ନଭେମ୍ବର ୧ରୁ ନୂଆ FASTag ଟୋଲ୍ ପାସ୍, କାହାକୁ ମିଳିବ ଫାଇଦା?

ନୂଆଦିଲ୍ଲୀ: ଜାତୀୟ ରାଜପଥରେ ନିୟମିତ ଯାତାୟାତ କରୁଥିବା ଗାଡ଼ି ମାଲିକଙ୍କ ପାଇଁ ଆସିଛି ଏକ ନୂଆ ସୁବିଧା। ଟୋଲ୍ ଖର୍ଚ୍ଚ କମାଇବା ଉଦ୍ଦେଶ୍ୟରେ କେନ୍ଦ୍ର ସରକାର ରିହାତିଯୁକ୍ତ ବାର୍ଷିକ ଲୋକାଲ୍ FASTag ପାସ୍ ଆରମ୍ଭ କରୁଛନ୍ତି। ଏହି ନୂଆ ବ୍ୟବସ୍ଥା ୨୦୨୬ ନଭେମ୍ବର ୧ରୁ ଲାଗୁ ହେବ। ଏହାଦ୍ୱାରା ନିର୍ଦ୍ଦିଷ୍ଟ ସର୍ତ୍ତ ପୂରଣ କରୁଥିବା ଗାଡ଼ି ମାଲିକମାନେ ଗୋଟିଏ ବର୍ଷ ପାଇଁ ରିହାତି ମୂଲ୍ୟରେ ଟୋଲ୍ ସୁବିଧା ପାଇପାରିବେ।

ବାର୍ଷିକ ପାସ୍ ପାଇଁ କେତେ ଟଙ୍କା ଦେବାକୁ ପଡ଼ିବ?

ନୂଆ ନିୟମ ଅନୁଯାୟୀ, ଟୋଲ୍ ପ୍ଲାଜା କେଉଁ ଅଞ୍ଚଳରେ ଅବସ୍ଥିତ, ତାହା ଅନୁସାରେ ପାସ୍‌ର ମୂଲ୍ୟ ନିର୍ଦ୍ଧାରଣ କରାଯାଇଛି।

ଏହି ପାସ୍‌ର ବୈଧତା ଏକ ବର୍ଷ ରହିବ। ତେବେ ଏହାକୁ ଦେଶର ସମସ୍ତ ଟୋଲ୍ ପ୍ଲାଜାରେ ବ୍ୟବହାର କରିହେବ ନାହିଁ। ପାସ୍‌ଟି ଯେଉଁ ନିର୍ଦ୍ଦିଷ୍ଟ ଟୋଲ୍ ପ୍ଲାଜା ପାଇଁ ଜାରି ହେବ, ସେଠାରେ ହିଁ ଏହାର ବୈଧତା ରହିବ।

କିଏ ନେଇପାରିବେ ଏହି ପାସ୍?

ଏହି ସୁବିଧା ପାଇବା ପାଇଁ କିଛି ନିର୍ଦ୍ଦିଷ୍ଟ ସର୍ତ୍ତ ରହିଛି।

• ସମ୍ପୃକ୍ତ ଜାତୀୟ ରାଜପଥ ଟୋଲ୍ ପ୍ଲାଜାର ୨୦ କିଲୋମିଟର ପରିଧି ମଧ୍ୟରେ ବାସ କରୁଥିବା ଯୋଗ୍ୟ ଗାଡ଼ି ମାଲିକ ହୋଇଥିବା ଆବଶ୍ୟକ।

• ଗାଡ଼ିଟି ଅଣ-ବାଣିଜ୍ୟିକ ବା ବ୍ୟକ୍ତିଗତ ବ୍ୟବହାର ପାଇଁ ହୋଇଥିବା ଦରକାର।

• ଗାଡ଼ିରେ ବୈଧ ଓ କାର୍ଯ୍ୟକ୍ଷମ FASTag ଥିବା ଆବଶ୍ୟକ।

• FASTagଟି ଅଣ-ବାଣିଜ୍ୟିକ ଗାଡ଼ି ପାଇଁ ପଞ୍ଜୀକୃତ ହୋଇଥିବା ଦରକାର।

କେବଳ ଟୋଲ୍ ପ୍ଲାଜା ନିକଟରେ ରହୁଥିଲେ ଏହି ପାସ୍ ମିଳିଯିବ ନାହିଁ। ଅନ୍ୟ ସମସ୍ତ ନିୟମ ଓ ଯୋଗ୍ୟତା ମଧ୍ୟ ପୂରଣ କରିବାକୁ ପଡ଼ିବ।

କେଉଁଠି ମିଳିବ ନାହିଁ ଏହି ସୁବିଧା?

କିଛି ରାଜପଥ ଓ ଟୋଲ୍ ପ୍ଲାଜାକୁ ଏହି ଯୋଜନାରୁ ବାଦ୍ ଦିଆଯାଇଛି। ଯେଉଁ ଜାତୀୟ ରାଜପଥ କିମ୍ବା ଏକ୍ସପ୍ରେସ୍‌ୱେରେ ବନ୍ଦ ଉପଭୋକ୍ତା ଶୁଳ୍କ ସଂଗ୍ରହ ବ୍ୟବସ୍ଥା (Closed User Fee Collection System) ରହିଛି, ସେଠାରେ ଏହି ପାସ୍ ଲାଗୁ ହେବ ନାହିଁ। ସେହିପରି ଟୋଲ୍ ଦେୟ ଏଡ଼ାଇ ଯାତାୟାତ ପାଇଁ ବିକଳ୍ପ ସର୍ଭିସ୍ ରୋଡ୍ କିମ୍ବା ଅନ୍ୟ ରାସ୍ତା ଉପଲବ୍ଧ ଥିଲେ ମଧ୍ୟ ଏହି ସୁବିଧା ମିଳିବ ନାହିଁ।

କେବେ ଓ କିପରି ମିଳିବ ପାସ୍?

ଏହି ପାସ୍ ୧ ନଭେମ୍ବର ୨୦୨୬ରୁ ଯୋଗ୍ୟ ଟୋଲ୍ ପ୍ଲାଜାରେ ଉପଲବ୍ଧ ହେବ। ଏହାସହ ୧ ଡିସେମ୍ବର ୨୦୨୬ରୁ Rajmarg Yatra ଆପ୍ ମାଧ୍ୟମରେ ମଧ୍ୟ ଏହି ସୁବିଧା ପାଇବାର ବ୍ୟବସ୍ଥା ରହିଛି। ପାସ୍ ନେବା ପୂର୍ବରୁ ନିଜ ଅଞ୍ଚଳର ଟୋଲ୍ ପ୍ଲାଜା ଏହି ଯୋଜନାରେ ଅନ୍ତର୍ଭୁକ୍ତ କି ନାହିଁ, ଦୂରତା ଓ FASTag ସମ୍ପର୍କିତ ନିୟମ ଯାଞ୍ଚ କରିବା ଉଚିତ।