ଗାଜା ଯୁଦ୍ଧକୁ ନେଇ ଇସ୍ରାଏଲ ସରକାରଙ୍କ ନୀତିର ସମାଲୋଚନା କରୁଥିବା ନ୍ୟୁୟର୍କ ସିଟିର ମେୟର ଜୋହରାନ ମାମଦାନିଙ୍କୁ ଟାର୍ଗେଟ କରିଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ। ଏକ ସାକ୍ଷାତ୍କାରରେ ନେତାନ୍ୟାହୁ ଅଭିଯୋଗ କରିଛନ୍ତି ଯେ ମାମଦାନି ଘୃଣାର ପରିବେଶ ସୃଷ୍ଟି କରୁଛନ୍ତି ଏବଂ ସମାଜକୁ ବିଭକ୍ତ କରିବାକୁ ଚେଷ୍ଟା କରୁଛନ୍ତି। ସେ ନିଜ ବିରୋଧରେ ଆସିଥିବା ଆନ୍ତର୍ଜାତିକ ଅପରାଧ ଅଦାଲତ (ICC)ର ଯୁଦ୍ଧ ଅପରାଧ ଅଭିଯୋଗକୁ ମଧ୍ୟ ଭିତ୍ତିହୀନ ବୋଲି କହିଛନ୍ତି।

ଏହି ଅଭିଯୋଗର ଜବାବରେ ଜୋହରାନ ମାମଦାନି କହିଛନ୍ତି ଯେ ସେ ଏଭଳି ଅଭିଯୋଗକୁ ନେଇ କୌଣସି ବାକ୍‌ଯୁଦ୍ଧରେ ସାମିଲ ହେବେ ନାହିଁ। ତାଙ୍କର ଲକ୍ଷ୍ୟ ହେଉଛି ଗାଜାର ମାନବୀୟ ସଙ୍କଟ ଓ ଆନ୍ତର୍ଜାତିକ ଆଇନ ପ୍ରସଙ୍ଗରେ ନିଜର ମତ ଉପସ୍ଥାପନ କରିବା।

ଏହାପୂର୍ବରୁ ମାମଦାନି କହିଥିଲେ ଯେ ଆଇସିସିର ଗିରଫ ପରୱାନା ଆଧାରରେ ବେଞ୍ଜାମିନ ନେତାନ୍ୟାହୁଙ୍କୁ ଗିରଫ କରାଯିବା ଉଚିତ। ତେବେ ପରେ ସେ ସ୍ପଷ୍ଟ କରିଥିଲେ ଯେ ନ୍ୟୁୟର୍କ ସହର ପ୍ରଶାସନଙ୍କ ପାଖରେ ଏପରି ଗିରଫ କରିବାର କୌଣସି ଆଇନଗତ କ୍ଷମତା ନାହିଁ।

ଏହି ବାକ୍‌ଯୁଦ୍ଧ ଏଭଳି ସମୟରେ ସାମ୍ନାକୁ ଆସିଛି, ଯେତେବେଳେ ବେଞ୍ଜାମିନ ନେତାନ୍ୟାହୁ ହ୍ୱାଇଟ୍‌ ହାଉସ୍‌ ଗସ୍ତରେ ଅଛନ୍ତି। ଏହି ଗସ୍ତ ସମୟରେ ଗାଜା ଯୁଦ୍ଧ, ଆମେରିକା-ଇସ୍ରାଏଲ ସମ୍ପର୍କ ଏବଂ ମଧ୍ୟପୂର୍ବର ସୁରକ୍ଷା ପ୍ରସଙ୍ଗ ଉପରେ ଉଚ୍ଚସ୍ତରୀୟ ଆଲୋଚନା ହେବାର ସମ୍ଭାବନା ରହିଛି।