ଶେୟର ବଜାରରେ ନିବେଶ କରୁଥିବା ଲୋକଙ୍କ ପାଇଁ ଆସିଛି ଏକ ବଡ଼ ଅପଡେଟ୍। କେନ୍ଦ୍ର ସରକାର ଆସନ୍ତା କିଛି ସପ୍ତାହ ମଧ୍ୟରେ ଇକ୍ୱିଟି ଉପରେ ଲାଗୁଥିବା Long-Term Capital Gains (LTCG) Tax ବ୍ୟବସ୍ଥାର ସମୀକ୍ଷା କରିପାରେ। ୟୁନିଅନ୍ ବଜେଟ୍ ପୂର୍ବରୁ ଏହି ପ୍ରସଙ୍ଗରେ ଆଲୋଚନା ଜୋରଦାର ହୋଇଛି। 

ବର୍ତ୍ତମାନ ନିୟମ ଅନୁସାରେ, ଲିଷ୍ଟେଡ୍ ଇକ୍ୱିଟିର ବିକ୍ରିରୁ ହେଉଥିବା ଦୀର୍ଘମିଆଦି ଲାଭ ଉପରେ ୧୨.୫% LTCG ଟ୍ୟାକ୍ସ ଲାଗୁଛି। ଏକ ଆର୍ଥିକ ବର୍ଷରେ ₹୧.୨୫ ଲକ୍ଷରୁ ଅଧିକ ଲାଭ ଉପରେ ଏହି ଟ୍ୟାକ୍ସ ଲାଗୁ ହୁଏ। ବର୍ତ୍ତମାନ ଏଥିରେ Indexation ର ସୁବିଧା ନାହିଁ। 

ରିପୋର୍ଟ ଅନୁସାରେ, ସରକାର ଶିଳ୍ପ ପ୍ରତିନିଧି, SEBI, CBDT, ବ୍ୟାଙ୍କ ଏବଂ ଅନ୍ୟ ହିତଧାରୀଙ୍କ ସହ ଏହି ଟ୍ୟାକ୍ସ ବ୍ୟବସ୍ଥା ଓ ଏହାର ପୁଞ୍ଜି ପ୍ରବାହ ଉପରେ ପ୍ରଭାବ ବିଷୟରେ ଆଲୋଚନା କରିଛି। ଭାରତୀୟ ଇକ୍ୱିଟି ବଜାରକୁ ବିଦେଶୀ ନିବେଶକଙ୍କ ପାଇଁ ଅଧିକ ଆକର୍ଷଣୀୟ କରିବା ମଧ୍ୟ ଏହି ସମୀକ୍ଷାର ଏକ ପ୍ରମୁଖ ଉଦ୍ଦେଶ୍ୟ ବୋଲି ଜଣାପଡ଼ିଛି।

ଏହି ଆଲୋଚନା ମଧ୍ୟରେ ୨୦୨୬ରେ ଭାରତୀୟ ଇକ୍ୱିଟି ବଜାରରୁ ବିଦେଶୀ ପୋର୍ଟଫୋଲିଓ ନିବେଶକଙ୍କ (FPI) ଟଙ୍କା ପ୍ରତ୍ୟାହାର ମଧ୍ୟ ଏକ ବଡ଼ କାରଣ ହୋଇଛି। CDSL ତଥ୍ୟ ଅନୁସାରେ, ୨୦୨୬ରେ ଏପର୍ଯ୍ୟନ୍ତ FPI ବାହାର କରିଥିବା ଟଙ୍କା ପରିମାଣ ପ୍ରାୟ ₹୩.୧ ଲକ୍ଷ କୋଟିରେ ପହଞ୍ଚିଛି। 

ଅକ୍ଟୋବର ୧୩ରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ମଧ୍ୟ LTCG ଟ୍ୟାକ୍ସ ହଟାଇବା ସମ୍ପର୍କିତ ମତାମତ ଶୁଣିବାକୁ ସରକାର ଆଗ୍ରହୀ ବୋଲି କହିଥିଲେ। ତେବେ ଏହା କେବଳ ବିଚାର ଓ ସମୀକ୍ଷା ପର୍ଯ୍ୟାୟରେ ରହିଛି; LTCG ଟ୍ୟାକ୍ସ କମିବ କିମ୍ବା ସମ୍ପୂର୍ଣ୍ଣ ହଟିବ—ଏନେଇ ଏପର୍ଯ୍ୟନ୍ତ କୌଣସି ଅନ୍ତିମ ଘୋଷଣା ହୋଇନାହିଁ।