ବନ୍ୟା ବିପତ୍ତିରୁ ଓଡ଼ିଶା ଧୀରେ ଧୀରେ ମୁକୁଳୁଥିବା ବେଳେ ପୁଣି ଚିନ୍ତା ବଢ଼ାଇଛି ନୂଆ ବର୍ଷା ସ୍ପେଲ୍। ସକ୍ରିୟ ମୌସୁମୀ ବାୟୁ ପ୍ରଭାବରେ ରାଜ୍ୟର ବିଭିନ୍ନ ଅଞ୍ଚଳରେ ପୁଣି ବର୍ଷା ଆରମ୍ଭ ହୋଇଛି। ଆସନ୍ତା ୪ ଦିନ ଧରି ବର୍ଷା ଜାରି ରହିବା ସହ ବଜ୍ରପାତ ଓ ଘଡ଼ଘଡ଼ି ନେଇ ମଧ୍ୟ ପାଣିପାଗ ବିଭାଗ ସତର୍କ କରିଛି।

ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୋମବାର ୨୫ଟି ଜିଲ୍ଲା ପାଇଁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ଏହାସହ ସମ୍ବଲପୁର, ସୁନ୍ଦରଗଡ଼, ଦେବଗଡ଼, ଅନୁଗୁଳ, କେନ୍ଦୁଝର ଓ ମୟୂରଭଞ୍ଜ ଜିଲ୍ଲାରେ ପ୍ରବଳ ବର୍ଷା ହେବା ନେଇ ସତର୍କତା ଜାରି ହୋଇଛି।

🌧️ ବନ୍ୟା ପରେ ପୁଣି ବର୍ଷା, ବଢ଼ିଲା ଚିନ୍ତା

ରବିବାର ସକାଳେ ବର୍ଷାରୁ ସାମାନ୍ୟ ଆଶ୍ୱସ୍ତି ମିଳିଥିଲା। ବିଭିନ୍ନ ପ୍ରମୁଖ ନଦୀରେ ଜଳସ୍ତର ମଧ୍ୟ ଧୀରେ ଧୀରେ କମିବା ଆରମ୍ଭ କରିଥିଲା। ଏହା ମଧ୍ୟରେ ପୁଣି ବର୍ଷା ପୂର୍ବରୁ ବନ୍ୟା ପ୍ରଭାବିତ ଅଞ୍ଚଳର ଲୋକଙ୍କ ଚିନ୍ତା ବଢ଼ାଇଛି।

ବିଶେଷକରି ହୀରାକୁଦ ଜଳଭଣ୍ଡାରକୁ ଅଧିକ ଜଳ ପ୍ରବେଶ କରିବା ନେଇ ଲୋକଙ୍କ ମଧ୍ୟରେ ଆଶଙ୍କା ରହିଛି। ବର୍ଷା ଯୋଗୁଁ ଜଳଭଣ୍ଡାରର ଜଳସ୍ତର ବଢ଼ିଲେ ଅଧିକ ସ୍ଲୁଇସ୍‌ ଗେଟ୍ ଖୋଲିବାକୁ ପଡ଼ିପାରେ। ଫଳରେ ମହାନଦୀ ଓ ଏହାର ଶାଖାନଦୀଗୁଡ଼ିକର ଜଳସ୍ତର ପୁଣି ବଢ଼ିବାର ଆଶଙ୍କା ରହିଛି।

🌾 ଚାଷୀଙ୍କ ଚିନ୍ତା ବଢ଼ାଇଲା ବର୍ଷା

ନୂଆ ବର୍ଷା ପୂର୍ବରୁ ବନ୍ୟାରେ କ୍ଷତିଗ୍ରସ୍ତ ଚାଷୀଙ୍କ ଚିନ୍ତାକୁ ଆହୁରି ବଢ଼ାଇଛି। ବିଶେଷକରି ଯାଜପୁର ଓ ଜଗତସିଂହପୁର ଭଳି କୃଷିପ୍ରଧାନ ଜିଲ୍ଲାରେ ବହୁ ଚାଷଜମି ଏବେ ବି ପାଣିରେ ବୁଡ଼ି ରହିଛି।

ଅନେକ ସ୍ଥାନରେ ଧାନ ସମେତ ବିଭିନ୍ନ ଫସଲ ଓ ପନିପରିବା ଚାଷ ପାଣିରେ ବୁଡ଼ି ରହିଥିବାରୁ ଚାଷୀମାନେ ପୂର୍ବରୁ ବଡ଼ କ୍ଷତିର ସମ୍ମୁଖୀନ ହୋଇଛନ୍ତି। ଏବେ ପୁଣି ବର୍ଷା ହେଲେ ଫସଲ କ୍ଷତି ଆହୁରି ବଢ଼ିବା ଆଶଙ୍କା ଦେଖାଦେଇଛି।