ଭାରତୀୟ କ୍ରିକେଟର ଅନ୍ୟତମ ସଫଳ ଅଧିନାୟକ ମହେନ୍ଦ୍ର ସିଂହ ଧୋନି ଆଜି ୪୫ ବର୍ଷରେ ପଦାର୍ପଣ କରିଛନ୍ତି। ଏହି ବିଶେଷ ଅବସରରେ ଝାଡ଼ଖଣ୍ଡର ରାଞ୍ଚିସ୍ଥିତ ତାଙ୍କ ବାସଭବନ ବାହାରେ ହଜାର ହଜାର ପ୍ରଶଂସକଙ୍କ ଭିଡ଼ ଦେଖିବାକୁ ମିଳିଥିଲା। ଧୋନିଙ୍କ ଫଟୋ ସହ ପୋଷ୍ଟର ଧରିବା, କେକ୍ କାଟିବା ଏବଂ ସ୍ଲୋଗାନ ଦେବା ସହ ପ୍ରଶଂସକମାନେ ତାଙ୍କ ଜନ୍ମଦିନକୁ ଉତ୍ସବମୁଖର କରିଥିଲେ।

ପ୍ରଶଂସକମାନଙ୍କ ମଧ୍ୟରୁ ଜଣେ କହିଛନ୍ତି, ଧୋନି ସବୁବେଳେ ଫିଟ୍ ଦେଖାଯାଆନ୍ତି ଏବଂ ସେ ଏଭଳି ସୁସ୍ଥ ରହି ଯୁବପିଢ଼ିଙ୍କୁ ପ୍ରେରଣା ଦେଇ ଚାଲନ୍ତୁ। ସେହିପରି ଅବସର ନେବା ପୂର୍ବରୁ ରାଞ୍ଚିରେ ଅତି କମରେ ଗୋଟିଏ ମ୍ୟାଚ୍ ଖେଳିବାକୁ ମଧ୍ୟ ସେମାନେ ଧୋନିଙ୍କୁ ଅନୁରୋଧ କରିଛନ୍ତି।

ମହେନ୍ଦ୍ର ସିଂହ ଧୋନିଙ୍କ କ୍ରିକେଟ୍ ଯାତ୍ରା ବିଶ୍ୱ କ୍ରୀଡ଼ା ଇତିହାସର ଅନ୍ୟତମ ପ୍ରେରଣାଦାୟକ କାହାଣୀ। ଭାରତୀୟ ରେଳବାଇରେ ଟିକେଟ୍ କଲେକ୍ଟର ଭାବେ କାର୍ଯ୍ୟ କରୁଥିବା ଧୋନି ପରବର୍ତ୍ତୀ ସମୟରେ ଭାରତୀୟ କ୍ରିକେଟର ସବୁଠାରୁ ସଫଳ ଅଧିନାୟକ ଭାବେ ପରିଚିତ ହୋଇଥିଲେ।

ଧୋନିଙ୍କ ନେତୃତ୍ୱରେ ଭାରତ ୨୦୦୭ରେ ପ୍ରଥମ ICC T20 ବିଶ୍ୱକପ୍, ୨୦୧୧ରେ ICC କ୍ରିକେଟ୍ ବିଶ୍ୱକପ୍ ଏବଂ ୨୦୧୩ରେ ICC ଚାମ୍ପିଅନ୍ସ ଟ୍ରଫି ଜିତିଥିଲା। ତିନୋଟି ICC ଟ୍ରଫି ଜିତାଇଥିବା ଏକମାତ୍ର ଭାରତୀୟ ଅଧିନାୟକ ଭାବେ ସେ ଇତିହାସ ସୃଷ୍ଟି କରିଛନ୍ତି।

୨୦୦୪ରେ ଅନ୍ତର୍ଜାତୀୟ କ୍ରିକେଟରେ ପଦାର୍ପଣ କରିଥିବା ଧୋନି ଜଣେ ବିସ୍ଫୋରକ ବ୍ୟାଟର ଭାବେ ନିଜ କ୍ୟାରିୟର ଆରମ୍ଭ କରିଥିଲେ। ପରେ ସେ ଶାନ୍ତ ସ୍ୱଭାବ, ଚତୁର ରଣନୀତି ଏବଂ ଶେଷ ମୁହୂର୍ତ୍ତରେ ମ୍ୟାଚ୍ ଜିତାଇବାର କ୍ଷମତା ପାଇଁ 'ଫିନିଶର' ଭାବେ ସାରା ବିଶ୍ୱରେ ପରିଚିତ ହୋଇଥିଲେ।

ଧୋନି ଭାରତ ପାଇଁ ସମସ୍ତ ଫର୍ମାଟରେ ୫୩୮ଟି ମ୍ୟାଚ୍ ଖେଳି ୧୭,୨୬୬ ରନ୍ ସଂଗ୍ରହ କରିଥିବା ବେଳେ ୱିକେଟ୍ ପଛରେ ୮୨୯ଟି ଡିସମିସାଲ୍ କରିଛନ୍ତି। ଦିନିକିଆ କ୍ରିକେଟରେ ସେ ୧୦,୭୭୩ ରନ୍ କରିଛନ୍ତି ଏବଂ ୫୦.୫୭ ହାରରେ ବ୍ୟାଟିଂ କରିବା ସହ ୧୦ଟି ଶତକ ଓ ୭୩ଟି ଅର୍ଦ୍ଧଶତକ ହାସଲ କରିଛନ୍ତି। ତାଙ୍କର ସର୍ବାଧିକ ସ୍କୋର ଅପରାଜିତ ୧୮୩ ରନ୍।

ଟେଷ୍ଟ କ୍ରିକେଟରେ ମଧ୍ୟ ଧୋନିଙ୍କ ଅବଦାନ ସ୍ମରଣୀୟ। ସେ ୯୦ଟି ଟେଷ୍ଟ ମ୍ୟାଚ୍‌ରେ ୪,୮୭୬ ରନ୍ କରିଥିବା ବେଳେ ଭାରତକୁ ପ୍ରଥମ ଥର ପାଇଁ ICC ଟେଷ୍ଟ ରାଙ୍କିଙ୍ଗର ଏକ ନମ୍ବର ସ୍ଥାନରେ ପହଞ୍ଚାଇଥିଲେ। ସେହିପରି ତାଙ୍କ ନେତୃତ୍ୱରେ ଭାରତ ଘରୋଇ ମାଟିରେ ଅଷ୍ଟ୍ରେଲିଆକୁ ଦୁଇଥର ୪-୦ ବ୍ୟବଧାନରେ ପରାସ୍ତ କରି ଇତିହାସ ରଚିଥିଲା।

ଆଜି ମଧ୍ୟ ଧୋନି ଲକ୍ଷ ଲକ୍ଷ କ୍ରିକେଟ୍ ପ୍ରେମୀଙ୍କ ପାଇଁ ପ୍ରେରଣାର ପ୍ରତୀକ ହୋଇ ରହିଛନ୍ତି। ତାଙ୍କ ଜନ୍ମଦିନ ଅବସରରେ ସୋସିଆଲ୍ ମିଡିଆରେ ଶୁଭେଚ୍ଛାର ସୁଅ ଛୁଟିଛି।