ପାକିସ୍ତାନରେ ଇନ୍ଧନ ଓ ଅନ୍ତର୍ଜାତୀୟ ତୈଳ ମୂଲ୍ୟକୁ ନେଇ ଚାପ ବଢ଼ିବା ପରେ ସରକାର ଇନ୍ଧନ ସଂରକ୍ଷଣ ଓ ଖର୍ଚ୍ଚ କମାଇବା ପାଇଁ ଏକ ନୂଆ Austerity and Fuel Conservation Package ଲାଗୁ କରିଛନ୍ତି। ପାକିସ୍ତାନର କ୍ୟାବିନେଟ୍ ଡିଭିଜନ୍ ପକ୍ଷରୁ ଜାରି ନିର୍ଦ୍ଦେଶ ଅନୁସାରେ ଏହି ପଦକ୍ଷେପଗୁଡ଼ିକ ତୁରନ୍ତ ଲାଗୁ ହୋଇଛି।

ସରକାରୀ ଗାଡ଼ି ପାଇଁ ୫୦% କମିଲା ଇନ୍ଧନ

ନୂଆ ନିୟମ ଅନୁସାରେ ସରକାରୀ ଯାନଗୁଡ଼ିକ ପାଇଁ ଇନ୍ଧନ ଆବଣ୍ଟନ ୩ ମାସ ପାଇଁ ୫୦% କମାଯାଇଛି। ତେବେ ସଶସ୍ତ୍ର ବାହିନୀ, ଆଇନ ଶୃଙ୍ଖଳା ବାହିନୀ, ଜରୁରୀ ସେବା ଏବଂ କିଛି ଅପରେସନାଲ୍ ଯାନକୁ ଏଥିରୁ ବାଦ ଦିଆଯାଇଛି।

ଏହା ସହ ସମସ୍ତ ପ୍ରକାର ନୂଆ ସରକାରୀ ଯାନ କିଣା ଉପରେ ପ୍ରତିବନ୍ଧକ ଲଗାଯାଇଛି। IT ସମ୍ବନ୍ଧୀୟ ଆବଶ୍ୟକ ସାମଗ୍ରୀ ବ୍ୟତୀତ ଅନ୍ୟାନ୍ୟ Durable Goods କିଣା ମଧ୍ୟ ବନ୍ଦ କରାଯାଇଛି।

୩ ମାସ ପାଇଁ ବିଦେଶ ଯାତ୍ରା ବନ୍ଦ

ସରକାରୀ କର୍ମଚାରୀ ଓ ଅଧିକାରୀଙ୍କ ବିଦେଶ ଯାତ୍ରା ଉପରେ ୩ ମାସ ପାଇଁ ରୋକ ଲଗାଯାଇଛି। କିଛି ନିର୍ଦ୍ଦିଷ୍ଟ ଛାଡ଼ ବ୍ୟତୀତ ଏହି ନିୟମ ଲାଗୁ ହେବ। ଅତ୍ୟାବଶ୍ୟକ ବିଦେଶ ଯାତ୍ରା ହେଲେ ମନ୍ତ୍ରୀ ଓ ଅଧିକାରୀମାନଙ୍କୁ Economy Classରେ ଯାତ୍ରା କରିବାକୁ କୁହାଯାଇଛି।

ସରକାରୀ ଡିନର୍‌ରେ କଟକଣା

ସରକାରୀ ଖର୍ଚ୍ଚରେ ଆୟୋଜିତ Official Dinner ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି। କେବଳ ବିଦେଶୀ ପ୍ରତିନିଧିମଣ୍ଡଳୀଙ୍କ ସମ୍ମାନରେ ଆବଶ୍ୟକ ଡିନର୍‌କୁ ଛାଡ଼ ଦିଆଯାଇଛି। ସରକାରୀ ଅର୍ଥରେ ଅନାବଶ୍ୟକ ସେମିନାର, ଟ୍ରେନିଂ ଓ କନଫରେନ୍ସ ଆୟୋଜନକୁ ମଧ୍ୟ ନିୟନ୍ତ୍ରଣ କରାଯାଇଛି।

ବିବାହରେ କେବଳ ଗୋଟିଏ ଡିସ୍‌

ଇନ୍ଧନ ଓ ଖର୍ଚ୍ଚ ସଂରକ୍ଷଣ ପାଇଁ ବିବାହ ଏବଂ ଅନ୍ୟାନ୍ୟ ଉତ୍ସବରେ କେବଳ ଗୋଟିଏ ପ୍ରକାର ଖାଦ୍ୟ ପରିବେଷଣ କରିବାକୁ ନିର୍ଦ୍ଦେଶ ରହିଛି। ଏହା ସହ ମ୍ୟାରେଜ୍ ହଲ୍, ମାର୍କି ଓ ଅନ୍ୟାନ୍ୟ ଉତ୍ସବ ସ୍ଥଳକୁ ରାତି ୧୦ଟା ସୁଦ୍ଧା ବନ୍ଦ କରିବାକୁ ପଡ଼ିବ।

ରାତି ୯ଟାରେ ବନ୍ଦ ହେବ ବଜାର

ଦୋକାନ, ବଜାର, ସପିଂ ମଲ୍‌, ବଜାର ଅଞ୍ଚଳ ଏବଂ ସାଧାରଣ ଦୋକାନଗୁଡ଼ିକୁ ରାତି ୯ଟା ସୁଦ୍ଧା ବନ୍ଦ କରିବାକୁ ନିର୍ଦ୍ଦେଶ ରହିଛି। ରେଷ୍ଟୁରାଣ୍ଟ, କାଫେ ଓ ଫୁଡ୍ ଆଉଟଲେଟ୍‌ଗୁଡ଼ିକ ରାତି ୧୧ଟା ପର୍ଯ୍ୟନ୍ତ ଚାଲିପାରିବେ। ହସ୍ପିଟାଲ, ଫାର୍ମାସି, ପେଟ୍ରୋଲ-ସିଏନ୍‌ଜି ପମ୍ପ, EV ଚାର୍ଜିଂ ସେଣ୍ଟର, ଜିମ୍‌, IT କମ୍ପାନି ଓ କଲ୍ ସେଣ୍ଟର ଭଳି ଜରୁରୀ କ୍ଷେତ୍ରକୁ ଏହି ସମୟସୀମାରୁ ଛାଡ଼ ଦିଆଯାଇଛି।

ପାକିସ୍ତାନ ସରକାରଙ୍କ ଅନୁସାରେ, ଅନ୍ତର୍ଜାତୀୟ ତୈଳ ମୂଲ୍ୟ ବୃଦ୍ଧି ଓ ମଧ୍ୟପ୍ରାଚ୍ୟରେ ଚାଲିଥିବା ଉତ୍ତେଜନାର ପ୍ରଭାବରେ ଦେଶରେ ଇନ୍ଧନ ଓ ସରକାରୀ ଖର୍ଚ୍ଚ ଉପରେ ଚାପ ବଢ଼ିଛି। ଏହି ପରିସ୍ଥିତିରେ ଇନ୍ଧନ ସଂରକ୍ଷଣ ଓ ସରକାରୀ ଖର୍ଚ୍ଚ କମାଇବା ଲକ୍ଷ୍ୟରେ ଏହି ପଦକ୍ଷେପ ନିଆଯାଇଛି।