ଆଲିଗଡ଼: ଆଲିଗଡ଼ ମୁସଲିମ୍ ବିଶ୍ୱବିଦ୍ୟାଳୟ (AMU) ଛାତ୍ର ସଂସଦ ନିର୍ବାଚନରେ ରଚିଛନ୍ତି ନୂଆ ଇତିହାସ ନଶ୍ରା ନଇମ୍। ବିଶ୍ୱବିଦ୍ୟାଳୟର ୧୦୫ ବର୍ଷର ଇତିହାସରେ ପ୍ରଥମ ଥର ପାଇଁ ଜଣେ ମହିଳା ଛାତ୍ରୀ ଉପସଭାପତି ପଦ ହାସଲ କରିଛନ୍ତି। ଶୁକ୍ରବାର ଘୋଷିତ ନିର୍ବାଚନ ଫଳାଫଳରେ ନଶ୍ରାଙ୍କ ବିଜୟ ସହ ଛାତ୍ର ସଂସଦରେ ମହିଳାଙ୍କ ପ୍ରତିନିଧିତ୍ୱ ମଧ୍ୟ ନୂଆ ଉଚ୍ଚତା ଛୁଇଁଛି।
ଉପସଭାପତି ପଦ ପାଇଁ ହୋଇଥିବା ନିର୍ବାଚନରେ ନଶ୍ରା ନଇମ୍ ୭,୦୯୧ ଖଣ୍ଡ ଭୋଟ୍ ପାଇ ବିଜୟୀ ହୋଇଛନ୍ତି। ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀଙ୍କୁ ୫,୮୧୮ ଖଣ୍ଡ ଭୋଟ୍ ମିଳିଥିଲା। ଏହି ବିଜୟ ସହ ଆଲିଗଡ଼ ମୁସଲିମ୍ ବିଶ୍ୱବିଦ୍ୟାଳୟର ଛାତ୍ର ସଂସଦରେ ପ୍ରଥମ ମହିଳା ଉପସଭାପତି ହେବାର ଗୌରବ ହାସଲ କରିଛନ୍ତି ସେ।
ଏଥର ନିର୍ବାଚନରେ ମହିଳା ପ୍ରାର୍ଥୀମାନେ ମୋଟ ୧୩ଟି ପଦବୀ ମଧ୍ୟରୁ ୬ଟିରେ ବିଜୟୀ ହୋଇଛନ୍ତି। ଏଥିସହ ୧୦ଟି କ୍ୟାବିନେଟ୍ ସଦସ୍ୟ ପଦବୀ ମଧ୍ୟରୁ ୫ଟି ମହିଳାଙ୍କ ଖାତାକୁ ଯାଇଛି। ଛାତ୍ର ସଂସଦରେ ମହିଳାଙ୍କ ଏହି ପ୍ରତିନିଧିତ୍ୱକୁ ଏକ ଉଲ୍ଲେଖନୀୟ ସଫଳତା ଭାବେ ଦେଖାଯାଉଛି।
ଛାତ୍ର ସଂସଦର ସଭାପତି ପଦରେ ମହମ୍ମଦ ନୋମାନ ଅସରଫ୍ ୪,୧୦୦ରୁ ଅଧିକ ଭୋଟ୍ ବ୍ୟବଧାନରେ ବିଜୟୀ ହୋଇଛନ୍ତି। ସେହିପରି ମହମ୍ମଦ ହମଦାନ ସମ୍ପାଦକ ପଦ ପାଇଁ ନିର୍ବାଚିତ ହୋଇଛନ୍ତି। ନିର୍ବାଚନ ଫଳାଫଳ ଘୋଷଣା ପରେ ବିଜୟୀ ପ୍ରାର୍ଥୀଙ୍କ ସମର୍ଥକଙ୍କ ମଧ୍ୟରେ ଉତ୍ସାହ ଦେଖାଯାଇଥିଲା।
ଏହି ନିର୍ବାଚନର ଆଉ ଏକ ବିଶେଷତ୍ୱ ହେଉଛି, ଦୀର୍ଘ ୮ ବର୍ଷର ବ୍ୟବଧାନ ପରେ ଆଲିଗଡ଼ ମୁସଲିମ୍ ବିଶ୍ୱବିଦ୍ୟାଳୟରେ ଛାତ୍ର ସଂସଦ ନିର୍ବାଚନ ହୋଇଥିଲା। ଗତ କିଛି ବର୍ଷ ଧରି ଛାତ୍ରଛାତ୍ରୀଙ୍କ ଆନ୍ଦୋଳନ ପରେ ନିର୍ବାଚନ ପ୍ରକ୍ରିୟା ପୁଣି ଆରମ୍ଭ ହୋଇଥିଲା। ବିଶ୍ୱବିଦ୍ୟାଳୟର କୁଳପତି ପ୍ରଫେସର ନଇମା ଖାତୁନ୍ ଶାନ୍ତିପୂର୍ଣ୍ଣ ଭାବେ ନିର୍ବାଚନ ସମ୍ପନ୍ନ ହୋଇଥିବାରୁ ସନ୍ତୋଷ ପ୍ରକାଶ କରିବା ସହ ମହିଳାଙ୍କ ବଢ଼ୁଥିବା ଭାଗୀଦାରିକୁ ସ୍ୱାଗତ କରିଛନ୍ତି।
ନଶ୍ରା ନଇମ୍ଙ୍କ ଏହି ବିଜୟ କେବଳ ଜଣେ ପ୍ରାର୍ଥୀଙ୍କ ସଫଳତା ନୁହେଁ; ବରଂ ଦୀର୍ଘ ଦିନ ଧରି ପୁରୁଷ ପ୍ରାଧାନ୍ୟ ରହିଥିବା ଛାତ୍ର ନେତୃତ୍ୱରେ ମହିଳାଙ୍କ ବଢ଼ୁଥିବା ଭାଗୀଦାରିର ଏକ ଐତିହାସିକ ସଙ୍କେତ।
ସରକାରୀ କାର୍ଯ୍ୟାଳୟରେ ଉପହାର ଦେବା-ନେବା ଉପରେ ରୋକ୍ ଭ...
ପୂର୍ବତନ ସାଂସଦଙ୍କ ଘରେ EOWର ଚଢ଼ାଉ ରାୟଗଡ଼ା: ରାୟଗଡ଼...
କଳାହାଣ୍ଡି: କଳାହାଣ୍ଡି ଜିଲ୍ଲାରେ ଏକ ଚାଞ୍ଚଲ୍ୟକର ଘଟଣା ସ...
ନବରଙ୍ଗପୁର: ମଶାଣିରେ ଅମାନବୀୟ ଓ ଚାଞ୍ଚଲ୍ୟକର ଘଟଣା। ସମାଧ...
ପାଣି ଟାଙ୍କି ଉପରେ ଫସିଛି ଷଣ୍ଢ, ଉଦ୍ଧାରକୁ ନେଇ ଚିନ୍ତା...
ଭୁବନେଶ୍ୱର:ଦିନରେ ପୁଲିସ ଡ୍ରାଇଭର, ଆଉ ସନ୍ଧ୍ୟା ହେଲେ ଚେନ...
ନୂଆବର୍ଷ ପୂର୍ବରୁ ଧାଡ଼ି ଦର୍ଶନ ବ୍ୟବସ୍ଥା ଆଣିବାକୁ ଯୋଜନା...
ଛତ୍ରପୁର: ପାର୍ବଣ ଋତୁ ପୂର୍ବରୁ ବେଆଇନ ବାଣ କାରବାର ଉପରେ...
