ବ୍ରିଟେନ୍‌ର ରାଜପରିବାରକୁ ନେଇ ଆସିଛି ବଡ଼ ଖବର। ଦୀର୍ଘ ସମୟ ପରେ ପ୍ରିନ୍ସ ହ୍ୟାରି ଓ ମେଘାନ ମାର୍କେଲ ଦୁଇ ପିଲାଙ୍କ ସହ ବ୍ରିଟେନ୍ ଫେରିଥିବା ବେଳେ ସେମାନଙ୍କ ରାଜକୀୟ ସ୍ଥିତିକୁ ନେଇ ଏକ ନୂଆ ସ୍ପଷ୍ଟତା ସାମ୍ନାକୁ ଆସିଛି।

ରିପୋର୍ଟ ଅନୁସାରେ, ରାଜା ଚାର୍ଲ୍ସ ତୃତୀୟଙ୍କ ପକ୍ଷରୁ ଜାରି ଏକ ଚିଠିରେ ସ୍ପଷ୍ଟ କରାଯାଇଛି ଯେ ହ୍ୟାରି ଓ ମେଘାନ ଆଉ କାର୍ଯ୍ୟରତ ରାଜପରିବାରର ସଦସ୍ୟ ନୁହଁନ୍ତି। ଅର୍ଥାତ୍ ସେମାନେ ରାଜା କିମ୍ବା ରାଣୀଙ୍କ ପକ୍ଷରୁ ସରକାରୀ ରାଜକୀୟ କର୍ତ୍ତବ୍ୟ ପାଳନ କରିବେ ନାହିଁ।

୨୦୨୦ରେ ରାଜକୀୟ ଦାୟିତ୍ୱରୁ ଓହରିଥିଲେ

୨୦୨୦ରେ ପ୍ରିନ୍ସ ହ୍ୟାରି ଓ ମେଘାନ ରାଜକୀୟ ଦାୟିତ୍ୱରୁ ଓହରି ଯାଇଥିଲେ। ଏହାପରେ ସେମାନେ ବ୍ରିଟେନ୍ ଛାଡ଼ି ଆମେରିକାରେ ରହୁଥିଲେ ଏବଂ ବ୍ରିଟିଶ ରାଜପରିବାର ପକ୍ଷରୁ ସରକାରୀ ଦାୟିତ୍ୱ ପାଳନ କରୁନଥିଲେ।

ଏବେ ବ୍ରିଟେନ୍ ଫେରିବା ପରେ ରାଜପରିବାର ମଧ୍ୟରେ ସେମାନଙ୍କ ଭୂମିକାକୁ ନେଇ କୌଣସି ଦ୍ୱନ୍ଦ୍ୱ ନରହିବା ପାଇଁ ଏହି ଚିଠି ଜାରି କରାଯାଇଥିବା କୁହାଯାଉଛି।

ମିଳିବ ନାହିଁ ରାଜକୀୟ ପ୍ରଶାସନିକ ସହାୟତା

ରାଜପରିବାରର ବରିଷ୍ଠ ଅଧିକାରୀ ଲର୍ଡ ଚାମ୍ବରଲେନଙ୍କ ପକ୍ଷରୁ ଜାରି ଚିଠିରେ ହ୍ୟାରି ଓ ମେଘାନ ଏବେ ରାଜା କିମ୍ବା ରାଣୀଙ୍କ ପକ୍ଷରୁ ସରକାରୀ ରାଜକୀୟ କର୍ତ୍ତବ୍ୟ ପାଳନ କରିବେ ନାହିଁ ବୋଲି ଉଲ୍ଲେଖ ଥିବା ରିପୋର୍ଟରେ କୁହାଯାଇଛି।

ଏହାର ପରିଣାମରେ ସେମାନେ କାର୍ଯ୍ୟରତ ରାଜପରିବାରର ସଦସ୍ୟମାନଙ୍କୁ ମିଳୁଥିବା କିଛି ପ୍ରଶାସନିକ ସହାୟତା ପାଇବେ ନାହିଁ। ଏହା ସହିତ ହ୍ୟାରି ଓ ମେଘାନଙ୍କୁ ‘ରୟାଲ୍ ହାଇନେସ୍’ ଭାବେ ସମ୍ବୋଧନ କରାଯିବ ନାହିଁ।

ତେବେ ଦୁହେଁ ଏବେ ମଧ୍ୟ ଡ୍ୟୁକ୍ ଏବଂ ଡଚେସ୍ ଅଫ୍ ସସେକ୍ସ ଭାବେ ପରିଚିତ ଅଛନ୍ତି।

ବ୍ୟକ୍ତିଗତ ଗୋପନୀୟତାକୁ ସମ୍ମାନ

ଚିଠିରେ ହ୍ୟାରି ଓ ମେଘାନଙ୍କ ବ୍ୟକ୍ତିଗତ ଆର୍ଥିକ ସ୍ୱାଧୀନତା ଓ ଗୋପନୀୟତାକୁ ସମ୍ମାନ ଦିଆଯିବ ବୋଲି ମଧ୍ୟ କୁହାଯାଇଥିବା ରିପୋର୍ଟରେ ଉଲ୍ଲେଖ ରହିଛି।

ରାଜକୀୟ ଦାୟିତ୍ୱରୁ ଓହରିବା ପରେ ୨୦୨୦ରେ ହ୍ୟାରି ଓ ମେଘାନଙ୍କ କିଛି ରାଜକୀୟ ସୁବିଧା ମଧ୍ୟ ଶେଷ ହୋଇଥିଲା। ଏବେ ବ୍ରିଟେନ୍ ଫେରିଥିବା ପରେ ସେମାନଙ୍କ ରାଜକୀୟ ଭୂମିକା ସମ୍ପର୍କରେ ଏହି ନୂଆ ସ୍ପଷ୍ଟତା ସାମ୍ନାକୁ ଆସିଛି।