ଭୁବନେଶ୍ବର : ରାଜ୍ୟର ସରକାରୀ ଡାକ୍ତରଖାନା ଓ ସ୍ୱାସ୍ଥ୍ୟ କେନ୍ଦ୍ରଗୁଡ଼ିକ ପାଇଁ ସ୍ୱାସ୍ଥ୍ୟ ଉପକରଣ କ୍ରୟ ପ୍ରକ୍ରିୟାରେ ସ୍ୱଚ୍ଛତା ବଜାୟ ରଖିବା ସହ ବାହାରିଆ ବ୍ୟକ୍ତି କିମ୍ବା ଭେଣ୍ଡରଙ୍କ ଅନୁଚିତ ଚାପ ଓ ହସ୍ତକ୍ଷେପକୁ ରୋକିବା ପାଇଁ ରାଜ୍ୟ  ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ କଡ଼ା ନିର୍ଦ୍ଦେଶ ଜାରି କରିଛି। ଏହି ସମ୍ପର୍କରେ ବିଭାଗୀୟ କମିଶନର-ତଥା-ଶାସନ ସଚିବ   ରାଜ୍ୟର ସମସ୍ତ ଜିଲ୍ଲା ମୁଖ୍ୟ ଚିକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀ (CDM & PHO)ଙ୍କୁ ପତ୍ର ଲେଖି ଅବଗତ କରାଇଛନ୍ତି।
​​​​​​​
କିଛି ଜିଲ୍ଲାରେ ବାହାରିଆ ବ୍ୟକ୍ତି କିମ୍ବା ଭେଣ୍ଡରମାନେ ଜିଲ୍ଲା ଅଧିକାରୀଙ୍କ ସହ ସିଧାସଳଖ ଯୋଗାଯୋଗ କରି କ୍ରୟ ପ୍ରକ୍ରିୟାକୁ ବିଳମ୍ବିତ କରିବା, ଅନୁମୋଦିତ ବୈଷୟିକ ନିର୍ଦ୍ଦିଷ୍ଟତା (Technical Specifications) ବଦଳାଇବା କିମ୍ବା ନିଜ ସୁବିଧା ଅନୁସାରେ ନିୟମକାନୁନ ବଦଳାଇବାକୁ ଚେଷ୍ଟା କରୁଥିବା ଅଭିଯୋଗ ସାମ୍ନାକୁ ଆସିଥିଲା। ବହୁ ସ୍ଥାନରେ ପ୍ରଭାବଶାଳୀ ବ୍ୟକ୍ତି ଓ ରାଜନେତାଙ୍କ ନାମ ନେଇ ବହୁ ଚାପ ସୃଷ୍ଟି କରାଯାଉଛି। ଏନେଇ ସ୍ବାସ୍ଥ୍ୟ ବିଭାଗ ନିକଟରେ ଅଭିଯୋଗ ବଢିବା ପରେ ବିଭାଗ କଡ଼ା କାର୍ଯ୍ୟାନୁଷ୍ଠାନ ନେଇଛନ୍ତି। କେତେକ ଲୋକ ରାଜନେତାଙ୍କ ଅନୁଗତ ତ କିଏ ଅନ୍ୟ ପ୍ରଭାବଶାଳୀ ବ୍ୟକ୍ତଙ୍କ କଥା କହି ଜିନିଷ କ୍ରୟ କ୍ଷେତ୍ରରେ ଅନୁକମ୍ପା ଦେଖାଇବାକୁ ଚାପ ସୃଷ୍ଟି ନେଇ ସ୍ବାସ୍ଥ୍ୟ ବିଭାଗରେ ଅଭିଯୋଗ ହୋଇଥିଲା।  