ଭୁବନେଶ୍ୱର: ଓଡ଼ିଶାର ବିଭିନ୍ନ ଜିଲ୍ଲାରେ ପ୍ରବଳ ବର୍ଷା ଓ ବନ୍ୟା ଯୋଗୁଁ ପ୍ରଭାବିତ ଲୋକଙ୍କୁ କ୍ଷତିପୂରଣ ପ୍ରଦାନ ପ୍ରକ୍ରିୟାକୁ ତ୍ୱରାନ୍ୱିତ କରାଯାଉଛି। ଏନେଇ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଗୁରୁବାର ଭୁବନେଶ୍ୱରର ରାଜୀବ ଭବନରେ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ କରିଛନ୍ତି। ବୈଠକରେ ଗଜପତି, ନବରଙ୍ଗପୁର, କୋରାପୁଟ, ମାଲକାନଗିରି, ବାଲେଶ୍ୱର, ଭଦ୍ରକ ଓ ଯାଜପୁର ଜିଲ୍ଲାର ଜିଲ୍ଲାପାଳଙ୍କ ସହ ବନ୍ୟା ପରିସ୍ଥିତି ଓ କ୍ଷତିପୂରଣ ବଣ୍ଟନ ନେଇ ଆଲୋଚନା କରାଯାଇଛି।

ସରକାରଙ୍କ ପକ୍ଷରୁ ବନ୍ୟା ଓ ବର୍ଷାରେ ପ୍ରଭାବିତ ଜିଲ୍ଲାଗୁଡ଼ିକ ପାଇଁ ମୋଟ୨୪୧.୩୭ କୋଟି ଟଙ୍କାକ୍ଷତିପୂରଣ ପାଇଁ ଯୋଗାଇ ଦିଆଯାଇଛି। ପ୍ରଭାବିତ ଲୋକମାନେ ଯେପରି ଶୀଘ୍ର ସହାୟତା ପାଇପାରିବେ, ସେଥିପାଇଁ ଜିଲ୍ଲା ପ୍ରଶାସନକୁ ପ୍ରକ୍ରିୟା ତ୍ୱରାନ୍ୱିତ କରିବାକୁ ମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।

ଜିଲ୍ଲାୱାରୀ ଭାବେ ନବରଙ୍ଗପୁରକୁ ୫ କୋଟି, ଗଞ୍ଜାମ ଓ ଗଜପତିକୁ ୨ କୋଟି ଲେଖାଏଁ ଏବଂ ଝାରସୁଗୁଡ଼ାକୁ ୧ କୋଟି ଟଙ୍କା ଯୋଗାଇ ଦିଆଯାଇଛି। କେନ୍ଦ୍ରାପଡ଼ାକୁ ୧୬.୦୪ କୋଟି, ଯାଜପୁରକୁ ୫୨.୦୪ କୋଟି, ଭଦ୍ରକକୁ ୬୪.୫୪ କୋଟି ଏବଂ ବାଲେଶ୍ୱରକୁ ୨୬.୯୨ କୋଟି ଟଙ୍କା ଯୋଗାଇ ଦିଆଯାଇଛି।

ଏହା ମଧ୍ୟରୁ କେତେକ ଜିଲ୍ଲାରେ କ୍ଷତିପୂରଣ ରାଶିର ବ୍ୟବହାର ଆରମ୍ଭ ହୋଇସାରିଛି। କେନ୍ଦ୍ରାପଡ଼ାରେ ମିଳିଥିବା ୧୬.୦୪ କୋଟି ଟଙ୍କାରୁ ପ୍ରାୟ ୧୧.୨୧ କୋଟି ଟଙ୍କା ବଣ୍ଟନ/ବ୍ୟବହାର ହୋଇଛି। ଯାଜପୁରରେ ୫୨.୦୪ କୋଟି ଟଙ୍କାରୁ ପ୍ରାୟ ୩୩.୮୦ କୋଟି ଏବଂ ଭଦ୍ରକରେ ୬୪.୫୪ କୋଟି ଟଙ୍କାରୁ ୪୩.୨୮ କୋଟି ଟଙ୍କା ବ୍ୟବହାର ହୋଇଛି। ବାଲେଶ୍ୱରରେ ମିଳିଥିବା ୨୬.୯୨ କୋଟି ଟଙ୍କାରୁ ପ୍ରାୟ ୫.୯୪ କୋଟି ଟଙ୍କା ବ୍ୟବହାର ହୋଇଥିବା ରିପୋର୍ଟ ହୋଇଛି।

ବାରମ୍ବାର ବର୍ଷା ହେଉଥିବାରୁ କେତେକ ଅଞ୍ଚଳରେ କ୍ଷୟକ୍ଷତିର ସମ୍ପୂର୍ଣ୍ଣ ଆକଳନ କରିବାରେ ସମସ୍ୟା ହୋଇଥିବା ମନ୍ତ୍ରୀ କହିଛନ୍ତି। ତଥାପି ପ୍ରଭାବିତ ଲୋକଙ୍କୁ ନିର୍ଦ୍ଧାରିତ ସମୟରେ ସହାୟତା ମିଳିବା ପାଇଁ ଜିଲ୍ଲା ପ୍ରଶାସନକୁ ତ୍ୱରିତ ପଦକ୍ଷେପ ନେବାକୁ କୁହାଯାଇଛି।

ମନ୍ତ୍ରୀଙ୍କ ସୂଚନା ଅନୁସାରେ,ଆସନ୍ତା ଦଶହରା ପୂର୍ବରୁ ପର୍ଯ୍ୟାୟକ୍ରମେ କ୍ଷତିପୂରଣ ବଣ୍ଟନ ପ୍ରକ୍ରିୟା ଶେଷ କରାଯିବ।ଏହା ସହିତ ଭବିଷ୍ୟତରେ ବନ୍ୟା ଓ ପ୍ରାକୃତିକ ବିପର୍ଯ୍ୟୟର ପ୍ରଭାବ କମାଇବା ପାଇଁ ବିପର୍ଯ୍ୟୟ-ପ୍ରତିରୋଧୀ ଭିତ୍ତିଭୂମି ଉପରେ ମଧ୍ୟ ଆଲୋଚନା କରାଯିବ।