ନ୍ୟୁଜିଲାଣ୍ଡ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଅକଲାଣ୍ଡରେ ପାରମ୍ପରିକ ମାଓରି ‘ପାୱହିରି’ ସମାରୋହ ମାଧ୍ୟମରେ ଭବ୍ୟ ଓ ଉଷ୍ମ ସ୍ୱାଗତ କରାଯାଇଛି। ଏହି ସ୍ୱାଗତ ନ୍ୟୁଜିଲାଣ୍ଡର ସମୃଦ୍ଧ ଆଦିବାସୀ ଐତିହ୍ୟ, ସଂସ୍କୃତି ଓ ପରମ୍ପରାର ଏକ ବିଶିଷ୍ଟ ପ୍ରତୀକ ଭାବେ ପରିଚିତ।

ଭାରତର ବୈଦେଶିକ ମନ୍ତ୍ରଣାଳୟ ସୋସିଆଲ ମିଡିଆ ପ୍ଲାଟଫର୍ମ Xରେ ଏହି ସୂଚନା ସେୟାର କରି କହିଛି ଯେ, ପ୍ରଧାନମନ୍ତ୍ରୀ ମୋଦୀଙ୍କୁ ଅକଲାଣ୍ଡର Government Houseରେ ପାରମ୍ପରିକ ରୀତିନୀତି ଅନୁଯାୟୀ ସମ୍ମାନର ସହ ସ୍ୱାଗତ କରାଯାଇଛି।

ସ୍ୱାଗତ ପରେ ପ୍ରଧାନମନ୍ତ୍ରୀ ମୋଦୀ ମଧ୍ୟ ନ୍ୟୁଜିଲାଣ୍ଡ ସରକାର ଓ ସେଠାକାର ଲୋକଙ୍କୁ ଧନ୍ୟବାଦ ଜଣାଇଥିଲେ। ସେ Xରେ ଲେଖିଥିଲେ ଯେ, ଅକଲାଣ୍ଡର ସରକାରୀ ଗୃହରେ ଏଭଳି ଆନୁଷ୍ଠାନିକ ସ୍ୱାଗତ ପାଇ ସେ ନିଜକୁ ଗୌରବାନ୍ୱିତ ମନେ କରୁଛନ୍ତି।

ମାଓରି ସମ୍ପ୍ରଦାୟକୁ ନ୍ୟୁଜିଲାଣ୍ଡର ମୂଳ ବାସିନ୍ଦା ଭାବେ ବିବେଚନା କରାଯାଏ। ଇତିହାସ ଅନୁଯାୟୀ, ସେମାନଙ୍କ ପୂର୍ବପୁରୁଷମାନେ ପ୍ରାୟ ୭୦୦ରୁ ୮୦୦ ବର୍ଷ ପୂର୍ବେ ପୂର୍ବ ପଲିନେସିଆରୁ ସମୁଦ୍ର ପଥରେ ନ୍ୟୁଜିଲାଣ୍ଡରେ ପହଞ୍ଚିଥିଲେ।

ଆଜି ମାଓରି ସମ୍ପ୍ରଦାୟ ନ୍ୟୁଜିଲାଣ୍ଡର ପରିଚୟ ଓ ସାଂସ୍କୃତିକ ଐତିହ୍ୟର ଏକ ଅବିଚ୍ଛିନ୍ନ ଅଂଶ। ସେମାନଙ୍କର ‘ତେ ରିଓ ମାଓରି’ ଭାଷା, ପାରମ୍ପରିକ ‘ହାକା’ ନୃତ୍ୟ, କାଠଖୋଦେଇ କଳା, ଟାଟୁ ଶିଳ୍ପ ଓ ଅନନ୍ୟ ସଂସ୍କୃତି ବିଶ୍ୱବ୍ୟାପୀ ଭାବେ ପ୍ରସିଦ୍ଧ।