ନାଗୋୟାରେ ଚାଲିଥିବା ଏସିଆନ୍ ପାରା ଗେମ୍ସ ୨୦୨୬ରେ ଭାରତୀୟ ପାରା-ଶୁଟର ମୋନା ଅଗ୍ରୱାଲ ଇତିହାସ ରଚିଛନ୍ତି। ମହିଳା ୫୦ ମିଟର ରାଇଫଲ୍ ୩ ପୋଜିସନ୍ସ SH1 ଫାଇନାଲରେ ସେ ୩୫୭.୫ ପଏଣ୍ଟ ହାସଲ କରି ସ୍ୱର୍ଣ୍ଣ ପଦକ ଜିତିବା ସହ ନୂଆ ବିଶ୍ୱରେକର୍ଡ ସ୍ଥାପନ କରିଛନ୍ତି।

ମୋନାଙ୍କ ଏହି ସ୍କୋର ପୂର୍ବରୁ ଥିବା ୩୫୬ ପଏଣ୍ଟର ବିଶ୍ୱରେକର୍ଡକୁ ଭାଙ୍ଗିଛି। ପୂର୍ବ ରେକର୍ଡ ସ୍ୱିଡେନର ଆନା ବେନସନଙ୍କ ନାମରେ ଥିଲା। 

ଫାଇନାଲରେ ଚୀନର କୁଇପିଙ୍ଗ ଝାଙ୍ଗ ୩୫୩.୭ ପଏଣ୍ଟ ସହ ରୌପ୍ୟ ଏବଂ ଦକ୍ଷିଣ କୋରିଆର ମ୍ୟୋଙ୍ଗ କିମ୍ ୩୪୪.୪ ପଏଣ୍ଟ ସହ କାଂସ୍ୟ ପଦକ ଜିତିଥିଲେ। ଭାରତର ଅଭନୀ ଲେଖରା ୩୩୩.୨ ପଏଣ୍ଟ ସହ ଚତୁର୍ଥ ସ୍ଥାନରେ ରହିଥିଲେ। 

ଏହି ସ୍ୱର୍ଣ୍ଣ ମୋନା ଅଗ୍ରୱାଲଙ୍କ ଚଳିତ ଏସିଆନ୍ ପାରା ଗେମ୍ସର ଦ୍ୱିତୀୟ ସ୍ୱର୍ଣ୍ଣ ପଦକ। ଏହା ପୂର୍ବରୁ ସେ ମହିଳା ୧୦ ମିଟର ଏୟାର ରାଇଫଲ୍ ଷ୍ଟାଣ୍ଡିଂ SH1 ଇଭେଣ୍ଟରେ ସ୍ୱର୍ଣ୍ଣ ଜିତିଥିଲେ।

୩୮ ବର୍ଷୀୟ ମୋନାଙ୍କ କ୍ରୀଡ଼ା ଯାତ୍ରା ମଧ୍ୟ ଅତ୍ୟନ୍ତ ପ୍ରେରଣାଦାୟକ। ସେ ଛୋଟବେଳେ ପୋଲିଓରେ ପୀଡ଼ିତ ହୋଇଥିଲେ ଏବଂ ପାରା-ଆଥଲେଟିକ୍ସ, ପାରା-ପାୱାରଲିଫ୍ଟିଂ ଓ ସିଟିଂ ଭଲିବଲ୍‌ରେ ମଧ୍ୟ ଭାଗ ନେଇଥିଲେ। ୨୦୨୧ରେ ସେ ପ୍ରତିଯୋଗିତାମୂଳକ ରାଇଫଲ୍ ଶୁଟିଂ ଆରମ୍ଭ କରିଥିଲେ। ୨୦୨୪ ପ୍ୟାରିସ୍ ପାରାଲିମ୍ପିକ୍ସରେ ସେ ବ୍ରୋଞ୍ଜ୍ ପଦକ ଜିତିଥିଲେ।

ମୋନାଙ୍କ ଏହି ବିଶ୍ୱରେକର୍ଡ ସହ ସ୍ୱର୍ଣ୍ଣ ଭାରତୀୟ ପାରା-ସ୍ପୋର୍ଟ୍ସ ପାଇଁ ଆଉ ଏକ ବଡ଼ ଗୌରବର ମୁହୂର୍ତ୍ତ ହୋଇଛି।