ଢେଙ୍କାନାଳରେ ଷ୍ଟୋନ୍ କ୍ରସର ଓ ଅଭିଯୋଗକୁ ନେଇ NGTଙ୍କ ବଡ଼ ନିର୍ଦ୍ଦେଶ ଆସିଛି। ଗଣ୍ଡିଆ ତହସିଲର ନିହାଲପ୍ରସାଦ ଅଞ୍ଚଳରେ ଥିବା ୪ଟି ଷ୍ଟୋନ୍ କ୍ରସର ୟୁନିଟ୍‌ର କାର୍ଯ୍ୟ ବନ୍ଦ କରିବାକୁ ଟ୍ରିବ୍ୟୁନାଲ୍ ନିର୍ଦ୍ଦେଶ ଦେଇଛନ୍ତି। ନିଶ୍ଚିନ୍ତା ପାହାଡ଼ ଏବଂ ଏହାର ନିକଟବର୍ତ୍ତୀ ସଂରକ୍ଷିତ ଜଙ୍ଗଲ ଅଞ୍ଚଳରେ ଅନୁମତି ବାହାରେ ଖଣି ଓ ପଥର ଭଙ୍ଗା କାର୍ଯ୍ୟ ହେଉଥିବା ନେଇ ମାମଲା ଟ୍ରିବ୍ୟୁନାଲ୍‌ରେ ପହଞ୍ଚିଥିଲା।

NGTର ପୂର୍ବ ଶୁଣାଣି ପରେ ୪ଟି କ୍ରସର ୟୁନିଟ୍‌କୁ ସିଲ୍ କରିବା ସହ କାର୍ଯ୍ୟ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି। ଟ୍ରିବ୍ୟୁନାଲ୍‌ରେ ଦାଖଲ ହୋଇଥିବା ତଥ୍ୟରୁ ଅନୁମତି ଦିଆଯାଇଥିବା ଜମିଠାରୁ ଅଧିକ ଅଞ୍ଚଳରେ କିଛି ୟୁନିଟ୍ କାର୍ଯ୍ୟ କରୁଥିବା ନେଇ ପ୍ରାଥମିକ ପ୍ରମାଣ ମିଳିଥିବା କୁହାଯାଇଛି।

ଏକ ମାମଲାରେ କ୍ରସର ୟୁନିଟ୍ ପାଇଁ NOCରେ ୬.୬୭ ଏକର ଅଞ୍ଚଳ ଉଲ୍ଲେଖ ଥିବାବେଳେ ଡ୍ରୋନ୍ ଫଟୋଗ୍ରାଫି ଓ ଜମିର ମାପଚୁପ ଅନୁସାରେ ପ୍ରାୟ ୧୩.୪ ଏକର ଅଞ୍ଚଳ ବ୍ୟବହାର ହୋଇଥିବା ଅଭିଯୋଗ ସାମ୍ନାକୁ ଆସିଛି। ଅର୍ଥାତ୍ ଅନୁମୋଦିତ ଅଞ୍ଚଳଠାରୁ ପ୍ରାୟ ଦୁଇଗୁଣ ଜମି ବ୍ୟବହାର ହୋଇଥିବା ଦାବି କରାଯାଇଛି।

ଏହା ସହିତ ଅବୈଧ ଭାବେ ପଥର ଖନନ, ବିସ୍ଫୋରଣ ଏବଂ ଭାରୀ ଯନ୍ତ୍ରପାତି ବ୍ୟବହାର ନେଇ ମଧ୍ୟ ଅଭିଯୋଗ ରହିଛି। ମାମଲାରେ ୨୦ ହଜାର ଟନ୍‌ରୁ ଅଧିକ ପଥର ଉତ୍ତୋଳନ ହୋଇଥିବା ଅଭିଯୋଗ ମଧ୍ୟ ଉଠିଛି। ତେବେ ଏହି ଅଭିଯୋଗଗୁଡ଼ିକର ପରିମାଣ ଓ ପରିବେଶଗତ କ୍ଷତିର ମୂଲ୍ୟାୟନ କରାଯିବ।

NGT ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ଅବୈଧ ଭାବେ ଉତ୍ତୋଳନ ହୋଇଥିବା ଖଣିଜର ପରିମାଣ ଆକଳନ କରିବା ଏବଂ ଉଲ୍ଲଂଘନ ପ୍ରମାଣିତ ହେଲେ ପରିବେଶ କ୍ଷତିପୂରଣ ନିର୍ଦ୍ଧାରଣ କରିବାକୁ କହିଛନ୍ତି। ଢେଙ୍କାନାଳ ଜିଲ୍ଲାପାଳ ଓ ଏସ୍‌ପିଙ୍କୁ ମଧ୍ୟ ନିର୍ଦ୍ଦେଶର ଅନୁପାଳନ ସୁନିଶ୍ଚିତ କରିବାକୁ କୁହାଯାଇଛି।

ଏହି ମାମଲାର ପରବର୍ତ୍ତୀ ଶୁଣାଣି ସେପ୍ଟେମ୍ବର ୨୫ରେ ହେବ। ସେପର୍ଯ୍ୟନ୍ତ ସମ୍ପୃକ୍ତ ଅଞ୍ଚଳରେ ଖଣି ଓ କ୍ରସର କାର୍ଯ୍ୟକଳାପ ଉପରେ ରୋକ୍ ଜାରି ରହିବ।