ଆମେରିକାରୁ ନିର୍ବାସିତ ହେଉଥିବା ୧,୨୦୦ ପର୍ଯ୍ୟନ୍ତ ବିଦେଶୀ ନାଗରିକଙ୍କୁ ଆସନ୍ତା ଏକ ବର୍ଷ ମଧ୍ୟରେ ଗ୍ରହଣ କରିବାକୁ ଲାଇବେରିଆ ସହମତି ଦେଇଛି। ଆମେରିକାରେ ଅବୈଧ ପ୍ରବାସ ବିରୋଧରେ ଚାଲିଥିବା କଠୋର ଅଭିଯାନ ମଧ୍ୟରେ ଏହା ୱାଶିଂଟନ୍‌ ସହ ହୋଇଥିବା ବଡ଼ ଚୁକ୍ତିଗୁଡ଼ିକ ମଧ୍ୟରୁ ଗୋଟିଏ।

ଲାଇବେରିଆର ସୂଚନା ମନ୍ତ୍ରୀ ଜେରୋଲିନମେକ୍ ପିଆହ କହିଛନ୍ତି ଯେ, ଆମେରିକାରୁ ଆସୁଥିବା ଲୋକମାନଙ୍କୁ ଦେଶରେ “ଅତିଥି” ଭାବେ ଗ୍ରହଣ କରାଯିବ। ପ୍ରଥମ ପର୍ଯ୍ୟାୟରେ ୨୦ ଜଣ ଲାଇବେରିଆରେ ପହଞ୍ଚିବେ। ସେମାନେ ନିଜ ଇଚ୍ଛା ଅନୁଯାୟୀ ଦେଶ ଛାଡ଼ିପାରିବେ କିମ୍ବା ଲାଇବେରିଆରେ ଆଶ୍ରୟ ପାଇଁ ଆବେଦନ କରିପାରିବେ।

ପିଆହଙ୍କ ଅନୁସାରେ, ଆସୁଥିବା କୌଣସି ବ୍ୟକ୍ତି ଆମେରିକା କିମ୍ବା ଲାଇବେରିଆରେ ଅପରାଧୀ ନୁହେଁ କିମ୍ବା କୌଣସି ମାମଲାରେ ଅଭିଯୁକ୍ତ ନୁହେଁ। ଲାଇବେରିଆ ସରକାର ଏହି ବ୍ୟବସ୍ଥାକୁ ମାନବିକ ପଦକ୍ଷେପ ବୋଲି ବର୍ଣ୍ଣନା କରିଛି।

ତେବେ ନିର୍ବାସିତ ହୋଇ ଲାଇବେରିଆ ଯିବାକୁ ଥିବା ଲୋକମାନଙ୍କ ଜାତୀୟତା ସମ୍ପର୍କରେ କୌଣସି ସୂଚନା ଏପର୍ଯ୍ୟନ୍ତ ଦିଆଯାଇନାହିଁ।

ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ୨୦୨୫ ଜାନୁଆରୀରେ କ୍ଷମତାକୁ ଆସିବା ପରଠାରୁ କିଛି ନିର୍ବାସିତ ବ୍ୟକ୍ତିଙ୍କୁ “ତୃତୀୟ ଦେଶ” ଭାବେ ପରିଚିତ ଅନ୍ୟ ଦେଶଗୁଡ଼ିକୁ ପଠାଇଛି। ଘାନା, ଇକ୍ୱାଟୋରିଆଲ୍ ଗିନି, ଏସୱାତିନି, ଡେମୋକ୍ରାଟିକ୍ ରିପବ୍ଲିକ୍ ଅଫ୍ କଙ୍ଗୋ ଏବଂ ସିଏରା ଲିଓନ୍‌ ଭଳି ଆଫ୍ରିକୀୟ ଦେଶ ମଧ୍ୟ ଏଭଳି ବ୍ୟବସ୍ଥାରେ ଆମେରିକାରୁ ନିର୍ବାସିତ ଲୋକଙ୍କୁ ଗ୍ରହଣ କରିଛନ୍ତି।

ତୃତୀୟ ଦେଶକୁ ନିର୍ବାସନ କରିବାର ଏହି ବ୍ୟବସ୍ଥାକୁ ଆମେରିକା ଆଇନସମ୍ମତ ବୋଲି କହିଛି। କିନ୍ତୁ ମାନବାଧିକାର ସଂଗଠନଗୁଡ଼ିକ ଏହି ଚୁକ୍ତିଗୁଡ଼ିକରେ ସ୍ୱଚ୍ଛତାର ଅଭାବ ନେଇ ପ୍ରଶ୍ନ ଉଠାଇଛନ୍ତି।

ଲାଇବେରିଆର ମନ୍ତ୍ରୀ ପିଆହ ସ୍ପଷ୍ଟ କରିଛନ୍ତି ଯେ, ଏହି କାର୍ଯ୍ୟକ୍ରମରେ ସାମିଲ ହେବା ପାଇଁ ଲାଇବେରିଆ କୌଣସି ଆର୍ଥିକ କ୍ଷତିପୂରଣ କିମ୍ବା ପୁରସ୍କାର ଦାବି କରିନାହିଁ ଏବଂ ପାଇନାହିଁ। ତେବେ ଏହି ବ୍ୟବସ୍ଥା ପରିଚାଳନା ଏବଂ ଦେଶର ପ୍ରବାସନ ବ୍ୟବସ୍ଥାକୁ ମଜବୁତ କରିବା ପାଇଁ ଲାଇବେରିଆକୁ ଆମେରିକାର ସହାୟତା ମିଳିବ।

ଲାଇବେରିଆ ସରକାର କହିଛି ଯେ, ଦେଶର ଐତିହାସିକ ପରମ୍ପରା ଅନୁଯାୟୀ ଯେଉଁମାନେ ନିଜ ଦେଶକୁ ଫେରିପାରୁନାହାନ୍ତି ଏବଂ ଯୁଦ୍ଧ, ନିର୍ଯାତନା କିମ୍ବା ଅନ୍ୟାନ୍ୟ ସଂଘର୍ଷରୁ ସୁରକ୍ଷା ଚାହୁଁଛନ୍ତି, ସେମାନଙ୍କୁ ଆଶ୍ରୟ ଦେବାର ପରମ୍ପରା ରହିଛି।