ବିଦେଶରେ ପିଏଚ୍‌ଡି କରିବାକୁ ଯୋଜନା କରୁଥିବା ଛାତ୍ରଛାତ୍ରୀଙ୍କ ପାଇଁ ୟୁରୋପର ଏକ ନୂଆ ରିପୋର୍ଟ ଗୁରୁତ୍ୱପୂର୍ଣ୍ଣ ତଥ୍ୟ ଆଣିଛି। ୟୁରୋପର ବିଭିନ୍ନ ଦେଶରେ ପିଏଚ୍‌ଡି ଗବେଷକଙ୍କୁ ମିଳୁଥିବା ପ୍ରାରମ୍ଭିକ ଆୟ ମଧ୍ୟରେ ବହୁତ ପାର୍ଥକ୍ୟ ରହିଛି। Eurodoc ପକ୍ଷରୁ ପ୍ରସ୍ତୁତ ଏହି ରିପୋର୍ଟରେ ୨୦୨୪–୨୫ ମସିହାରେ ୨୬ଟି ଦେଶର ପ୍ରଥମ ବର୍ଷର ଡକ୍ଟରାଲ୍ ଗବେଷକଙ୍କ ଆୟର ତୁଳନା କରାଯାଇଛି।

କେଉଁ ଦେଶରେ କେତେ ଆୟ?

ରିପୋର୍ଟରେ ଦିଆଯାଇଥିବା ବାର୍ଷିକ ପ୍ରାରମ୍ଭିକ ଆୟ ଅନୁଯାୟୀ, ଡେନମାର୍କ ୫୮,୦୧୩.୯୦ ୟୁରୋ ସହ ପ୍ରଥମ ସ୍ଥାନରେ ରହିଛି। ଜର୍ମାନୀରେ ଏହା ୫୫,୫୫୬.୮୮ ୟୁରୋ ଏବଂ ବେଲଜିୟମ୍‌ରେ ୫୦,୭୯୯.୯୬ ୟୁରୋ। ଅନ୍ୟପଟେ, ୟୁକ୍ରେନ୍‌ରେ ରିପୋର୍ଟ ହୋଇଥିବା ଆୟ ମାତ୍ର ୨,୨୬୩.୪୪ ୟୁରୋ, ଯାହା ତାଲିକାରେ ସବୁଠାରୁ କମ୍। 

ରିପୋର୍ଟ ଅନୁଯାୟୀ, କେତେକ ଦେଶରେ PhD ଗବେଷକମାନେ ନିୟମିତ କର୍ମଚାରୀ ଭାବେ ଦରମା ପାଆନ୍ତି। ଅନ୍ୟ ଦେଶରେ ସେମାନେ ଛାତ୍ରବୃତ୍ତି ପାଆନ୍ତି, ଆଉ କେତେକ ସ୍ଥାନରେ ଏହି ଦୁଇ ବ୍ୟବସ୍ଥାର ମିଶ୍ରଣ ରହିଛି।

ସର୍ବାଧିକ ଆୟ ଥିବା ଦେଶଗୁଡ଼ିକ

• ଡେନମାର୍କ: ବାର୍ଷିକ ୫୮,୦୧୩.୯୦ ୟୁରୋ

• ଜର୍ମାନୀ: ବାର୍ଷିକ ୫୫,୫୫୬.୮୮ ୟୁରୋ

• ବେଲଜିୟମ୍: ବାର୍ଷିକ ୫୦,୭୯୯.୯୬ ୟୁରୋ

• ନରୱେ: ବାର୍ଷିକ ୪୯,୭୨୭.୮୩ରୁ ୫୧,୧୧୮.୩୨ ୟୁରୋ

• ସ୍ୱିଜରଲ୍ୟାଣ୍ଡ: ବାର୍ଷିକ ୪୯,୬୭୫.୧୮ ୟୁରୋ 

ଦରମା ଓ ଛାତ୍ରବୃତ୍ତି ମଧ୍ୟରେ ପାର୍ଥକ୍ୟ

ନିୟମିତ ଦରମା ପାଉଥିବା ଗବେଷକଙ୍କ ଆୟ ଉପରେ କର ଲାଗିପାରେ। କିନ୍ତୁ ସେମାନଙ୍କୁ ପେନ୍‌ସନ୍ ଓ ଅଭିଭାବକୀୟ ଛୁଟି ଭଳି କିଛି ସୁବିଧା ମିଳିପାରେ। ଅନ୍ୟପଟେ, ଛାତ୍ରବୃତ୍ତି ଉପରେ ସାଧାରଣତଃ କର ଲାଗେ ନାହିଁ, କିନ୍ତୁ ସମସ୍ତ ଚାକିରି ସୁବିଧା ମିଳିବା ନିଶ୍ଚିତ ନୁହେଁ। ତେଣୁ କେବଳ ମୋଟ ଆୟ ଦେଖି ଦେଶଗୁଡ଼ିକୁ ତୁଳନା କରିବା ଯଥେଷ୍ଟ ନୁହେଁ; ସେଠାକାର ଜୀବନଯାପନ ଖର୍ଚ୍ଚ ଓ କର ବ୍ୟବସ୍ଥାକୁ ମଧ୍ୟ ବିଚାର କରିବା ଦରକାର। 

ଏଷ୍ଟୋନିଆରେ ପରିବର୍ତ୍ତନର ଉଦାହରଣ

ରିପୋର୍ଟରେ ଏଷ୍ଟୋନିଆର ଉଦାହରଣ ମଧ୍ୟ ଦିଆଯାଇଛି। ୨୦୨୨ରେ ସେଠାରେ ଡକ୍ଟରାଲ୍ ଶିକ୍ଷା ବ୍ୟବସ୍ଥାରେ ସଂସ୍କାର କରାଯାଇ ପୂର୍ବରୁ ମିଳୁଥିବା ବାର୍ଷିକ ପ୍ରାୟ ୮,୦୦୦ ୟୁରୋର ଛାତ୍ରବୃତ୍ତି ବଦଳରେ ତାହାର ପ୍ରାୟ ୨.୫ ଗୁଣ ଆୟ ସହ ଗ୍ୟାରେଣ୍ଟି ଦରମା ବ୍ୟବସ୍ଥା କରାଯାଇଥିଲା। ଏହା ପରେ PhD ପଦବୀ ପାଇଁ ଆବେଦନ ବଢ଼ିଥିବା ଏବଂ ଶିଳ୍ପ କ୍ଷେତ୍ର ସହ ସମ୍ପର୍କ ମଜବୁତ ହୋଇଥିବା ରିପୋର୍ଟରେ ଉଲ୍ଲେଖ ରହିଛି।

​​​​​​​ଏହି ତଥ୍ୟ ବିଦେଶରେ PhD କରିବାକୁ ଇଚ୍ଛୁକ ଛାତ୍ରଛାତ୍ରୀଙ୍କୁ ଦେଶ ଚୟନ କରିବା ସମୟରେ ଆର୍ଥିକ ସୁବିଧା, ଗବେଷଣା ପରିବେଶ ଓ ଜୀବନଯାପନ ଖର୍ଚ୍ଚକୁ ଏକାସାଙ୍ଗରେ ବିଚାର କରିବାର ଆବଶ୍ୟକତା ଦର୍ଶାଉଛି।