ବାତ୍ୟା ‘ମୁରାସୁ’କୁ ନେଇ ଓଡ଼ିଶାରେ ବଡ଼ କ୍ଷୟକ୍ଷତି ହୋଇନଥିଲେ ମଧ୍ୟ ପ୍ରଶାସନ ସତର୍କ ରହିଛି। ମଙ୍ଗଳବାର ରାଜ୍ୟର ସ୍ଥିତି ସମୀକ୍ଷା କରି ମୁଖ୍ୟ ଶାସନ ସଚିବ ଅନୁ ଗର୍ଗ କହିଛନ୍ତି ଯେ ବାତ୍ୟାର ପ୍ରମୁଖ ପ୍ରଭାବ ଓଡ଼ିଶାରେ ଦେଖାଯାଇନାହିଁ। ତେବେ ପୂର୍ବରୁ ନିଆଯାଇଥିବା ସତର୍କତାମୂଳକ ପଦକ୍ଷେପ ଜାରି ରହିଛି।

ଗଞ୍ଜାମ ଓ ଗଜପତିରେ ପୁନରୁଦ୍ଧାର କାର୍ଯ୍ୟ

ପୂର୍ବ ବାତ୍ୟା ଓ ଲଗାଣ ବର୍ଷା ଯୋଗୁଁ ପ୍ରଭାବିତ ଗଞ୍ଜାମ ଏବଂ ଗଜପତି ଜିଲ୍ଲାରେ ମରାମତି ଓ ପୁନରୁଦ୍ଧାର କାମ ଜୋରଦାର ଭାବେ ଚାଲିଛି। କ୍ଷତିଗ୍ରସ୍ତ ରାସ୍ତାର ମରାମତି ସହ ଅତ୍ୟାବଶ୍ୟକ ସେବା ପୁନଃସ୍ଥାପନ ଏବଂ ପ୍ରଭାବିତ ପରିବାରଙ୍କ ପାଖରେ ସରକାରୀ ସହାୟତା ପହଞ୍ଚାଇବା ଉପରେ ପ୍ରଶାସନ ଗୁରୁତ୍ୱ ଦେଉଛି।

ଭୂସ୍ଖଳନ ସ୍ଥଳରେ ପୁଣି ଆରମ୍ଭ ହେଲା କାମ

ସୋମବାର ରାତିରେ ବର୍ଷା ହେବାରୁ ଭୂସ୍ଖଳନ ପ୍ରଭାବିତ ଅଞ୍ଚଳରେ ଉଦ୍ଧାର ଓ ରାସ୍ତା ସଫା କାର୍ଯ୍ୟ କିଛି ସମୟ ପାଇଁ ବିଳମ୍ବିତ ହୋଇଥିଲା। ତେବେ ମଙ୍ଗଳବାର ସକାଳଠାରୁ ପୁଣି କାମ ଆରମ୍ଭ ହୋଇଛି। ପ୍ରଭାବିତ ସ୍ଥାନରୁ ମାଟି ଓ ପଥର ହଟାଇ ରାସ୍ତା ଯାତାୟାତ ଉପଯୋଗୀ କରିବା ପାଇଁ ନୂଆ ଯନ୍ତ୍ରପାତି ନିୟୋଜିତ କରାଯାଇଛି।

କ୍ଷୟକ୍ଷତି ଆକଳନ କରୁଛି କେନ୍ଦ୍ରୀୟ ଟିମ୍‌

ବାତ୍ୟା ଓ ପରବର୍ତ୍ତୀ ବର୍ଷା ଯୋଗୁଁ ହୋଇଥିବା କ୍ଷୟକ୍ଷତିର ଆକଳନ ପାଇଁ କେନ୍ଦ୍ରୀୟ ଟିମ୍‌ ମଙ୍ଗଳବାର ଗଜପତି ଜିଲ୍ଲା ପରିଦର୍ଶନ କରିଛି। ଏହି ଟିମ୍‌ ବୁଧବାର ଗଞ୍ଜାମ ଜିଲ୍ଲା ଯାଇ କ୍ଷତିଗ୍ରସ୍ତ ଅଞ୍ଚଳର ସ୍ଥିତି ଅନୁଧ୍ୟାନ କରିବ। ପରେ ଭୁବନେଶ୍ୱର ଫେରି ମୁଖ୍ୟ ଶାସନ ସଚିବଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି। ଏହାସହ ଜିଲ୍ଲାପାଳମାନେ ପ୍ରାଥମିକ କ୍ଷୟକ୍ଷତି ରିପୋର୍ଟ ପ୍ରସ୍ତୁତ କରୁଛନ୍ତି।

ପ୍ରଶାସନ ପକ୍ଷରୁ ସ୍ଥିତି ଉପରେ ନିୟମିତ ନଜର ରଖାଯାଉଛି। ପ୍ରଭାବିତ ଲୋକଙ୍କୁ ଘୋଷିତ ସହାୟତା ପହଞ୍ଚାଇବା ସହ ରାସ୍ତା ଓ ଅନ୍ୟାନ୍ୟ ମୌଳିକ ସେବା ଶୀଘ୍ର ସ୍ୱାଭାବିକ କରିବା ଉପରେ ସରକାର ଗୁରୁତ୍ୱ ଦେଉଛନ୍ତି।