ଓଡ଼ିଶା କ୍ରାଇମବ୍ରାଞ୍ଚର ସ୍ପେଶାଲ୍ ଟାସ୍କ ଫୋର୍ସ (STF) ଆନ୍ତଃରାଜ୍ୟ ଗଞ୍ଜେଇ ଚୋରାଚାଲାଣ ବିରୋଧରେ ବଡ଼ ସଫଳତା ହାସଲ କରିଛି। ପଶ୍ଚିମବଙ୍ଗର ପୂର୍ବ ମେଦିନୀପୁରରୁ ଚୋରାଚାଲାଣ ଚକ୍ରର କଥିତ କିଙ୍ଗପିନ୍ରତନ ମଣ୍ଡଳଙ୍କୁ STF ଗିରଫ କରିଛି। ସେ ଜାନୁଆରୀ ୨୦୨୫ ଠାରୁ ଫେରାର ଥିଲେ।

ଏସ୍ଟିଏଫ୍ ସୂଚନା ଅନୁସାରେ, ୨୫ ଦିନ ଧରି ଚାଲିଥିବା ଗୁପ୍ତ ଅଭିଯାନ ପରେ ରତନଙ୍କୁ ଗିରଫ କରାଯାଇଛି। ସେ କନ୍ଧମାଳ, ବୌଦ୍ଧ ଓ ସୋନପୁର ଜିଲ୍ଲାରୁ ଗଞ୍ଜେଇ ସଂଗ୍ରହ କରି ଦେଶର ବିଭିନ୍ନ ରାଜ୍ୟକୁ ପଠାଉଥିବା ଆନ୍ତଃରାଜ୍ୟ ଚକ୍ରର ଜଣେ ପ୍ରମୁଖ ସଦସ୍ୟ ବୋଲି ତଦନ୍ତରେ ଜଣାପଡ଼ିଛି।

ଅଧା ଛିଣ୍ଡା ନୋଟ୍ରେ ହେଉଥିଲା ପରିଚୟ

ତଦନ୍ତ ବେଳେ STF ଏକ ଅଧା ଛିଣ୍ଡା କରେନ୍ସି ନୋଟ୍ ଜବତ କରିଛି। ତଦନ୍ତକାରୀଙ୍କ ଅନୁସାରେ, ଏହି ଅଧା ନୋଟ୍କୁ ଗଞ୍ଜେଇ କାରବାରରେ ଗୁପ୍ତ ପରିଚୟ ଚିହ୍ନ ଭାବେ ବ୍ୟବହାର କରାଯାଉଥିଲା।

ନୋଟ୍ର ଗୋଟିଏ ଅଂଶ ସପ୍ଲାୟରଙ୍କ ପାଖରେ ରହୁଥିବାବେଳେ ଅନ୍ୟ ଅଂଶ ଗ୍ରାହକଙ୍କ ପାଖରେ ରହୁଥିଲା। ଦୁଇଟି ଅଂଶ ମେଳ ଖାଇବା ପରେ ହିଁ ଗଞ୍ଜେଇ ହସ୍ତାନ୍ତର କରାଯାଉଥିଲା ବୋଲି STF ସନ୍ଦେହ କରୁଛି।

ଆନ୍ତଃରାଜ୍ୟ ନେଟୱର୍କର ତଦନ୍ତ ଜାରି

STFର ଡିଆଇଜି କନୱର ବିଶାଳ ସିଂହ କହିଛନ୍ତି, ରତନ ମଣ୍ଡଳଙ୍କ ସମ୍ପୃକ୍ତତା ଅନେକ ଗଞ୍ଜେଇ ଚୋରାଚାଲାଣ ମାମଲାରେ ସାମ୍ନାକୁ ଆସିଛି। ଏହି ଚକ୍ର ସହ ଜଡ଼ିତ ଅନ୍ୟ ସଦସ୍ୟଙ୍କ ଚିହ୍ନଟ, ଆର୍ଥିକ କାରବାର ଏବଂ ଆନ୍ତଃରାଜ୍ୟ ନେଟୱର୍କର ସମ୍ପୂର୍ଣ୍ଣ ଖୋଳତାଡ଼ ଜାରି ରହିଛି।