ସିନ୍ଧୁ ଜଳ ଚୁକ୍ତିନାମାକୁ ନେଇ ଭାରତର କଠୋର ଆଭିମୁଖ୍ୟ ପାକିସ୍ତାନର ସାମରିକ ଏବଂ ରାଜନୈତିକ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି। ଗତ ବର୍ଷ ଏପ୍ରିଲ ୨୨ରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ ୧୯୬୦ ମସିହାର ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଥିଲା। ସେବେଠାରୁ ପାକିସ୍ତାନ ଏହାକୁ ନେଇ ବାରମ୍ବାର ଆପତ୍ତି ପ୍ରକାଶ କରୁଛି।

ପାକିସ୍ତାନର ଜଳ ଆବଶ୍ୟକତାର ବଡ଼ ଅଂଶ ସିନ୍ଧୁ ନଦୀ ବ୍ୟବସ୍ଥା ଉପରେ ନିର୍ଭର କରୁଥିବାରୁ ଭାରତର ଏହି ନିଷ୍ପତ୍ତି ଦେଶର କୃଷି ଓ ଅର୍ଥନୀତି ଉପରେ ପ୍ରଭାବ ପକାଇପାରେ ବୋଲି ପାକିସ୍ତାନରେ ଆଶଙ୍କା ପ୍ରକାଶ ପାଉଛି।

ସମ୍ପ୍ରତି ରାୱଲପିଣ୍ଡିରେ ସେନା ମୁଖ୍ୟ ଜେନେରାଲ ଅସୀମ ମୁନିରଙ୍କ ଅଧ୍ୟକ୍ଷତାରେ ଆୟୋଜିତ ୨୭୬ତମ କୋର୍ପସ କମାଣ୍ଡର ସମ୍ମିଳନୀରେ ସିନ୍ଧୁ ଜଳ ଚୁକ୍ତିନାମା ଉପରେ ବିସ୍ତୃତ ଆଲୋଚନା କରାଯାଇଥିଲା। ସେନା ପକ୍ଷରୁ ଜାରି ବିବୃତିରେ କୁହାଯାଇଛି ଯେ, ଭାରତ ଯଦି ଜଳ ପ୍ରବାହକୁ ରୋକିବା କିମ୍ବା ପରିବର୍ତ୍ତନ କରିବାକୁ ଚେଷ୍ଟା କରେ, ତେବେ ତାହାକୁ ‘ଯୁଦ୍ଧ କାର୍ଯ୍ୟ’ ଭାବେ ବିବେଚନା କରାଯିବ।

ସେହିପରି ପାକିସ୍ତାନ ପିପୁଲ୍ସ ପାର୍ଟି (PPP)ର ଅଧ୍ୟକ୍ଷ ବିଲାୱାଲ ଭୁଟ୍ଟୋ ଜର୍ଦ୍ଦାରୀ ଏକ ସାର୍ବଜନୀନ ସଭାରେ ଭାଷଣ ଦେଇ କହିଛନ୍ତି ଯେ, ଭାରତ ସିନ୍ଧୁ ନଦୀର ଜଳକୁ ଅସ୍ତ୍ର ଭାବେ ବ୍ୟବହାର କରୁଛି। ସେ ଦାବି କରିଛନ୍ତି ଯେ, ପାକିସ୍ତାନ ଏହାକୁ ସହ୍ୟ କରିବ ନାହିଁ ଏବଂ ଜଳ ଅଧିକାର ସୁରକ୍ଷା ପାଇଁ ଆବଶ୍ୟକ ସମସ୍ତ ପଦକ୍ଷେପ ନେବ।

ବିଲାୱାଲ ଆହୁରି କହିଛନ୍ତି ଯେ, ସିନ୍ଧୁ ନଦୀର ଜଳ ଅଧିକାରକୁ ନେଇ ପାକିସ୍ତାନ କୌଣସି ପ୍ରକାର ସାଲିସ କରିବ ନାହିଁ ଏବଂ ଆବଶ୍ୟକ ପଡ଼ିଲେ ସବୁ ମୋର୍ଚ୍ଚାରେ ଲଢ଼ିବାକୁ ପ୍ରସ୍ତୁତ ରହିବ।

ଅନ୍ୟପଟେ, ଭାରତ ପକ୍ଷରୁ ଏହି ସଦ୍ୟ ମନ୍ତବ୍ୟଗୁଡ଼ିକ ଉପରେ କୌଣସି ନୂଆ ସରକାରୀ ପ୍ରତିକ୍ରିୟା ପ୍ରକାଶ ପାଇନାହିଁ। ଦୁଇ ଦେଶ ମଧ୍ୟରେ ଜଳ ବଣ୍ଟନ ପ୍ରସଙ୍ଗ ପୂର୍ବରୁ ମଧ୍ୟ କୂଟନୈତିକ ତିକ୍ତତାର କାରଣ ହୋଇଆସିଛି।