ଉତ୍ତର ପ୍ରଦେଶର ରାଜଧାନୀ ଲକ୍ଷ୍ଣୌର ଅଲିଗଞ୍ଜ ଅଞ୍ଚଳରେ ସୋମବାର ଏକ ଭୟାବହ ଅଗ୍ନିକାଣ୍ଡ ଘଟିଛି। ଏକ ବହୁତଳ ଭବନରେ ଅଚାନକ ନିଆଁ ଲାଗିଯିବାରୁ ସମଗ୍ର ଅଞ୍ଚଳରେ ଆତଙ୍କ ସୃଷ୍ଟି ହୋଇଥିଲା। ଉକ୍ତ ଭବନରେ ଏକ ଲାଇବ୍ରେରୀ ଓ କମ୍ପ୍ୟୁଟର ଟ୍ରେନିଂ ସଂସ୍ଥା ଚାଲୁଥିବା ସୂଚନା ମିଳିଛି।

ଅଗ୍ନିକାଣ୍ଡ ପରେ ଘନ ଧୂଆଁ ସମଗ୍ର ଭବନକୁ ଆବୃତ କରିଦେଇଥିଲା। ସ୍ଥାନୀୟ ଲୋକମାନେ ସାହସିକତାର ସହ କିଛି ଲୋକଙ୍କୁ ଉଦ୍ଧାର କରିବାରେ ସଫଳ ହୋଇଥିଲେ। ପ୍ରତ୍ୟକ୍ଷଦର୍ଶୀ ଅମନଙ୍କ କହିବା ଅନୁସାରେ, ନିଆଁ ଲାଗିବା ପରେ ଜଣେ ବ୍ୟକ୍ତି ଭୟରେ ଭବନରୁ ଡେଇଁ ପଡ଼ିଥିଲେ, ଯାହାଫଳରେ ସେ ଗୁରୁତର ଆହତ ହୋଇଛନ୍ତି।

ସ୍ଥାନୀୟ ଲୋକଙ୍କ ସହଯୋଗରେ ୫ରୁ ୬ ଜଣଙ୍କୁ ସୁରକ୍ଷିତ ଭାବେ ବାହାର କରାଯାଇଥିବା ବେଳେ ଏପର୍ଯ୍ୟନ୍ତ କିଛି ଲୋକ ଭବନ ଭିତରେ ଫସି ରହିଥିବା ଆଶଙ୍କା ରହିଛି। ଅଗ୍ନିଶମ ବିଭାଗର ଜଣେ ଅଧିକାରୀଙ୍କ ଅନୁସାରେ, ପ୍ରାୟ ୧୦ରୁ ୧୨ ଜଣ ଲୋକ ଭିତରେ ଫସି ରହିଥିବା ଖବର ମିଳିଛି। ତେବେ ଅଗ୍ନିର ପ୍ରକୋପ ଅଧିକ ଥିବାରୁ ଉଦ୍ଧାରକାରୀ ଦଳ ଏପର୍ଯ୍ୟନ୍ତ ଭବନ ଭିତରକୁ ସଂପୂର୍ଣ୍ଣ ଭାବେ ପ୍ରବେଶ କରିପାରିନାହାନ୍ତି।

ଘଟଣାସ୍ଥଳରେ ଏକାଧିକ ଅଗ୍ନିଶମ ଗାଡ଼ି ମୁତୟନ କରାଯାଇଛି ଏବଂ ନିଆଁ ଲିଭାଇବା ସହ ଫସି ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ ଅଭିଯାନ ଜାରି ରହିଛି।

ଅଗ୍ନିକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ଜଣାପଡ଼ିନାହିଁ। ପ୍ରଶାସନ ପକ୍ଷରୁ ଘଟଣାର ତଦନ୍ତ ଆରମ୍ଭ କରାଯାଇଛି ଏବଂ ଉଦ୍ଧାର ଅଭିଯାନ ଶେଷ ହେବା ପରେ କ୍ଷୟକ୍ଷତିର ସଠିକ୍ ଆକଳନ କରାଯିବ।