ଓଡ଼ିଶାରେ ଦୀର୍ଘ ୮ ବର୍ଷ ପରେ ଛାତ୍ର ସଂସଦ ନିର୍ବାଚନ ଅନୁଷ୍ଠିତ ହୋଇଛି। ଏହାକୁ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପୂର୍ବତନ ବିଜେଡି ସରକାରକୁ ଟାର୍ଗେଟ୍ କରିଛନ୍ତି। ୨୦୧୭ରୁ ଛାତ୍ର ସଂସଦ ନିର୍ବାଚନ ବନ୍ଦ ରହିବା ନେଇ ମୋହନ ମାଝୀ କହିଛନ୍ତି ଯେ, ତତ୍କାଳୀନ ସରକାରଙ୍କର ଛାତ୍ର ସମାଜ ଉପରେ ଆସ୍ଥା ନଥିଲା ବୋଲି ସେ ଅଭିଯୋଗ କରୁଛନ୍ତି। 

ମୁଖ୍ୟମନ୍ତ୍ରୀଙ୍କ ଅଭିଯୋଗ ଅନୁସାରେ, ଛାତ୍ର ଆନ୍ଦୋଳନରୁ ରାଜନୀତିକ ଜୀବନ ଆରମ୍ଭ କରିଥିବା ତତ୍କାଳୀନ ଶାସକ ଦଳର ନେତା ଓ ଉଚ୍ଚଶିକ୍ଷା ମନ୍ତ୍ରୀ ମଧ୍ୟ ନିର୍ବାଚନ ବନ୍ଦ ନିଷ୍ପତ୍ତିକୁ ବିରୋଧ କରିନଥିଲେ। ତାଙ୍କ ସରକାର ନିର୍ବାଚନ ପୁନଃ ଆରମ୍ଭ କରିବାର ପ୍ରତିଶ୍ରୁତି ପୂରଣ କରି ଶାନ୍ତିପୂର୍ଣ୍ଣ ଓ ଶୃଙ୍ଖଳିତ ଭାବେ ନିର୍ବାଚନ କରାଇଥିବା ସେ କହିଛନ୍ତି।

ଏହି ନିର୍ବାଚନରେ ABVPର ପ୍ରଦର୍ଶନକୁ ନେଇ ମଧ୍ୟ ମୋହନ ମାଝୀ ମତ ରଖିଛନ୍ତି। ଓଡ଼ିଶାରେ ABVPର ସଫଳତାକୁ ସେ ଯୁବପିଢ଼ିଙ୍କ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିକାଶ ନୀତି ପ୍ରତି ଆସ୍ଥାର ପ୍ରତିଫଳନ ବୋଲି କହିଛନ୍ତି। ତେବେ ନିର୍ବାଚନ ଫଳାଫଳକୁ ନେଇ ବିଜେଡି ପକ୍ଷରୁ ମଧ୍ୟ ଭିନ୍ନ ଦାବି ଓ ଅଭିଯୋଗ ଆସିଛି। 

ନବନିର୍ବାଚିତ ଛାତ୍ର ପ୍ରତିନିଧିଙ୍କୁ ମୁଖ୍ୟମନ୍ତ୍ରୀ ପରାମର୍ଶ ଦେଇ କହିଛନ୍ତି ଯେ, ନିର୍ବାଚନୀ ବିଜୟ ଅହଙ୍କାରର ବିଷୟ ନୁହେଁ; ଏହା ଦାୟିତ୍ୱର ଆରମ୍ଭ। ଛାତ୍ରନେତାମାନେ ଶିକ୍ଷା, ହଷ୍ଟେଲ ଓ କ୍ରୀଡ଼ା ସମ୍ପର୍କିତ ସମସ୍ୟା ସମାଧାନ ସହ କ୍ୟାମ୍ପସକୁ ହିଂସାମୁକ୍ତ ଓ ନିଶାମୁକ୍ତ ରଖିବାରେ ଭୂମିକା ନେବାକୁ ସେ ଆହ୍ୱାନ ଦେଇଛନ୍ତି।