ନାଗୋୟା: Aichi-Nagoya 2026 ଏସିଆନ୍ ପାରା ଗେମ୍ସରେ ଭାରତୀୟ ଦଳକୁ ନେତୃତ୍ୱ ଦେବେ ଦେଶର ଦୁଇ ଅଭିଜ୍ଞ ପାରା ଆଥଲେଟ୍‌ ପ୍ରମୋଦ ଭଗତ ଓ ଭାବିନା ପଟେଲ। ଅକ୍ଟୋବର ୧୮ରେ ନାଗୋୟା, ଜାପାନରେ ହେବାକୁ ଥିବା ଉଦ୍‌ଘାଟନୀ ସମାରୋହରେ ଉଭୟେ ଭାରତର ଧ୍ୱଜବାହକ ଭାବେ ତ୍ରିରଙ୍ଗା ଧରି ଭାରତୀୟ ଦଳକୁ ଆଗେଇ ନେବେ।

ପ୍ରମୋଦ ଭଗତ ଓ ଭାବିନା ପଟେଲ ଉଭୟେ ପାରାଲିମ୍ପିକ୍ସ ପଦକ ବିଜେତା। ଏସିଆନ୍ ପାରା ଗେମ୍ସରେ ମଧ୍ୟ ଉଭୟଙ୍କ ନାମରେ ମୋଟ ୮ଟି ପଦକ ରହିଛି। ପ୍ରମୋଦ ଭଗତ ୬ଟି ପଦକ ଜିତିଥିବା ବେଳେ ଏଥିରେ ୨ଟି ସ୍ୱର୍ଣ୍ଣ ଓ ୪ଟି ବ୍ରୋଞ୍ଜ ପଦକ ରହିଛି। ଭାବିନା ପଟେଲ ୧ଟି ରୌପ୍ୟ ଓ ୧ଟି ବ୍ରୋଞ୍ଜ ସହ ମୋଟ ୨ଟି ପଦକ ଜିତିଛନ୍ତି।

ସ୍ୱର୍ଣ୍ଣ ପାଇଁ ପ୍ରମୋଦ ଭଗତ ପ୍ରମୁଖ ଦାବିଦାର

ଟୋକିଓ ପାରାଲିମ୍ପିକ୍ସର ସ୍ୱର୍ଣ୍ଣ ପଦକ ବିଜେତା ପ୍ରମୋଦ ଭଗତ ଏଥର ମଧ୍ୟ ଭଲ ଫର୍ମରେ ଅଛନ୍ତି। ଚଳିତ ବର୍ଷ ସେ ପାରା ବ୍ୟାଡମିଣ୍ଟନ୍‌ରେ ନିଜର ଦବଦବା ଜାରି ରଖି SL3 ବର୍ଗରେ ରେକର୍ଡ ଷଷ୍ଠ ବିଶ୍ୱ ଚାମ୍ପିୟନଶିପ୍ ଟାଇଟଲ୍ ଜିତିଛନ୍ତି।

ଫାଇନାଲରେ ସେ ଇଣ୍ଡୋନେସିଆର ମହମ୍ମଦ ଅଲ୍ ଇମ୍ରାନଙ୍କୁ ୨୧-୧୨, ୨୧-୧୮ରେ ପରାସ୍ତ କରିଥିଲେ। ଏହା ସହ ସେ ଚାମ୍ପିୟନଶିପ୍‌ରେ କ୍ରମାଗତ ଚତୁର୍ଥ ସିଙ୍ଗଲ୍ସ ସ୍ୱର୍ଣ୍ଣ ଜିତିଥିଲେ।

ପ୍ରମୋଦ ଭଗତଙ୍କ କ୍ୟାରିୟରରେ ଏକ ସମୟରେ ବଡ଼ ଝଟକା ଲାଗିଥିଲା। Badminton World Federationର ଆଣ୍ଟି-ଡୋପିଂ whereabouts ନିୟମ ଉଲ୍ଲଂଘନ କରିବା ଅଭିଯୋଗରେ ସେ ୧୮ ମାସର ନିଲମ୍ବନ ଭୋଗିଥିଲେ। ଏହା ଯୋଗୁଁ ସେ ପ୍ୟାରିସ୍ ପାରାଲିମ୍ପିକ୍ସରୁ ବଞ୍ଚିତ ହୋଇଥିଲେ।

