ପର୍ଯ୍ୟଟନ ସହ ପରିବେଶ ସଂରକ୍ଷଣକୁ ଯୋଡ଼ିବା ପାଇଁ ମାଳଦ୍ୱୀପରେ ଏକ ଅନନ୍ୟ ପଦକ୍ଷେପ ନିଆଯାଇଛି। କୁଦାଗିରି ଦ୍ୱୀପର ଲାଗୁନ୍‌ରେ ପୂର୍ବତନ Air Maldivesର ଦୁଇଟି ଅବସରପ୍ରାପ୍ତ Dornier 228 ବିମାନକୁ ସମୁଦ୍ର ତଳେ ରଖାଯାଇଛି। ଏହି ସ୍ଥାନକୁ ‘Kudagiri Dhoonier Wreck’ ନାମ ଦିଆଯାଇଛି।

ଏହି ଦୁଇ ବିମାନ ମାଳଦ୍ୱୀପର ପ୍ରଥମ ଜାତୀୟ ବିମାନ ସେବା Air Maldivesର ଯୁଗ ସହ ଜଡ଼ିତ। Air Maldives ୨୦୦୦ ମସିହାରେ ଏହାର କାର୍ଯ୍ୟକଳାପ ବନ୍ଦ କରିଥିଲା। ଏବେ ଏହି ପୁରୁଣା ବିମାନଗୁଡ଼ିକ ଆକାଶରେ ନୁହେଁ, ସମୁଦ୍ର ତଳେ ମାଲଦ୍ୱୀପର ବିମାନ ଇତିହାସର ଏକ ନୂଆ ଅଧ୍ୟାୟ ସୃଷ୍ଟି କରୁଛି।

ଡାଇଭିଂ ପାଇଁ ନୂଆ ଆକର୍ଷଣ

କୁଦାଗିରିରେ ଏହି ବିମାନଗୁଡ଼ିକୁ ନେଇ ମାଳଦ୍ୱୀପର ଏକ ବିଶେଷ aircraft wreck dive site ବିକଶିତ ହୋଇଛି। ଡାଇଭର୍‌ମାନେ ସମୁଦ୍ର ତଳେ ବିମାନର ଅବଶେଷକୁ ନିକଟରୁ ଦେଖିପାରିବେ। ଏହା ଦେଶର ପର୍ଯ୍ୟଟନ ଓ ଡାଇଭିଂ ଅନୁଭୂତିରେ ଏକ ନୂଆ ଆକର୍ଷଣ ଯୋଡ଼ିଛି।

‘Dhoonier’ ନାମଟି ମଧ୍ୟ ବେଶ୍‌ ଆକର୍ଷଣୀୟ। ଏହା ‘Dornier’ ଏବଂ ଧିଭେହି ଭାଷାର ‘Dhooni’, ଯାହାର ଅର୍ଥ ‘ପକ୍ଷୀ’, ଏହି ଦୁଇ ଶବ୍ଦର ମିଶ୍ରଣ। ଅର୍ଥାତ୍‌, ଆକାଶରେ ଉଡ଼ୁଥିବା ‘ପକ୍ଷୀ’ ଏବେ ସମୁଦ୍ର ତଳେ ନୂଆ ରୂପ ପାଇଛି।

କୃତ୍ରିମ ରିଫ୍‌ ହେବ ବିମାନ

ଏହି ପ୍ରକଳ୍ପ କେବଳ ପର୍ଯ୍ୟଟନ ଆକର୍ଷଣ ପାଇଁ ନୁହେଁ। ପାଣି ତଳେ ଥିବା ବିମାନଗୁଡ଼ିକୁ ଧୀରେ ଧୀରେ କୃତ୍ରିମ ରିଫ୍‌ରେ ପରିଣତ କରିବାର ଯୋଜନା ରହିଛି। ବିମାନର ଗଠନ ଉପରେ କୋରାଲ୍‌ ବଢ଼ିବା ସହ ସାମୁଦ୍ରିକ ଜୀବଜନ୍ତୁଙ୍କ ପାଇଁ ନୂଆ ଆବାସ ସୃଷ୍ଟି ହେବ।

୨୦୨୬ ମେ’ରେ Dhoonier Wreck ସ୍ଥଳରେ ବଡ଼ ଧରଣର କୋରାଲ୍‌ ରିଷ୍ଟୋରେସନ୍‌ କାର୍ଯ୍ୟକ୍ରମ ମଧ୍ୟ ହୋଇଥିଲା। ପ୍ରାୟ ୩୦୦ ଜଣ ଅନ୍ତର୍ଜାତୀୟ ମିଡିଆ ପ୍ରତିନିଧି କୋରାଲ୍‌ ଖଣ୍ଡକୁ ବିଶେଷ ଅଣ୍ଡରୱାଟର୍‌ ଫ୍ରେମ୍‌ରେ ସ୍ଥାପନ କରିଥିଲେ।

ଏଭଳି ଭାବରେ ପୁରୁଣା ବିମାନଗୁଡ଼ିକ ମାଳଦ୍ୱୀପର ବିମାନ ଇତିହାସର ସ୍ମୃତିକୁ ସଂରକ୍ଷଣ କରିବା ସହ ସାମୁଦ୍ରିକ ଜୈବବିବିଧତା ଓ ପର୍ଯ୍ୟଟନକୁ ଏକାସାଙ୍ଗରେ ଆଗକୁ ନେବାର ମାଧ୍ୟମ ପାଲଟିଛି।