ମୁମ୍ବାଇ: ରାସାୟନିକ ଓ ପେଟ୍ରୋକେମିକାଲ୍ ଶିଳ୍ପରେ ଓଡ଼ିଶାକୁ ଏକ ପ୍ରମୁଖ ନିବେଶ ଗନ୍ତବ୍ୟ ଭାବେ ପ୍ରତିଷ୍ଠିତ କରିବା ଲକ୍ଷ୍ୟରେ ରାଜ୍ୟ ସରକାର ନିବେଶକଙ୍କ ନିକଟରେ ନୂଆ ପ୍ରସ୍ତାବ ରଖିବାକୁ ଯାଉଛନ୍ତି। ମୁମ୍ବାଇରେ ଗୁରୁବାରଠାରୁ ଆରମ୍ଭ ହେଉଥିବା ଦୁଇଦିନିଆ ଇଣ୍ଡିଆ କେମ୍ ୨୦୨୬ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓଡ଼ିଶାର ଶିଳ୍ପ ଓ ନିବେଶ ସମ୍ଭାବନାକୁ ଉପସ୍ଥାପନ କରିବେ।

ମୁଖ୍ୟମନ୍ତ୍ରୀ ମାଝୀ ବୁଧବାର ମୁମ୍ବାଇରେ ପହଞ୍ଚିଛନ୍ତି। ସେ ଇଣ୍ଡିଆ କେମ୍ ୨୦୨୬ରେ ୫୦୦ରୁ ଅଧିକ ଶିଳ୍ପ ପ୍ରତିନିଧିଙ୍କୁ ସମ୍ବୋଧିତ କରିବା ସହ ୨୦ରୁ ଅଧିକ କମ୍ପାନୀର ଶୀର୍ଷ ଅଧିକାରୀଙ୍କ ସହ ଆଲୋଚନା କରିବେ। ଶିଳ୍ପ ବିସ୍ତାର, ଡାଉନ୍‌ଷ୍ଟ୍ରିମ୍ ମ୍ୟାନୁଫାକ୍ଚରିଂ ଏବଂ ଓଡ଼ିଶାରେ ନୂଆ ପ୍ରକଳ୍ପ ସ୍ଥାପନ ନେଇ ଏହି ଆଲୋଚନା ହେବ।

ଏହାସହ ମୁଖ୍ୟମନ୍ତ୍ରୀ ଏକ ସିଇଓ ରାଉଣ୍ଡଟେବୁଲ୍ ବୈଠକରେ ମଧ୍ୟ ଯୋଗଦେବେ। ଏହି ବୈଠକରେ ୪୫ରୁ ଅଧିକ ଶିଳ୍ପ ନେତା ଅଂଶଗ୍ରହଣ କରିବେ। କେନ୍ଦ୍ର ରସାୟନ ଓ ସାର ମନ୍ତ୍ରୀ ଜେ.ପି. ନଡ୍ଡା ଏହି ରାଉଣ୍ଡଟେବୁଲ୍‌କୁ ଅଧ୍ୟକ୍ଷତା କରିବେ।

ପାରାଦୀପ ପେଟ୍ରୋକେମିକାଲ୍ ଡାଉନ୍‌ଷ୍ଟ୍ରିମ୍ ଶିଳ୍ପ ଉପରେ ଫୋକସ୍

ବୈଠକରେ ବିଶେଷ କରି ପାରାଦୀପକୁ କେନ୍ଦ୍ର କରି ପେଟ୍ରୋକେମିକାଲ୍ ଡାଉନ୍‌ଷ୍ଟ୍ରିମ୍ ଶିଳ୍ପର ବିକାଶ ଉପରେ ଆଲୋଚନା ହେବ। ଏହା ମାଧ୍ୟମରେ ନୂଆ ମାନୁଫାକ୍ଚରିଂ ୟୁନିଟ୍‌କୁ ଓଡ଼ିଶାରେ ଆକର୍ଷିତ କରିବା ସହ ରୋଜଗାର ସୃଷ୍ଟି କରିବାକୁ ରାଜ୍ୟ ସରକାର ଲକ୍ଷ୍ୟ ରଖିଛନ୍ତି।