ତେବେ ଫେରିବା ପରେ ପ୍ରମୋଦ ଚମତ୍କାର ପ୍ରଦର୍ଶନ କରିଛନ୍ତି। ସେପ୍ଟେମ୍ବରରେ ପ୍ରତିଯୋଗିତାକୁ ଫେରିବା ପରେ ଚୀନ୍, ନାଇଜେରିଆ, ଅଷ୍ଟ୍ରେଲିଆ ଓ ଜାପାନରେ ଆୟୋଜିତ ବିଭିନ୍ନ ପ୍ରତିଯୋଗିତାରେ ସେ ସିଙ୍ଗଲ୍ସ, ପୁରୁଷ ଡବଲ୍ସ ଓ ମିକ୍ସଡ୍ ଡବଲ୍ସରେ ମୋଟ ୧୦ଟି ସ୍ୱର୍ଣ୍ଣ ପଦକ ଜିତିଛନ୍ତି।

ଏସିଆନ୍ ପାରା ଗେମ୍ସରେ ମଧ୍ୟ ପ୍ରମୋଦଙ୍କ ରେକର୍ଡ ଚମତ୍କାର। ୨୦୧୪ରୁ ୨୦୨୩ ମଧ୍ୟରେ ସେ ୬ଟି ପଦକ ଜିତିଛନ୍ତି। ୨୦୧୮ରେ ପୁରୁଷ ସିଙ୍ଗଲ୍ସ SL3ରେ ସ୍ୱର୍ଣ୍ଣ ଏବଂ ୨୦୨୨ରେ ପୁରୁଷ ଡବଲ୍ସରେ ଆଉ ଏକ ସ୍ୱର୍ଣ୍ଣ ଜିତିଥିଲେ।

ଭାବିନା ପଟେଲଙ୍କୁ ମଧ୍ୟ ବଡ଼ ସମ୍ମାନ

ପାରା ଟେବୁଲ୍ ଟେନିସ୍‌ରେ ଭାରତର ଅନ୍ୟତମ ପ୍ରମୁଖ ଖେଳାଳି ଭାବିନା ପଟେଲ ମଧ୍ୟ ଏହି ସମ୍ମାନ ପାଇଛନ୍ତି। ପାରାଲିମ୍ପିକ୍ସର ରୌପ୍ୟ ପଦକ ବିଜେତା ଭାବିନା ୨୦୧୮ରୁ ୨୦୨୩ ମଧ୍ୟରେ ଏସିଆନ୍ ପାରା ଗେମ୍ସରେ ୨ଟି ପଦକ ଜିତିଛନ୍ତି।

ଭାରତୀୟ ଦଳର ଧ୍ୱଜବାହକ ହେବା ନେଇ ଭାବିନା କହିଛନ୍ତି ଯେ ଉଦ୍‌ଘାଟନୀ ସମାରୋହରେ ତ୍ରିରଙ୍ଗା ଧରିବା ତାଙ୍କ କ୍ୟାରିୟରର ଏକ ବିଶେଷ ମୁହୂର୍ତ୍ତ ହେବ। ଦେଶର ପ୍ରତିନିଧିତ୍ୱ କରିବା ନିଜଠାରୁ ବହୁତ ବଡ଼ ଦାୟିତ୍ୱ ବୋଲି ସେ କହିଛନ୍ତି।

ପାରାଲିମ୍ପିକ୍ କମିଟି ଅଫ୍ ଇଣ୍ଡିଆର ଅଧ୍ୟକ୍ଷ ଦେବେନ୍ଦ୍ର ଝାଝରିଆ ମଧ୍ୟ ଉଭୟ ଖେଳାଳିଙ୍କ ଚୟନକୁ ନେଇ ଗର୍ବ ପ୍ରକାଶ କରିଛନ୍ତି। ଉଭୟଙ୍କ ସଫଳତା, ସଂଘର୍ଷ ଓ ଦୃଢ଼ତା ଭାରତୀୟ ପାରା ଖେଳାଳିଙ୍କ ପାଇଁ ପ୍ରେରଣା ହେବ ବୋଲି ସେ କହିଛନ୍ତି।

ପଞ୍ଚମ ଏସିଆନ୍ ପାରା ଗେମ୍ସ ଅକ୍ଟୋବର ୧୮ରୁ ୨୪ ପର୍ଯ୍ୟନ୍ତ ଜାପାନରେ ଆୟୋଜିତ ହେବ। ଏହି ବଡ଼ କ୍ରୀଡ଼ା ଅଭିଯାନ ପୂର୍ବରୁ ଅକ୍ଟୋବର ୮ରେ ନୂଆଦିଲ୍ଲୀର ITC Mauryaରେ ଭାରତୀୟ ଦଳ ପାଇଁ ବିଦାୟ ସମାରୋହ ଆୟୋଜିତ ହେବ।

ଏବେ ନାଗୋୟାରେ ଉଦ୍‌ଘାଟନୀ ସମାରୋହରେ ତ୍ରିରଙ୍ଗା ଧରି ଭାରତୀୟ ଦଳକୁ ଆଗେଇ ନେବେ ପ୍ରମୋଦ ଭଗତ ଓ ଭାବିନା ପଟେଲ।