ଏହାକୁ ଗମ୍ଭୀରତାର ସହ ନେଇ ସରକାର ନିମ୍ନଲିଖିତ କଡ଼ା ନିର୍ଦ୍ଦେଶାବଳୀ ଜାରି କରିଛନ୍ତି। ଅନୁମୋଦିତ ନିୟମାବଳୀର କଠୋର ପାଳନ:** ଜିଲ୍ଲା ସ୍ତରରେ ଯନ୍ତ୍ରପାତି ଓ ଉପକରଣ କ୍ରୟ କେବଳ OSMCL, NHM କିମ୍ବା ସ୍ୱାସ୍ଥ୍ୟ ବିଭାଗ ଦ୍ୱାରା ଅନୁମୋଦିତ ବୈଷୟିକ ନିର୍ଦ୍ଦିଷ୍ଟତା ଏବଂ OGFR ନିୟମ ଅନୁଯାୟୀ ହେବ। ଉପଯୁକ୍ତ କର୍ତ୍ତୃପକ୍ଷଙ୍କ ଲିଖିତ ପୂର୍ବାନୁମତି ବିନା ଏଥିରେ କୌଣସି ପରିବର୍ତ୍ତନ କରାଯାଇପାରିବ ନାହିଁ।

 *ଗୋପନୀୟତା ରକ୍ଷା:* ସରକାରୀ ଟେଣ୍ଡର ପୋର୍ଟାଲ କିମ୍ବା ପ୍ରକାଶିତ ଟେଣ୍ଡର କାଗଜପତ୍ର ବ୍ୟତୀତ ଅନ୍ୟ କୌଣସି ମାଧ୍ୟମରେ କୌଣସି ଜିଲ୍ଲା ଅଧିକାରୀ ଆଭ୍ୟନ୍ତରୀଣ ଫାଇଲ୍ ନୋଟିଂ କିମ୍ବା ତୁଳନାତ୍ମକ ତଥ୍ୟ (Comparative Statements) ବ୍ୟବସାୟୀ/ଭେଣ୍ଡରଙ୍କ ସହ ସେୟାର କରିପାରିବେ ନାହିଁ।
​​​​​​​
* *କେବଳ ଅଫିସିଆଲ ମାଧ୍ୟମରେ ଯୋଗାଯୋଗ:* ଟେଣ୍ଡରଦାତାଙ୍କ ସହ ସମସ୍ତ ଯୋଗାଯୋଗ କେବଳ ଅଫିସିଆଲ ଇମେଲ୍ କିମ୍ବା ଟେଣ୍ଡର ପୋର୍ଟାଲ ମାଧ୍ୟମରେ ଲିଖିତ ଆକାରରେ ହେବ। କ୍ରୟ ପ୍ରକ୍ରିୟା ସମ୍ପର୍କରେ କୌଣସି ବ୍ୟକ୍ତିଗତ ସାକ୍ଷାତକାର କିମ୍ବା ଫୋନ୍ କଲ୍‌କୁ ସମ୍ପୂର୍ଣ୍ଣ ବାରଣ କରାଯାଇଛି।
* *ଚାପ କିମ୍ବା ପ୍ରଲୋଭନ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ:*
 ଯଦି କୌଣସି ବ୍ୟକ୍ତି କ୍ରୟ ପ୍ରକ୍ରିୟାରେ ଭୟଭୀତ କରିବାକୁ, ଧମକ ଦେବାକୁ, ଅନୁଚିତ ଚାପ ପକାଇବାକୁ କିମ୍ବା ପ୍ରଲୋଭନ ଦେବାକୁ ଚେଷ୍ଟା କରନ୍ତି, ତେବେ ତାହାକୁ ତୁରନ୍ତ ଲିଖିତ ଭାବେ ନଥିଭୁକ୍ତ କରି ରାଜ୍ୟ ସ୍ୱାସ୍ଥ୍ୟ ବିଭାଗର ବରିଷ୍ଠ ଅଧିକାରୀ ଏବଂ ଜିଲ୍ଲାପାଳଙ୍କୁ ଜଣାଇବାକୁ କୁହାଯାଇଛି।
​​​​​​​
ଏହି ନିର୍ଦ୍ଦେଶନାମାକୁ ଅତ୍ୟନ୍ତ ଜରୁରୀ ବିବେଚନା କରି ସମସ୍ତ ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟଙ୍କୁ ମଧ୍ୟ ଅବଗତି ଓ ଆବଶ୍ୟକୀୟ କାର୍ଯ୍ୟାନୁଷ୍ଠାନ ପାଇଁ ନକଲ ପ୍ରେରଣ କରାଯାଇଛି।