ପେଟ୍ରୋଲ ଓ ଡିଜେଲ କ୍ରୟ ଉପରେ ଲାଗିଥିବା କଟକଣାକୁ ସରକାର ପ୍ରତ୍ୟାହାର କରିଛନ୍ତି। ଜୁଲାଇ ୧ ଅର୍ଥାତ୍ ମଙ୍ଗଳବାରଠାରୁ ପେଟ୍ରୋଲ ଓ ଡିଜେଲ କିଣିବା ପାଇଁ ଲାଗୁ ଥିବା ୨୦୦ ଲିଟରର ସର୍ବାଧିକ ସୀମା ଆଉ କାର୍ଯ୍ୟକାରୀ ରହିବ ନାହିଁ। ଏହି ନିଷ୍ପତ୍ତି ସହ ଇନ୍ଧନ କ୍ରୟ ବ୍ୟବସ୍ଥା ପୁଣି ସ୍ୱାଭାବିକ ହୋଇଯିବ।

ସୂଚନାଯୋଗ୍ୟ ଯେ, ଜୁନ୍ ୧୨ ତାରିଖରେ ସରକାର ଏକ ନିର୍ଦ୍ଦେଶ ଜାରି କରି ରିଟେଲ ପେଟ୍ରୋଲ ପମ୍ପରୁ ଗୋଟିଏ ଗାଡ଼ି ପାଇଁ ଦିନକୁ ସର୍ବାଧିକ ୨୦୦ ଲିଟର ପେଟ୍ରୋଲ କିମ୍ବା ଡିଜେଲ କ୍ରୟ କରିବାର ସୀମା ନିର୍ଦ୍ଧାରଣ କରିଥିଲେ। ସେହି ସମୟରେ ଇନ୍ଧନ ଯୋଗାଣ ଓ ବଜାର ପରିସ୍ଥିତିକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଥିଲା।

ଏହି କଟକଣା ଯୋଗୁଁ ବିଶେଷକରି ଭାରୀ ଯାନବାହନ ମାଲିକ, ଟ୍ରକ୍ ଚାଳକ ଏବଂ ପରିବହନ ବ୍ୟବସାୟୀମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଥିଲେ। ଦୂରପାଲ୍ଲା ପରିବହନ ସମୟରେ ଆବଶ୍ୟକ ପରିମାଣର ଇନ୍ଧନ ଏକାଥରେ କିଣିପାରୁନଥିବାରୁ ସେମାନଙ୍କ କାର୍ଯ୍ୟରେ ବାଧା ସୃଷ୍ଟି ହେଉଥିଲା।

ବର୍ତ୍ତମାନ ବଜାରରେ ଇନ୍ଧନ ଯୋଗାଣ ସ୍ଥିତି ସୁଧୁରିଥିବାରୁ ସରକାର ଏହି ପ୍ରତିବନ୍ଧକକୁ ସମ୍ପୂର୍ଣ୍ଣ ହଟାଇବାର ନିଷ୍ପତ୍ତି ନେଇଛନ୍ତି। ଫଳରେ ଜୁଲାଇ ୧ରୁ ଗ୍ରାହକମାନେ ନିଜ ଆବଶ୍ୟକତା ଅନୁସାରେ ପେଟ୍ରୋଲ ଓ ଡିଜେଲ କ୍ରୟ କରିପାରିବେ।

ଏହି ନିଷ୍ପତ୍ତି ଦ୍ୱାରା ବିଶେଷକରି ଦୂରପାଲ୍ଲା ଟ୍ରକ୍, ବାଣିଜ୍ୟିକ ଯାନବାହନ ଚାଳକ ଓ ପରିବହନ କ୍ଷେତ୍ର ସହ ଜଡ଼ିତ ବ୍ୟବସାୟୀମାନେ ବଡ଼ ଆଶ୍ୱସ୍ତି ପାଇବେ ବୋଲି ଆଶା କରାଯାଉଛି।