ଭାରତୀୟ କ୍ରିକେଟର ପୃଥ୍ୱୀ ଶ’ ଓ ଆକୃତି ଅଗ୍ରୱାଲଙ୍କ ସମ୍ପର୍କକୁ ନେଇ ବଡ଼ ଖବର ସାମ୍ନାକୁ ଆସିଛି। ଆକୃତି ଅଗ୍ରୱାଲ ନିଜ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ପୃଥ୍ୱୀ ଶ’ଙ୍କ ସହ ତାଙ୍କ ସମ୍ପର୍କ ଶେଷ ହୋଇଥିବା ଜଣାଇଛନ୍ତି।

ରିପୋର୍ଟ ଅନୁସାରେ, ଉଭୟ ପ୍ରାୟ ଦୁଇ ବର୍ଷ ଧରି ସମ୍ପର୍କରେ ଥିଲେ। ୨୦୨୫ ମାର୍ଚ୍ଚ ୮ ତାରିଖରେ ସେମାନଙ୍କର ନିର୍ବନ୍ଧ ହୋଇଥିଲା। ସେତେବେଳେ ଉଭୟ ନିଜ ନିଜ ସୋସିଆଲ ମିଡିଆ ଆକାଉଣ୍ଟରେ ନିର୍ବନ୍ଧ ସମ୍ପର୍କରେ ସୂଚନା ଦେଇଥିଲେ।

ଏବେ ଆକୃତିଙ୍କ ସଦ୍ୟ ଇନଷ୍ଟାଗ୍ରାମ ପୋଷ୍ଟରୁ ଉଭୟଙ୍କ ରାସ୍ତା ଅଲଗା ହୋଇଥିବା ସ୍ପଷ୍ଟ ହୋଇଛି। ଆକୃତି କହିଛନ୍ତି ଯେ, ଭବିଷ୍ୟତର ଭିନ୍ନ ଲକ୍ଷ୍ୟ ଓ ପରିସ୍ଥିତିକୁ ବିଚାର କରି ସେ ଓ ତାଙ୍କ ମଙ୍ଗେତର ପାରସ୍ପରିକ ସହମତିରେ ଅଲଗା ହେବାର ନିଷ୍ପତ୍ତି ନେଇଛନ୍ତି।

ସେ ଏହା ମଧ୍ୟ କହିଛନ୍ତି ଯେ, ପରସ୍ପର ପ୍ରତି ଭଲପାଇବା ଓ ଯତ୍ନ ଥିଲେ ମଧ୍ୟ ସେମାନଙ୍କ ରାସ୍ତା ହୁଏତ ଏକାଠି ଚାଲିବା ପାଇଁ ନିର୍ଦ୍ଧାରିତ ନଥିଲା। ଆଗକୁ ଉଭୟଙ୍କ ପାଇଁ ଶାନ୍ତି, ସୁଖ ଓ ଭଲ ଭବିଷ୍ୟତ କାମନା କରିବା ସହ ଏହି କଠିନ ସମୟରେ ଗୋପନୀୟତାକୁ ସମ୍ମାନ କରିବାକୁ ଆକୃତି ଅନୁରୋଧ କରିଛନ୍ତି।

ପୂର୍ବରୁ ମଧ୍ୟ ହୋଇଥିଲା ‘ଧୋକା’ ନେଇ ଚର୍ଚ୍ଚା

ଚଳିତ ବର୍ଷ ଜୁଲାଇରେ ଆକୃତି ଇନଷ୍ଟାଗ୍ରାମରେ ‘ଧୋକା’ ଓ ‘ବିଶ୍ୱାସଘାତ’କୁ ନେଇ ଏକ ପୋଷ୍ଟ କରିଥିଲେ। ଏହା ପରେ ସୋସିଆଲ ମିଡିଆରେ ତାଙ୍କ ସମ୍ପର୍କକୁ ନେଇ ବିଭିନ୍ନ ଚର୍ଚ୍ଚା ହୋଇଥିଲା। ତେବେ ସେତେବେଳେ ଆକୃତି ସ୍ପଷ୍ଟ କରିଥିଲେ ଯେ ତାଙ୍କ ପୋଷ୍ଟ ପୃଥ୍ୱୀ ଶ’ଙ୍କୁ ନେଇ ନଥିଲା ଏବଂ ତାଙ୍କ ନିର୍ବନ୍ଧ ଭାଙ୍ଗିନଥିଲା।

ପୃଥ୍ୱୀ ଶ’ ଓ ଆକୃତି ଅଗ୍ରୱାଲଙ୍କୁ ପ୍ରଥମେ ୨୦୨୫ରେ ଗଣେଶ ଚତୁର୍ଥୀ ସମୟରେ ସାର୍ବଜନୀନ ଭାବେ ଏକାଠି ଦେଖାଯାଇଥିଲା। ପରେ ବିଭିନ୍ନ ସାମାଜିକ ଅବସରରେ ମଧ୍ୟ ଉଭୟଙ୍କୁ ଏକାଠି ଦେଖିବାକୁ ମିଳିଥିଲା।

ଆକୃତି ଅଗ୍ରୱାଲ ଲକ୍ଷ୍ନୌର ବୋଲି ଜଣାପଡ଼ିଥିବା ବେଳେ ସେ ଜଣେ ଡିଜିଟାଲ କଣ୍ଟେଣ୍ଟ କ୍ରିଏଟର। ସେ ‘ତ୍ରିମୁଖା’ ନାମକ ଏକ ତେଲୁଗୁ ଫିଲ୍ମ ମାଧ୍ୟମରେ ଅଭିନୟ ଜଗତରେ ପ୍ରବେଶ କରୁଥିବା ନେଇ ରିପୋର୍ଟ ରହିଛି।