ପ୍ରସ୍ତାବିତ କେମିକାଲ୍ ଇଣ୍ଡଷ୍ଟ୍ରିଆଲ୍ ପାର୍କ

ଇଣ୍ଡିଆ କେମ୍ ୨୦୨୬ରେ ଓଡ଼ିଶା ସରକାର ଏକ ବୃହତ୍ ଓ ସମର୍ପିତ କେମିକାଲ୍ ଇଣ୍ଡଷ୍ଟ୍ରିଆଲ୍ ପାର୍କ ସ୍ଥାପନ ନେଇ ଯୋଜନା ଘୋଷଣା କରିପାରେ। ଏହି ପାର୍କରେ ରାସାୟନିକ, ପେଟ୍ରୋକେମିକାଲ୍, ପ୍ଲାଷ୍ଟିକ୍ ଓ ପ୍ୟାକେଜିଂ ଶିଳ୍ପକୁ ସ୍ଥାନ ଦେବାର ଯୋଜନା ରହିଥିବା ଜଣାପଡ଼ିଛି।

ଏଭଳି ଏକ ଶିଳ୍ପ ପାର୍କ ଗଠନ ହେଲେ ରାଜ୍ୟର ମାନୁଫାକ୍ଚରିଂ ଇକୋସିଷ୍ଟମ୍ ଆହୁରି ସୁଦୃଢ଼ ହେବା ସହ କଞ୍ଚାମାଲରୁ ଉଚ୍ଚମୂଲ୍ୟର ଉତ୍ପାଦ ପର୍ଯ୍ୟନ୍ତ ଭ୍ୟାଲୁ ଆଡିସନ୍ ଓ ଡାଉନ୍‌ଷ୍ଟ୍ରିମ୍ ଶିଳ୍ପ ବିକାଶର ସୁଯୋଗ ସୃଷ୍ଟି ହୋଇପାରେ।

କୋଲ୍ ଗ୍ୟାସିଫିକେସନ୍ ଉପରେ ମଧ୍ୟ ଗୁରୁତ୍ୱ

ରାସାୟନିକ ଓ ପେଟ୍ରୋକେମିକାଲ୍ କ୍ଷେତ୍ର ସହିତ କୋଲ୍ ଗ୍ୟାସିଫିକେସନ୍କୁ ମଧ୍ୟ ଓଡ଼ିଶା ଏକ ଉଦୀୟମାନ ଶିଳ୍ପ କ୍ଷେତ୍ର ଭାବେ ଉପସ୍ଥାପନ କରିବ। ରାଜ୍ୟରେ ଉପଲବ୍ଧ ଶିଳ୍ପ ଭିତ୍ତି, ଖଣିଜ ସମ୍ପଦ ଓ ବନ୍ଦର ଭିତ୍ତିକ ଲଜିଷ୍ଟିକ୍ସକୁ ଆଧାର କରି ନୂଆ ଶିଳ୍ପ ନିବେଶ ଆକର୍ଷିତ କରିବା ଦିଗରେ ଏହି ପଦକ୍ଷେପ ଗୁରୁତ୍ୱପୂର୍ଣ୍ଣ ହୋଇପାରେ।

ରାସାୟନିକ ଓ ପେଟ୍ରୋକେମିକାଲ୍ କ୍ଷେତ୍ରକୁ ଓଡ଼ିଶା ସରକାର ଶିଳ୍ପ ବିବିଧୀକରଣ ଓ ମାନୁଫାକ୍ଚରିଂ ଭ୍ୟାଲୁ ଚେନ୍‌କୁ ମଜବୁତ କରିବାର ଏକ ପ୍ରମୁଖ କ୍ଷେତ୍ର ଭାବେ ଦେଖୁଛନ୍ତି। ଇଣ୍ଡିଆ କେମ୍ ୨୦୨୬ରେ ରାଜ୍ୟର ଏହି ନିବେଶ ଆଉଟ୍‌ରିଚ୍ ଆଗାମୀ ଦିନରେ ଓଡ଼ିଶାକୁ ନୂଆ ଶିଳ୍ପ ପ୍ରକଳ୍ପ ଆଣିବାରେ କେତେଦୂର ସହାୟକ ହେବ, ତାହା ଉପରେ ଶିଳ୍ପ ମହଲର ନଜର ରହିଛି।