ଭୁବନେଶ୍ୱର: ମୌସୁମୀ ବର୍ଷା ସମୟରେ ପ୍ରବଳ ବର୍ଷା, ବନ୍ୟା ଓ ଭୂସ୍ଖଳନ ଯୋଗୁଁ ରାଜ୍ୟର ଅନେକ ରାସ୍ତା କ୍ଷତିଗ୍ରସ୍ତ ହୋଇଛି। ଏବେ ମୌସୁମୀ ପରବର୍ତ୍ତୀ ସମୟରେ ଏହି ରାସ୍ତାଗୁଡ଼ିକର ଶୀଘ୍ର ମରାମତି ଓ ପୁନରୁଦ୍ଧାର ପାଇଁ ଓଡ଼ିଶା ସରକାର ପଦକ୍ଷେପ ନେଇଛନ୍ତି। ଲୋକ ନିର୍ମାଣ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ରାସ୍ତା ଓ ଚାଲିଥିବା ମରାମତି କାମର ସ୍ଥିତି ନେଇ ଏକ ଉଚ୍ଚସ୍ତରୀୟ ବୈଠକ କରିଛନ୍ତି।

ଲୋକସେବା ଭବନରେ ହୋଇଥିବା ଏହି ବୈଠକରେ ରାଜ୍ୟର ବିଭିନ୍ନ ଅଞ୍ଚଳରେ କ୍ଷତିଗ୍ରସ୍ତ ରାସ୍ତାର ସ୍ଥିତି ସମୀକ୍ଷା କରାଯାଇଥିଲା। ବିଶେଷକରି ଚଳିତ ବର୍ଷର ପ୍ରବଳ ବର୍ଷା, ବନ୍ୟା ଓ ଭୂସ୍ଖଳନ ଯୋଗୁଁ ଯେଉଁ ରାସ୍ତାଗୁଡ଼ିକ କ୍ଷତିଗ୍ରସ୍ତ ହୋଇଛି, ସେଗୁଡ଼ିକର ପୁନରୁଦ୍ଧାର କାମ ଶୀଘ୍ର ଶେଷ କରିବା ଉପରେ ଆଲୋଚନା ହୋଇଥିଲା।

ବୈଠକରେ ନଖରା-ନିଆଳି, ଆଡ଼ଶପୁର-ଜଗତସିଂହପୁର ଏବଂ କଳିଙ୍ଗ ଘାଟି ରାସ୍ତା ସମେତ କୋରାପୁଟ, ଭଦ୍ରକ, ବାଲେଶ୍ୱର, କଟକ ସହର, ଗଞ୍ଜାମ, ସମ୍ବଲପୁର, କେନ୍ଦୁଝର ଓ ପାରାଦୀପ ଅଞ୍ଚଳର ବିଭିନ୍ନ ରାସ୍ତାର ସ୍ଥିତି ଉପରେ ଆଲୋଚନା ହୋଇଥିଲା।

ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି ଯେ, ରାଜ୍ୟରେ ଉତ୍ତମ ରାସ୍ତା ଯୋଗାଯୋଗ ନିଶ୍ଚିତ କରିବା ସରକାରଙ୍କ ଦାୟିତ୍ୱ। ରାସ୍ତା ମରାମତି କାମରେ ଅବହେଳାକୁ ବରଦାସ୍ତ କରାଯିବ ନାହିଁ। ନିର୍ମାଣ ଓ ମରାମତି କାମର ଗୁଣବତ୍ତା ଉପରେ ମଧ୍ୟ କଡ଼ା ନଜର ରଖିବାକୁ ଅଧିକାରୀଙ୍କୁ କୁହାଯାଇଛି।

