ଓଡ଼ିଶା ସ୍କୁଲ ପାଠ୍ୟପୁସ୍ତକରେ ଥିବା କଥିତ ତ୍ରୁଟି ମାମଲାରେ କ୍ରାଇମବ୍ରାଞ୍ଚ ତଦନ୍ତ ଆହୁରି ତୀବ୍ର ହୋଇଛି। ବୁଧବାର କ୍ରାଇମବ୍ରାଞ୍ଚର ଚାରି ଜଣିଆ ଟିମ୍ ରାଜ୍ୟ ଶିକ୍ଷା ଗବେଷଣା ଓ ପ୍ରଶିକ୍ଷଣ ପରିଷଦ (SCERT) କାର୍ଯ୍ୟାଳୟରେ ପହଞ୍ଚି ନିର୍ଦ୍ଦେଶିକା ମଧୁସ୍ମିତା ସାହୁଙ୍କୁ ପଚରାଉଚରା କରିଛି।

ସୂଚନା ଅନୁସାରେ, ୨୦୧୩ ବ୍ୟାଚ୍ର IAS ଅଧିକାରୀ ମଧୁସ୍ମିତା ସାହୁଙ୍କୁ ତାଙ୍କ ଚାମ୍ବରରେ ତଦନ୍ତକାରୀ ଅଧିକାରୀମାନେ ବିଭିନ୍ନ ପ୍ରଶ୍ନ କରିଥିଲେ। ପାଠ୍ୟପୁସ୍ତକରେ ଥିବା କଥିତ ତ୍ରୁଟି ଓ ଏହାର ପ୍ରସ୍ତୁତି ପ୍ରକ୍ରିୟା ସମ୍ପର୍କରେ କ୍ରାଇମବ୍ରାଞ୍ଚ ତଥ୍ୟ ସଂଗ୍ରହ କରୁଛି।

ଏହା ସହିତ ଦୁଇଟି ଅଲଗା କକ୍ଷରେ ଦୁଇ ଜଣ ଲେଖାଏଁ ଅଧିକାରୀଙ୍କୁ ନିୟୋଜିତ କରାଯାଇ ଗୁରୁତ୍ୱପୂର୍ଣ୍ଣ ଦସ୍ତାବିଜ ଓ ସରକାରୀ ରେକର୍ଡ ଯାଞ୍ଚ କରାଯାଇଥିଲା। ନିର୍ଦ୍ଦେଶିକାଙ୍କ ସହ ଆଲୋଚନା ପରେ ତଦନ୍ତକାରୀ ଟିମ୍ ପାଠ୍ୟପୁସ୍ତକଗୁଡ଼ିକୁ ମଧ୍ୟ ଯାଞ୍ଚ କରିଥିଲା।

ଏହି ଘଟଣା ପାଠ୍ୟପୁସ୍ତକ ବିବାଦ ମାମଲାରେ କ୍ରାଇମବ୍ରାଞ୍ଚ ତଦନ୍ତର ଆଉ ଏକ ବଡ଼ ପଦକ୍ଷେପ ବୋଲି କୁହାଯାଉଛି। ତଦନ୍ତକାରୀ ଅଧିକାରୀମାନେ ବିଭିନ୍ନ ଦସ୍ତାବିଜ ସଂଗ୍ରହ କରିବା ସହ ଘଟଣାକ୍ରମ ଯାଞ୍ଚ କରୁଛନ୍ତି।

ଏହା ପୂର୍ବରୁ ଏହି ମାମଲାରେ କ୍ରାଇମବ୍ରାଞ୍ଚ ପୂର୍ବତନ SCERT ନିର୍ଦ୍ଦେଶକ ମନୋଜ ପାଢ଼ୀଙ୍କୁ ଗିରଫ କରିଥିଲା। ପାଠ୍ୟପୁସ୍ତକ ପ୍ରସ୍ତୁତି ଓ ପ୍ରକାଶନ ପ୍ରକ୍ରିୟାରେ କୌଣସି ଅନିୟମିତତା ହୋଇଛି କି ନାହିଁ, ସେନେଇ ଅଧିକ ପ୍ରମାଣ ସଂଗ୍ରହ କରୁଛି କ୍ରାଇମବ୍ରାଞ୍ଚ।

ଏହି ମାମଲାରେ ଭାରତୀୟ ନ୍ୟାୟ ସଂହିତା (BNS), ୨୦୨୩ ଅନୁସାରେ ଅପରାଧିକ ଷଡଯନ୍ତ୍ର ଓ ଆର୍ଥିକ ଅନିୟମିତତା ସମ୍ପର୍କିତ ଧାରାରେ ମାମଲା ରୁଜୁ ହୋଇଛି।