥିଲା।

ଘଟଣାର ପ୍ରକୃତ କାରଣ ଜାଣିବା ପାଇଁ ପ୍ରଶାସନ ପକ୍ଷରୁ ତଦନ୍ତ ଆରମ୍ଭ ହୋଇଛି। ସେପଟେ ଉଦ୍ଧାର ଅଭିଯାନ ଜାରି ରହିଥିବାରୁ ଫସିଥିବା କର୍ମଚାରୀଙ୍କ ସଠିକ୍ ସ୍ଥିତି ସମ୍ପର୍କରେ ଏପର୍ଯ୍ୟନ୍ତ ଅଧିକାରିକ ସୂଚନା ମିଳିନାହିଁ।