ଏଥିପାଇଁ ଇଞ୍ଜିନିୟର-ଇନ୍-ଚିଫ୍ ଠାରୁ ଆରମ୍ଭ କରି ଚିଫ୍ ଇଞ୍ଜିନିୟର, ସୁପରିଟେଣ୍ଡିଂ ଇଞ୍ଜିନିୟର ଓ ଜୁନିୟର ଇଞ୍ଜିନିୟର ପର୍ଯ୍ୟନ୍ତ ସମସ୍ତଙ୍କୁ ନିଜ ଅଧୀନରେ ଥିବା ରାସ୍ତାଗୁଡ଼ିକୁ ନିୟମିତ ଯାଞ୍ଚ କରିବାକୁ ନିର୍ଦ୍ଦେଶ ମିଳିଛି। ରାସ୍ତାର ବର୍ତ୍ତମାନ ସ୍ଥିତି ନେଇ ପ୍ରତି ୧୫ ଦିନରେ ରିପୋର୍ଟ ଦାଖଲ କରିବାକୁ ମଧ୍ୟ କୁହାଯାଇଛି।

କ୍ଷତିଗ୍ରସ୍ତ ରାସ୍ତାର ମରାମତି ସହ ନିର୍ମାଣ କାମର ଗୁଣବତ୍ତା ଯାଞ୍ଚ ଉପରେ ମଧ୍ୟ ଗୁରୁତ୍ୱ ଦିଆଯାଇଛି। କାମ ସମୟରେ ଇଞ୍ଜିନିୟରମାନେ ଉପସ୍ଥିତ ରହି ନିର୍ମାଣର ମାନ ଯାଞ୍ଚ କରିବେ। କୌଣସି ଠିକାଦାର ସଂସ୍ଥାର କାମରେ ଗୁଣବତ୍ତାର ଅଭାବ ମିଳିଲେ ତାଙ୍କ ବିରୋଧରେ ଆଇନଗତ ପଦକ୍ଷେପ ନେବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି।

ଏହାସହ ଟେଣ୍ଡର ପ୍ରକ୍ରିୟାକୁ ଅଧିକ ସ୍ୱଚ୍ଛ ଓ ଶୀଘ୍ର କରିବା ନେଇ ମଧ୍ୟ ବୈଠକରେ ଆଲୋଚନା ହୋଇଛି। ରାସ୍ତା ମରାମତି କାମରେ ଅନାବଶ୍ୟକ ବିଳମ୍ବ ଯେପରି ନହୁଏ, ସେଥିପାଇଁ ବିଭାଗୀୟ ପ୍ରକ୍ରିୟାକୁ ତ୍ୱରାନ୍ୱିତ କରିବା ଉପରେ ଜୋର ଦିଆଯାଇଛି।

ମୌସୁମୀ ବର୍ଷା ପରେ ରାସ୍ତାରେ ସୃଷ୍ଟି ହୋଇଥିବା ଖାଲଖମା, ଭାଙ୍ଗିଯାଇଥିବା ରାସ୍ତା ଓ ଅନ୍ୟାନ୍ୟ କ୍ଷତି ଯୋଗୁଁ ଯାତାୟାତ ପ୍ରଭାବିତ ହେବା ସହ ଦୁର୍ଘଟଣାର ଆଶଙ୍କା ମଧ୍ୟ ରହିଥାଏ। ତେଣୁ ରାସ୍ତାଗୁଡ଼ିକର ସ୍ଥିତି ଯାଞ୍ଚ କରି ଆବଶ୍ୟକ ସ୍ଥାନରେ ଶୀଘ୍ର ମରାମତି କରିବା ସରକାରଙ୍କ ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ। ଚଳିତ ବର୍ଷ ପ୍ରବଳ ବର୍ଷାରେ ଓଡ଼ିଶାର ବିଭିନ୍ନ ସ୍ଥାନରେ ରାସ୍ତା ଓ ଅନ୍ୟାନ୍ୟ ଭିତ୍ତିଭୂମି କ୍ଷତିଗ୍ରସ୍ତ ହୋଇଥିବା ରିପୋର୍ଟ ମଧ୍ୟ ପ୍ରକାଶ ପାଇଛି।