ନାଇଜରର ରାଜଧାନୀ ନିଆମେସ୍ଥିତ ଡିଓରି ହାମାନି ଅନ୍ତର୍ଜାତୀୟ ବିମାନବନ୍ଦର ଉପରେ ଏକ ଭୟାବହ ସଶସ୍ତ୍ର ଆକ୍ରମଣ ଘଟିଛି। ଏହି ଆକ୍ରମଣରେ ୧୧ ଜଣ ସୈନ୍ୟ ଏବଂ ୨ ଜଣ ସାଧାରଣ ନାଗରିକ ପ୍ରାଣ ହରାଇଛନ୍ତି। ସୁରକ୍ଷା ବାହିନୀଙ୍କ ତତ୍ପରତା ଏବଂ ପାଲଟା ଅଭିଯାନରେ ୨୨ ଜଣ ଆକ୍ରମଣକାରୀ ମୃତ୍ୟୁବରଣ କରିଥିବା ସୂଚନା ମିଳିଛି।

ସ୍ଥାନୀୟ ସୂତ୍ର ଅନୁସାରେ, ଆକ୍ରମଣକାରୀମାନେ ଏକ ଟ୍ୟାକ୍ସି ଯୋଗେ ବିମାନବନ୍ଦର ନିକଟରେ ପହଞ୍ଚି ସୁରକ୍ଷା ଚୌକି ଉପରେ ହଠାତ୍ ଆକ୍ରମଣ କରିଥିଲେ। ଏହା ପରେ ଅଞ୍ଚଳରେ କିଛି ଘଣ୍ଟା ଧରି ତୀବ୍ର ଗୁଳିବିନିମୟ ଚାଲିଥିଲା।

ଘଟଣା ପରେ ନାଇଜର ସେନା ବ୍ୟାପକ ଅଭିଯାନ ଆରମ୍ଭ କରି ପରିସ୍ଥିତିକୁ ନିୟନ୍ତ୍ରଣକୁ ଆଣିଥିଲା। ସୁରକ୍ଷା ବାହିନୀ ପ୍ରାୟ ୨୦ ଜଣ ସନ୍ଦିଗ୍ଧଙ୍କୁ ଗିରଫ କରିଛି। ବର୍ତ୍ତମାନ ବିମାନବନ୍ଦର ଏବଂ ଏହାର ଆଖପାଖ ଅଞ୍ଚଳ ସମ୍ପୂର୍ଣ୍ଣ ସୁରକ୍ଷିତ ଥିବା ଅଧିକାରୀମାନେ କହିଛନ୍ତି।

ଉଲ୍ଲେଖଯୋଗ୍ୟ ଯେ, ଏହା ପୂର୍ବରୁ ଗତ ଜାନୁଆରି ମାସରେ ମଧ୍ୟ ଏହି ଅଞ୍ଚଳରେ ବଡ଼ ଧରଣର ଆକ୍ରମଣ ହୋଇଥିଲା। ପ୍ରାୟ ପାଞ୍ଚ ମାସ ପରେ ପୁଣିଥରେ ଏଭଳି ଘଟଣା ଘଟିବା ନାଇଜରର ସୁରକ୍ଷା ବ୍ୟବସ୍ଥାକୁ ନେଇ ଚିନ୍ତା ବଢ଼ାଇଛି।

ନିଆମେ ବିମାନବନ୍ଦର ନାଇଜରର ଏକ ପ୍ରମୁଖ ସାମରିକ କେନ୍ଦ୍ର ଭାବେ ପରିଚିତ। ଏଠାରେ ଜି-୫ ସାହେଲ ଆତଙ୍କବାଦ ବିରୋଧୀ ବାହିନୀ, ରୁଷିଆର ସୈନ୍ୟ ଏବଂ ଡ୍ରୋନ୍ ୟୁନିଟ୍ ମୁତୟନ ରହିଛନ୍ତି। ଏହା ସହିତ ବିମାନବନ୍ଦର ପରିସରରେ ୟୁରାନିୟମ୍ ସଂରକ୍ଷଣ ସୁବିଧା ମଧ୍ୟ ରହିଥିବାରୁ ଏହାର ରଣନୈତିକ ଗୁରୁତ୍ୱ ଅଧିକ ରହିଛି।